ट्रम्प ज्युनियरच्या लग्नाचा खर्च पुतिन यांच्या निकटवर्तीयाने उचलल्याचा दावा, पत्नीचे स्पष्टीकरण

अमेरिकेचे राष्ट्राध्यक्ष डोनाल्ड ट्रम्प यांचे मोठे पुत्र डोनाल्ड ट्रम्प ज्युनियर आणि त्यांची पत्नी बेटिना अँडरसन यांच्या लग्नाशी संबंधित एक खळबळजनक माहिती समोर आली आहे. मे २०२६ मध्ये बहामासमधील एका खासगी बेटावर हा भव्य विवाहसोहळा पार पडला होता. या लग्नानंतर दोन रात्री चाललेल्या उत्सवाचा लाखो डॉलर्सचा खर्च रशियाचे राष्ट्राध्यक्ष व्लादिमीर पुतिन यांच्या अत्यंत जवळच्या सहकाऱ्याने केल्याचे उघड झाले आहे. रशियन उद्योगपती आणि इंटरनॅशनल बॉक्सिंग असोसिएशनचे (IBA) अध्यक्ष उमर क्रेमलेव्ह यांनी हा मोठा खर्च उचलल्याची माहिती पुढे आली आहे.

प्रोपाब्लिका या शोधपत्रकारिता संस्थेने यासंदर्भात सविस्तर अहवाल प्रसिद्ध केला आहे. या अहवालानुसार, बहामासमधील तीन दिवसांच्या या सोहळ्यासाठी दोन खासगी बेटे वापरण्यात आली होती. त्यापैकी एका बेटाचे भाडे, पाहुण्यांची राहण्याची व्यवस्था, मोठ्या पार्ट्या आणि लाखो रुपयांची फटाक्यांची आतषबाजी, या सगळ्याचा खर्च क्रेमलेव्ह यांनी दुबईतील एका संस्थेमार्फत केला. उमर क्रेमलेव्ह हे पुतिन यांच्या निकटवर्तीय मानले जातात आणि युक्रेनने त्यांच्यावर निर्बंध लादलेले आहेत. त्यामुळे राष्ट्राध्यक्षांच्या मुलाच्या कौटुंबिक सोहळ्यात रशियन वकिलातीशी व क्रेमलिनशी संबंध असलेल्या व्यक्तीचा इतका मोठा आर्थिक सहभाग बघून अमेरिकेतील विरोधक आणि गुप्तचर तज्ज्ञांनी अनेक गंभीर प्रश्न उपस्थित केले आहेत.

उमर क्रेमलेव्ह हे आंतरराष्ट्रीय बॉक्सिंग असोसिएशनचे प्रमुख असून रशियातील एक प्रभावशाली आणि श्रीमंत उद्योगपती म्हणून ओळखले जातात. रशियन सरकार आणि राष्ट्राध्यक्ष पुतिन यांच्याशी त्यांचे घनिष्ठ संबंध आहेत. रशियाची सरकारी ऊर्जा कंपनी गॅझप्रॉम हिच्याशीही त्यांच्या असोसिएशनचे मोठे आर्थिक व्यवहार राहिले आहेत.

ट्रम्प ज्युनियर यांच्या प्रवक्त्याने दिलेल्या माहितीनुसार, ट्रम्प ज्युनियर आणि उमर क्रेमलेव्ह यांची भेट एका सामायिक मित्रामार्फत शिकारीच्या छंदादरम्यान झाली होती. बॉक्सिंग आणि मैदानी खेळांमधील आवडीमुळे त्यांच्यात मैत्री झाली. मात्र ट्रम्प ज्युनियर यांच्यासोबत कोणताही व्यावसायिक किंवा राजकीय करार नसल्याचा दावा ट्रम्प कुटुंबाने केला आहे. बहामासमधील या सोहळ्यात मुख्य लग्न फक्त १८ कुटुंबीयांच्या उपस्थितीत पार पडले, पण नंतरच्या पार्ट्यांमध्ये क्रेमलेव्ह आणि त्यांच्यासोबत आलेला रशियन नागरिकांचा मोठा गट उपस्थित होता, ज्याने पाहुण्यांचे लक्ष वेधून घेतले.

रशियन निधीच्या अहवालानंतर अमेरिकन प्रसारमाध्यमांत जोरदार वाद सुरू झाल्यावर बेटिना अँडरसन हिने सोशल मीडियावर एक मोठी पोस्ट टाकून स्पष्टीकरण दिले. तिने आर्थिक सहभागाची बातमी खरी असल्याचे मान्य केले, पण यामागे कोणताही राजकीय किंवा वाईट हेतू असल्याचा दावा पूर्णपणे फेटाळला. बेटिनाने पोस्टमध्ये लिहिले, "डॉन आणि मी २२ मे रोजी अत्यंत खासगी वातावरणात, फक्त कुटुंबाच्या उपस्थितीत लग्न केले. आमच्या लग्नानंतरच्या दोन रात्रींच्या सुंदर उत्सवांचे यजमानपद आमचे प्रिय मित्र उमर क्रेमलेव्ह यांनी अत्यंत उदारतेने भूषवले. एका मित्राकडून मिळालेली ही अनमोल आणि उदार लग्नाची भेट होती, ज्याबद्दल आम्ही त्यांचे सदैव आभारी आहोत." तिने पुढे लिहिले, "एखाद्याची पार्श्वभूमी किंवा तो कुठून आला यावरून एका चांगल्या आणि वैयक्तिक आनंदाच्या क्षणाला राजकीय किंवा संशयास्पद वळण दिले जाणे दुर्दैवी आहे. मैत्रीसाठी कोणत्याही राजकीय हेतूची गरज नसते आणि उदारतेमागे नेहमीच लपलेला अजेंडा असतोच असे नाही. कधीकधी लग्नाची भेट ही फक्त एक साधी भेट असते. यात कोणताही कट नाही आणि कोणतेही रहस्य नाही."

ट्रम्प कुटुंबाने हा प्रकार केवळ वैयक्तिक मैत्री आणि भेटवस्तू असल्याचा दावा केला असला, तरी अमेरिकन लोकप्रतिनिधी आणि सुरक्षा तज्ज्ञांनी यावर तीव्र चिंता व्यक्त केली आहे. अमेरिकेच्या हाऊस ओव्हरसाइट कमिटीचे वरिष्ठ डेमोक्रॅटिक नेते रॉबर्ट गार्शिया यांनी सोशल मीडियावर प्रश्न उपस्थित केला की, "रशियन उद्योगपती उमर क्रेमलेव्ह यांनी अमेरिकेच्या राष्ट्राध्यक्षांच्या मुलावर लाखो डॉलर्स खर्च केले. याच्या बदल्यात त्यांना काय मिळाले? या प्रश्नाचे उत्तर देशवासीयांना मिळायला हवे."

रशिया-युक्रेन युद्ध सुरू असताना आणि रशियन हस्तक्षेपावरून अमेरिकेत सातत्याने चर्चा होत असताना, राष्ट्राध्यक्ष ट्रम्प यांच्या अत्यंत जवळच्या आणि राजकीय वारसदार मानल्या जाणाऱ्या मुलाने रशियन ओलीगार्ककडून इतकी महागडी भेट स्वीकारल्यामुळे येत्या दिवसांत अमेरिकन राजकारणात यावरून आणखी वाद निर्माण होण्याची चिन्हे आहेत.