वास्तुशास्त्रानुसार घराच्या नेमप्लेटसाठी लाकूड, मेटल की दगड शुभ, वाचा दिशेचे नियम

घराच्या मुख्य दारावर लावलेली नेमप्लेट ही त्या घराची ओळख असते. कोणाला लाकडी नेमप्लेट आवडते, तर कोणाला मेटल किंवा दगडाची. पण वास्तुशास्त्रानुसार नेमप्लेट म्हणजे फक्त ओळखीचं चिन्ह नाही, तर तिचं साहित्य आणि ती कोणत्या दिशेला लावली आहे, यावर घरात येणाऱ्या ऊर्जेचा प्रभाव अवलंबून असतो असं म्हटलं जातं. त्यामुळे नेमप्लेट निवडताना वास्तुचे काही नियम लक्षात ठेवायला हवेत.

लाकडी नेमप्लेटबद्दल बोलायचं झालं तर, वास्तुशास्त्रानुसार लाकूड हे वाढ, स्थिरता आणि समृद्धीशी जोडलेलं मानलं जातं. त्यामुळे घरासाठी लाकडी नेमप्लेट शुभ समजली जाते. यासाठी सागवान, रोझवूड, महोगनी आणि आंब्याच्या लाकडासारखं मजबूत लाकूड वापरता येतं. मात्र प्लायवूड, एमडीएफ किंवा प्लास्टिकपासून बनवलेली नेमप्लेट टाळावी, कारण ती फक्त लाकडासारखी दिसते, खरं लाकूड नसते. लाकडी नेमप्लेटसाठी पूर्व आणि दक्षिण या दिशा शुभ मानल्या जातात.

मेटलच्या नेमप्लेटचा संबंध संपत्ती आणि नव्या संधींशी जोडला जातो, असं वास्तुशास्त्र सांगतं. पितळ, तांबे, पोलाद आणि लोखंड यांसारख्या धातूंपासून आकर्षक नेमप्लेट बनवता येतात. यातही पितळेची नेमप्लेट घरासाठी विशेष शुभ मानली जाते. मेटलच्या नेमप्लेटसाठी उत्तर आणि पश्चिम दिशा योग्य समजल्या जातात. वास्तुशास्त्रानुसार उत्तर दिशा ही कुबेराची दिशा मानली जाते, त्यामुळे या दिशेला पितळेची नेमप्लेट लावणं संपत्ती आणि समृद्धीसाठी शुभ मानलं जातं.

दगडाची नेमप्लेट वापरायची असेल, तर वास्तुशास्त्रानुसार दगड हा पृथ्वी तत्त्वाशी संबंधित असून सामर्थ्य आणि स्थिरतेचं प्रतीक मानला जातो. संगमरमर, ग्रॅनाइट किंवा इतर नैसर्गिक दगडांपासून बनवलेली नेमप्लेट घराच्या मुख्य दारावर लावता येते. हे नकारात्मक ऊर्जेपासून संरक्षण देतं असंही मानलं जातं. दगडी नेमप्लेटसाठी नैऋत्य आणि वायव्य दिशा शुभ समजल्या जातात. नैऋत्य दिशा स्थिरतेशी जोडलेली असल्यामुळे तिथे नेमप्लेट लावल्यास कुटुंबप्रमुखाची प्रतिष्ठा आणि प्रभाव वाढतो असंही सांगितलं जातं.

वास्तुचे आणखी काही नियमही लक्षात ठेवायला हवेत. प्लायबोर्ड, प्लास्टिक किंवा एमडीएफसारख्या लाकडासारख्या दिसणाऱ्या किंवा लाकडाची नक्कल करणाऱ्या मटेरियलपासून बनवलेली नेमप्लेट टाळावी. नेमप्लेट दाराच्या अगदी मधोमध लावण्याऐवजी मुख्य दाराच्या उजव्या बाजूला लावणं अधिक शुभ मानलं जातं. तसंच नेमप्लेट नेहमी स्वच्छ ठेवावी आणि त्यावर स्पष्ट पिवळा फोकस लाईट लावावा, जेणेकरून ती कधीही अंधारात राहणार नाही आणि नावही सहज दिसेल.

टीप: धर्म, ज्योतिष, वास्तु, फेंगशुई या विषयांवरील ही माहिती केवळ वाचकांच्या माहितीसाठी आहे. यासंबंधी कोणताही प्रयोग करण्यापूर्वी तज्ज्ञांचा सल्ला घेणं आवश्यक आहे.