तीन दिवसांनंतरही जरीपटक्याचा लाचखोर पोलीस शिपाई सापडेना

नागपुरातील जरीपटका पोलीस स्टेशनमध्ये लाचलुचपत प्रतिबंधक विभागाने (एसीबी) केलेल्या सापळा कारवाईत 20 हजार रुपयांची ट्रॅप मनी घेऊन फरार झालेला पोलीस शिपाई मनीष मेश्राम याला घटना घडून तीन दिवस उलटूनही पोलिसांना पकडता आलेले नाही. या प्रकरणात याआधीच अटक करण्यात आलेला हवालदार सचिन तायडे याची एसीबी कोठडी संपल्यानंतर, त्याच्याकडून मिळणाऱ्या माहितीच्या आधारे मेश्राम सापडेल, अशी आशा तपास यंत्रणेला आहे.

एसीबीने 16 सप्टेंबर रोजी हवालदार सचिन तायडे याला 20 हजार रुपयांची लाच घेतल्याच्या आरोपावरून अटक केली होती. या प्रकरणात तायडेसोबतच पोलीस शिपाई मेश्रामसुद्धा तक्रारदाराला लाचेसाठी त्रास देत असल्याचा आरोप आहे. तक्रारदाराविरुद्ध याआधीच दाखल असलेल्या असंज्ञेय (एनसी) स्वरूपाच्या गुन्ह्यात कारवाई करण्याची धमकी देऊन दोघेही मिळून तक्रारदाराकडे 40 हजार रुपयांची मागणी करत होते, असा आरोप आहे. सुरुवातीला एवढी रक्कम मागितल्यानंतर, नंतर हे प्रकरण मिटवण्यासाठी 20 हजार रुपये घेण्याचा दबाव दोघांनी मिळून तक्रारदारावर टाकल्याचा आरोप आहे.

तक्रारदाराने या त्रासाला कंटाळून एसीबीकडे तक्रार केल्यानंतर एसीबीने सापळा रचला. या ट्रॅप कारवाईदरम्यान तक्रारदाराने ठरल्याप्रमाणे 20 हजार रुपये आरोपींना दिले होते. मात्र हे पैसे घेतल्यानंतर आरोपी पोलीस शिपाई मेश्राम एसीबीच्या हाती न लागता घटनास्थळावरून पळून गेला आणि तेव्हापासून आजतागायत त्याचा कुठलाही ठावठिकाणा पोलिसांना लागलेला नाही. दुसरीकडे, या प्रकरणातील आरोपी हवालदार तायडे याला मात्र एसीबीने ताब्यात घेतले असून त्याला सध्या पाच दिवसांच्या एसीबी कोठडीत ठेवण्यात आले आहे.

या संपूर्ण प्रकरणाच्या पार्श्वभूमीवर जरीपटका पोलीस स्टेशनचे ठाणेदार अनिल ताकसांडे यांनाही जबाबदारीतून तूर्त बाजूला काढत नियंत्रण कक्षाशी (कंट्रोल रूम) 'अटॅच' करण्यात आले आहे.