सूर्या-ज्योतिका यांचा २० व्या लग्न वाढदिवसानिमित्त मुलांसमोर पुन्हा विवाहसोहळा

दाक्षिणात्य सिनेसृष्टीतलं लोकप्रिय जोडपं सूर्या आणि ज्योतिका यांच्या लग्नाला यंदा २० वर्षे पूर्ण झाली आहेत. या खास निमित्ताने दोघांनी पुन्हा एकदा आपलं नातं साजरं केलं असून क्रिश्चियन पद्धतीने विवाहसोहळा करत एकमेकांना पुन्हा लग्नाची वचने दिली. या सोहळ्याला त्यांची मुलं दिया आणि देव यांच्यासह कुटुंबीय आणि जवळचे मित्र उपस्थित होते.

सूर्या आणि ज्योतिकाने या सोहळ्याचा एक व्हिडीओ सोशल मीडियावर शेअर केला. या व्हिडीओत ज्योतिका पांढऱ्या रंगाच्या वेडिंग गाऊनमध्ये मुलगा देवचा हात धरून वेडिंग व्हेन्यूमध्ये येताना दिसते, तर मुलगी दिया सूर्यासोबत उभी असल्याचं दिसतं. त्यानंतर सूर्या आणि ज्योतिका एकमेकांसमोर उभे राहून पुन्हा एकदा लग्नाची वचने देतात, आणि या क्षणी दोघेही भावुक झाल्याचं व्हिडीओत दिसतं. सोहळ्यातील नव्या फोटोंसोबत खास क्षणांची झलकही समोर आली असून सूर्याचा भाऊ आणि अभिनेता कार्थीही या सेलिब्रेशनमध्ये सहभागी झाल्याचं दिसतं.

हा व्हिडीओ शेअर करताना ज्योतिकाने त्यांच्या नात्याबद्दल भावुक पोस्ट लिहिली. हा सोहळा 'परफेक्ट मॅरेज'चा उत्सव नसून गेल्या दोन दशकांत नात्यात आलेल्या चढ-उतारांचा उत्सव असल्याचं तिने त्यात म्हटलं आहे. प्रेम, समजूतदारपणा, तडजोड, त्याग आणि एकमेकांना स्वीकारण्याच्या प्रवासातून आपलं नातं अधिक घट्ट झाल्याचं तिने सांगितलं. २० वर्षे एकत्र घालवल्यानंतर हा उत्सव फक्त नात्याचा नाही, तर एकमेकांच्या सहवासामुळे आपण जसे घडलो त्या व्यक्तिमत्त्वाचाही असल्याचं तिने नमूद केलं.

सूर्यासाठीही ज्योतिकाने खास शब्द लिहिले. आयुष्यात सुरक्षितता आणि सन्मान देणारा जोडीदार मिळाल्याबद्दल तिने सूर्याचे आभार मानले, तसंच मुलांबाबतही तिने भावना व्यक्त केल्या. आई म्हणून आपल्या मुलांनी आई-वडिलांची प्रेमकहाणी पाहून आनंदी व्हावं आणि भविष्यात त्यांनाही अशाच नात्याची ओढ वाटावी, अशी अपेक्षा तिने व्यक्त केली.

ज्योतिकाने सूर्यासोबतच्या मैत्रीचाही उल्लेख केला. तिच्यासाठी सूर्या फक्त पती नसून, बरोबरीने उभा राहणारा मित्र, विश्वासू साथीदार आणि मनातील गोष्टी जाणणारा माणूस असल्याचं तिने सांगितलं. स्वतःला 'इम्परफेक्ट वाइफ' म्हणत तिने हलक्याफुलक्या शब्दांत नात्याबद्दल भाष्य केलं. कधी एकमेकांशी वाद होणे आणि नंतर पुन्हा एकमेकांना समजून घेणे, याच प्रक्रियेतून आपलं नातं अधिक मजबूत होत असल्याचं तिच्या पोस्टमधून दिसून आलं.

सूर्या आणि ज्योतिकाची प्रेमकहाणी दोन दशकांहून जुनी आहे. दोघांची पहिली भेट १९९९ साली 'पूवेलम केट्टुप्पर' या चित्रपटाच्या सेटवर झाली होती. एकत्र काम करताना त्यांच्यात मैत्री झाली आणि पुढे त्याचं रूपांतर प्रेमात झालं. काही वर्षे एकमेकांना डेट केल्यानंतर दोघांनी ११ सप्टेंबर २००६ रोजी लग्न केलं. आता लग्नाला २० वर्षे पूर्ण झाल्यानिमित्त सूर्या आणि ज्योतिकाने पुन्हा एकदा वचने घेत आपल्या नात्यातील प्रेम, मैत्री आणि कुटुंबाची साथ खास पद्धतीने साजरी केली आहे.