नागपूर पोलीस दलात खळबळ, 20 हजार रुपयांची लाच घेताना जरीपटका थाण्याचा हेड कॉन्स्टेबल रंगेहाथ अटकेत

नागपूर जिल्ह्यातील जरीपटका पोलीस स्टेशनमध्ये एका हेड कॉन्स्टेबलला लाच घेताना रंगेहाथ पकडण्यात आले आहे. अदखलपात्र गुन्ह्यात मदत करून पुढे कोणतीही कारवाई न करण्याच्या बदल्यात त्याने तक्रारदाराकडून 20 हजार रुपयांची लाच घेतली होती. अँटी करप्शन ब्युरोच्या पथकाने ही कारवाई केली असून यामुळे नागपूर शहर पोलीस दलात एकच खळबळ उडाली आहे. अटक करण्यात आलेल्या हेड कॉन्स्टेबलचे नाव सचिन तायडे असे सांगण्यात आले.

सचिन तायडे आणि त्याच्या टीमकडे जरीपटका थाण्यात नोंद होणाऱ्या अदखलपात्र, म्हणजेच एनसी, प्रकरणांवर कारवाई करण्याची जबाबदारी सोपवण्यात आली होती. एका व्यक्तीने जरीपटका थाण्यात तक्रारदाराविरोधात तक्रार दिली होती, त्या तक्रारीवरून तक्रारदाराविरोधात एनसी दाखल करण्यात आली होती. हीच एनसी रद्द करावी किंवा त्यात पुढे कारवाई होऊ नये, यासाठी तक्रारदाराला हेड कॉन्स्टेबल तायडेकडे जावे लागले.

या अदखलपात्र प्रकरणात तक्रारदाराला दिलासा द्यावा, पुढे कोणतीही दंडात्मक कारवाई करू नये आणि प्रकरण दाबण्यास मदत करावी, या बदल्यात हेड कॉन्स्टेबल सचिन तायडे याने सुरुवातीला 40 हजार रुपयांची लाच मागितली होती. तक्रारदाराकडे इतकी मोठी रक्कम देण्याची ऐपत नव्हती, त्यामुळे त्याने तायडेकडे वारंवार विनवण्या केल्या. दोघांमध्ये बरीच घासाघीस झाली आणि अखेर तायडे 20 हजार रुपये इतकी रक्कम घेण्यास तयार झाला.

लाचेची रक्कम द्यायची नव्हती, म्हणून तक्रारदाराने लगेच अँटी करप्शन ब्युरोशी संपर्क साधून याबाबत तक्रार नोंदवली. एसीबीच्या पथकाने आधी ठरलेल्या प्रक्रियेनुसार लाचेच्या मागणीचे गोपनीय पडताळणी म्हणजेच सत्यापन केले, त्यात तक्रारदाराने केलेले आरोप खरे असल्याचे आढळून आले. ठरलेल्या योजनेनुसार बुधवारी रात्री सचिन तायडे याने तक्रारदाराला लाचेची रक्कम घेऊन जरीपटका थाण्यातच बोलावले.

एसीबीच्या पथकाने जरीपटका पोलीस स्टेशन परिसरात आधीच सापळा रचून ठेवला होता. रात्री साधारण 10 वाजता तक्रारदाराने 20 हजार रुपयांची लाचेची रक्कम हेड कॉन्स्टेबल सचिन तायडेच्या हातात दिली, आणि त्याचवेळी आधीच सज्ज असलेल्या एसीबीच्या टीमने त्याला रंगेहाथ पकडले.

जरीपटका पोलीस स्टेशनच्या टेबलावर बसून दुसऱ्यांविरोधात कायदेशीर गुन्हे दाखल करणारा सचिन तायडे याच्यावर त्याच थाण्यात भ्रष्टाचार प्रतिबंधक कायद्याच्या विविध कलमांखाली गुन्हा दाखल करून त्याला ताब्यात घेण्यात आले.

नागपूर शहर पोलीस दलात बऱ्याच मोठ्या काळानंतर एखाद्या पोलीस कर्मचाऱ्यावर एसीबीचा असा यशस्वी सापळा रचला गेला असून, यामुळे खात्याच्या कार्यपद्धतीवर पुन्हा एकदा गंभीर प्रश्न उपस्थित झाले आहेत.