रशियाचा युक्रेनवर एकाच वेळी ५०० ड्रोनचा मारा, ९० मिनिटांत ९ नागरिकांचा मृत्यू

रशिया आणि युक्रेन यांच्यातील युद्धाला चार वर्षे उलटली तरी हे युद्ध थांबण्याची कोणतीही चिन्हे दिसत नाहीत. उलट रशियाने आपल्या हल्ल्यांची तीव्रता आणखी वाढवल्याचे समोर आले आहे. युक्रेनियन अधिकाऱ्यांनी दिलेल्या माहितीनुसार, रशियन सैन्याने अवघ्या ९० मिनिटांच्या कालावधीत युक्रेनच्या वेगवेगळ्या शहरांवर तब्बल ५०० हून अधिक ड्रोन डागले. या हल्ल्यात कमीत कमी ९ नागरिकांचा जागीच मृत्यू झाला असून १२ हून अधिक जण गंभीर जखमी झाले आहेत. या हल्ल्यांमुळे अनेक निवासी इमारती, दुकाने आणि देशाच्या पायाभूत सुविधांचे मोठे नुकसान झाले.

युक्रेनचे राष्ट्राध्यक्ष वोलोडिमिर झेलेन्स्की यांनी सोशल मीडियावरून या हल्ल्यावर संताप व्यक्त केला. रशियाने एकाच दिवसात ५०० हून अधिक शाहेद आणि इतर लढाऊ ड्रोन डागल्याचे त्यांनी सांगितले. युद्धभूमीवर थेट यश मिळत नसल्याने रशियन सैन्य आता नागरी वस्त्या आणि युक्रेनच्या अर्थव्यवस्थेला लक्ष्य करत असल्याचा आरोप त्यांनी केला. युद्धकाळात युक्रेनियन नागरिक ज्या तळांवर आणि सुविधांवर तग धरून आहेत, ती सर्व आर्थिक केंद्रे उद्ध्वस्त करणे हाच रशियाचा डाव असल्याचे झेलेन्स्की म्हणाले.

आघाडीवरील प्रमुख शहर क्रामटॉर्स्कच्या नगर परिषदेने सांगितले की, रशियन सैन्याने लष्करी तळांऐवजी थेट सामान्य नागरिकांना लक्ष्य केले. या शहरात ९० मिनिटांच्या अंतराने तीन वेगवेगळ्या ठिकाणी नागरी वाहनांवर ड्रोन हल्ले झाले, ज्यात रस्त्यावरील आणि दुकानाबाहेर उभ्या गाड्यांचाही समावेश होता. या हल्ल्यात ३ जणांचा मृत्यू झाला तर ४ जण गंभीर जखमी झाले. स्थानिक प्रशासनाने संताप व्यक्त करत रशिया आता दैनंदिन कामासाठी बाहेर पडणाऱ्या सामान्य नागरिकांच्या गाड्यांवरही हल्ले करत असल्याचे सांगितले.

झिटोमिर प्रदेशातील झ्वियाहेल शहरात एका किराणा दुकानावर झालेल्या ड्रोन हल्ल्यात दुकानातील २ जणांचा जागीच मृत्यू झाला. याशिवाय परिसरातील दोन पेट्रोल पंप आणि एका परदेशी गुंतवणुकीच्या इमारतीचेही मोठे नुकसान झाले.

झापोरिझिया प्रदेशाचे गव्हर्नर इव्हान फेडोरोव्ह यांनी सांगितले की, त्यांच्या भागातील ड्रोन हल्ल्यात २ नागरिक ठार तर ११ जण गंभीर जखमी झाले. राष्ट्राध्यक्ष झेलेन्स्की यांचे मूळ गाव असलेल्या क्रिव्हि रिह शहरालाही रात्रीच्या वेळी क्षेपणास्त्रे आणि ड्रोनने एकाच वेळी लक्ष्य करण्यात आले, ज्यात २ जणांचा मृत्यू झाला. काळ्या समुद्रकिनाऱ्यावरील ओडेसा या बंदर शहरावरही शनिवारी रात्रीपासून हल्ले सुरू होते. ओडेसाचे गव्हर्नर ओलेह किपर यांच्या माहितीनुसार, निवासी उंच इमारतींचे वरचे मजले उद्ध्वस्त झाले असून ४० नागरिक जखमी झाले, त्यांना तातडीने रुग्णालयात दाखल करण्यात आले.

रशियन नियंत्रणाखालील पूर्व डोनेत्स्क भागात युक्रेनच्या ड्रोन हल्ल्यात ३ जण मारले गेल्याचा दावा रशियन बाजूकडून करण्यात आला आहे. युक्रेनच्या सीमेजवळ रशियन ड्रोनचा धोका निर्माण झाल्यानंतर मोल्दोव्हाने खबरदारीचा उपाय म्हणून आपली संपूर्ण हवाई हद्द आणि ७ प्रमुख सीमा तपासणी नाके सुमारे एका तासासाठी बंद केली होती. रशियाच्या या ५०० ड्रोन हल्ल्यामुळे युक्रेनमधील परिस्थिती चिंताजनक बनली असून आंतरराष्ट्रीय स्तरावर या हल्ल्याचा निषेध केला जात आहे.