बाप्पाच्या आगमनासोबत घरातला 'तो' आनंदही झाला पूर्ण; संभावनाने दाखवले जुळ्या मुलांचे चेहरे

अभिनेत्री संभावना सेठ आणि तिचा नवरा अविनाश द्विवेदी यांच्यासाठी हा गणेशोत्सव अगदी खास ठरला आहे. घरात बाप्पा आल्यानंतर या दोघांनी आपल्या आयुष्यातलं आणखी एक सुंदर क्षण चाहत्यांसोबत शेअर केलं. जवळपास दहा वर्षांच्या प्रतीक्षेनंतर त्यांना बाळ झालं आहे, आणि आता पहिल्यांदाच संभावनाने आपल्या जुळ्या मुलांचा चेहरा चाहत्यांना दाखवला.

हा फेस रिव्हील त्यांनी स्वतःच्या यूट्यूब व्लॉगमधून केला. गणपती बाप्पाच्या जयघोषात दोन्ही मुलांना चाहत्यांसमोर आणण्यात आलं, आणि या क्षणी संपूर्ण कुटुंब त्यांच्यासोबत होतं. यावेळी मुलांचं एक फोटोशूटही करण्यात आलं, जेणेकरून हा खास क्षण कायमचा जपून ठेवता येईल.

बाप्पा घरात विराजमान असतानाच मुलांचा चेहरा दाखवायचा असं संभावना आणि अविनाशने आधीच ठरवलं होतं. 'गणपती बाप्पा मोरया'चा जयघोष करत त्यांनी दोन्ही मुलांचे चेहरे उघड केले, आणि त्या क्षणी त्यांच्या चेहऱ्यावरचा आनंद आणि भावुकता व्लॉगमध्ये स्पष्ट दिसून येते. मुलाचं नाव युगार्थ आणि मुलीचं नाव ध्वजाह असं त्यांनी ठेवलं आहे. दोन्ही नावं त्यांनी अगदी विचारपूर्वक निवडली असल्याचं व्लॉगमधून दिसतं.

फेस रिव्हीलसोबतच या व्लॉगमध्ये मुलांच्या जन्मावेळी रुग्णालयातले काही खास क्षणही दाखवण्यात आले. अनेक वर्षांच्या वाटेनंतर मुलांना पहिल्यांदा जवळ घेतल्याचा क्षण दोघांसाठीही खूप भावनिक होता. संभावनाने आधीही तिच्या पालकत्वाच्या प्रवासातले चढ-उतार सोशल मीडियावरून चाहत्यांसोबत शेअर केले होते, त्यामुळे या फेस रिव्हीलची चाहत्यांना आधीपासूनच उत्सुकता होती.

संभावनाने याआधी एका टीव्ही शोमध्ये आपल्या फर्टिलिटी जर्नीबद्दल सांगितलं होतं. लग्नाआधीच तिने आणि अविनाशने एम्ब्रियो फ्रीज करून ठेवले होते, आणि पुढे बाळाचं नियोजन केल्यावर सगळं सोपं होईल असं त्यांना वाटत होतं. पण त्यानंतर त्यांना अनेक अडचणींचा सामना करावा लागला. एम्ब्रियो ट्रान्सफरचे अनेक प्रयत्न करूनही यश मिळालं नाही, त्यामुळे त्यांनी IVFच्या मार्गानेही प्रयत्न सुरू केले. संभावनाच्या सांगण्यानुसार, ती एकूण सात IVF सायकल्समधून गेली, आणि या वाटेवर तिला मिसकॅरेजचाही सामना करावा लागला.

अखेर ४ जून २०२६ रोजी संभावना आणि अविनाशने सरोगसीच्या माध्यमातून जुळ्या मुलांचं स्वागत केलं, त्यांच्या घरी एक मुलगा आणि एक मुलगी आली. जवळपास दहा वर्षांच्या या प्रवासानंतर दोघांचं पालक होण्याचं स्वप्न पूर्ण झालं. आता गणपती बाप्पाच्या उपस्थितीत त्यांनी आपल्या दोन्ही मुलांचे चेहरे जगासमोर आणले, आणि त्यामुळे यंदाचा गणेशोत्सव त्यांच्या कुटुंबासाठी आणखी खास आणि कायम लक्षात राहणारा ठरला.