वर्ध्यात दुचाकी चोरणाऱ्या आरोपीला पोलिसांनी पकडले, चार गाड्या जप्त

वर्धा शहर पोलीस स्टेशनला एका फिर्यादीने तक्रार दिली होती की, 8 ऑगस्ट 2026 रोजी नालंदा नगर महिला आश्रम, वर्धा येथून त्यांची होंडा ॲक्टिवा गाडी चोरीला गेली. या गाडीचा क्रमांक एम एच 32-बी वाय एफ-1546 असा असून तिची किंमत अंदाजे 60,000 रुपये आहे. या तक्रारीवरून पोलिसांनी गुन्हा क्रमांक 1303/2026 अंतर्गत बीएनएस कलम 303(2) नुसार गुन्हा दाखल करून तपास सुरू केला.

9 सप्टेंबर 2026 रोजी पोलिसांना गोपनीय माहिती मिळाली, त्यावरून तलोडी, तहसील सेलू, जिल्हा वर्धा येथे राहणाऱ्या अनुराग प्रवीण धाबर्डे (वय 21) या आरोपीला ताब्यात घेण्यात आले. चौकशीदरम्यान आरोपीने चोरीची कबुली दिली. त्याने केवळ याच ॲक्टिवाची नव्हे, तर वर्धा, नागपूर आणि चंद्रपूर येथून आणखी दुचाकी चोरल्याचेही मान्य केले. आरोपीकडून एकूण चार चोरीच्या गाड्या जप्त करण्यात आल्या, आणि त्यातून इतरही गुन्हे उघड झाले.

पोलीस स्टेशन हिंगणा, जिल्हा नागपूर येथील गुन्हा क्रमांक 384/26 अंतर्गत कलम 303(2) नुसार दाखल गुन्ह्यात होंडा शाईन (क्रमांक एम एच-40-बी एम-1977, अंदाजे किंमत 50,000 रुपये) जप्त झाली. पोलीस स्टेशन राजुरा, जिल्हा चंद्रपूर येथील गुन्हा क्रमांक 713/2026 अंतर्गत बीएनएस कलम 303(2) नुसार राॅयल इनफिल्ड (क्रमांक एम एच 34-ऐएस-1120, अंदाजे किंमत 1,50,000 रुपये) जप्त झाली. तर वर्धा शहर पोलीस स्टेशनच्या गुन्हा क्रमांक 1508/26 अंतर्गत बीएनएस कलम 303(2) नुसार हिरो होंडा स्प्लेंडर प्लस (क्रमांक एम एच-32-एस-8869, अंदाजे किंमत 15,000 रुपये) जप्त करण्यात आली.

अशा प्रकारे आरोपीकडून एकूण चार दुचाकी, ज्यांची एकूण अंदाजे किंमत 2,15,000 रुपये आहे, जप्त करण्यात आल्या आहेत. आणखी काही चोरीचे गुन्हे उघड होण्याची शक्यता पोलिसांनी वर्तवली आहे. आरोपीला वर्धा जिल्हा सत्र न्यायालयात हजर करण्यात आले असून, त्याला 10 सप्टेंबर ते 11 सप्टेंबर 2026 पर्यंत पोलीस कोठडी रिमांड मिळाला आहे. चोरीच्या गाड्यांची विल्हेवाट कशी लावली गेली आणि आरोपीचे इतर साथीदार कोण आहेत, याचा तपास सध्या सुरू आहे.

ही कारवाई पोलीस अधीक्षक सौरभकुमार अग्रवाल, अप्पर पोलीस अधीक्षक सदाशिव वाघमारे आणि उपविभागीय पोलीस अधिकारी सुनील महाडिक यांच्या मार्गदर्शनाखाली पार पडली. वर्धा शहर पोलीस स्टेशनचे ठाणेदार नागेशकुमार चतरकर यांच्या नेतृत्वाखाली गुन्हे प्रकटीकरण पथकातील पोलीस उपनिरीक्षक शरद गायकवाड, पोलीस हवालदार महेंद्र पाटील, पोलीस हवालदार अभिजित वाघमारे, पोलीस शिपाई रंजीत भुरसे आणि पोलीस शिपाई अमोल साळवण यांनी ही कामगिरी बजावली.