BMW इंडियाच्या कार पुन्हा महागणार; रुपयाच्या घसरणीचा ग्राहकांना मोठा फटका

BMW इंडिया भारतीय ग्राहकांना आणखी एक धक्का देण्याच्या तयारीत आहे. रुपयाची सतत होणारी घसरण आणि कमोडिटीचा वाढता खर्च यामुळे कंपनी आपल्या संपूर्ण गाड्यांच्या पोर्टफोलिओच्या किमती पुन्हा वाढवणार आहे. 2026 सालातली ही कंपनीची चौथी किंमतवाढ असणार आहे. म्हणजेच या वर्षभरात चौथ्यांदा ग्राहकांना जास्तीचे पैसे मोजावे लागणार आहेत.

BMW ग्रुप इंडियाचे अध्यक्ष आणि सीईओ हरदीप सिंह ब्रार यांनी सांगितलं की परकीय चलनातल्या बदलांचा कंपनीच्या मार्जिनवर मोठा परिणाम झालाय. 2026 मध्ये आतापर्यंत BMW आणि मिनी गाड्यांच्या किमतीत एकूण 4 ते 5 टक्क्यांपर्यंत वाढ झालेली आहे. आता आणखी एक किंमतवाढ करायची का, यावर विचार सुरू असून ती पुढच्या महिन्यात लागू होण्याची शक्यता आहे. म्हणजे सध्या जरी अंतिम निर्णय झालेला नसला, तरी लवकरच याबाबत स्पष्टता येईल असं दिसतंय.

ब्रार यांच्या म्हणण्यानुसार, गेल्या वर्षी जानेवारीपासून रुपयाच्या तुलनेत संबंधित परकीय चलनाची स्थिती जवळपास 18 टक्क्यांनी प्रतिकूल झालेली आहे. याचा परिणाम म्हणून आयात केलेल्या गाड्यांची किंमत आणि कंपनीचा खर्च वाढतोय. यात कमोडिटीच्या वाढत्या किमतींचीही भर पडतेय. त्यामुळे आगामी किंमतवाढीचा थेट फटका ग्राहकांच्या खरेदी बजेटला बसू शकतो. गेल्या दीड वर्षभरात चलनातल्या या बदलांमुळे कंपनीला सतत किमतीत बदल करावे लागत असल्याचं यातून स्पष्ट होतं.

दरम्यान कंपनीने भारतात नवीन BMW 7 सीरिजही लाँच केलीये. या फ्लॅगशिप सेडानमध्ये पेट्रोल तसंच पूर्ण इलेक्ट्रिक असे दोन्ही ऑप्शन उपलब्ध आहेत. नवीन BMW i7 चं उत्पादन चेन्नईतल्या BMW ग्रुपच्या प्लांटमध्ये स्थानिक पातळीवर होणार आहे. यामुळे जर्मनीनंतर भारत हा i7 चं स्थानिक उत्पादन करणारा दुसरा देश ठरलाय. म्हणजे जर्मनीबाहेर ही गाडी तयार होणारा भारत हा पहिलाच देश ठरतो.

नव्या 7 सीरिजसाठी BMW इंडियाच्या डीलरशिपवर बुकिंग सुरू झालीये आणि डिलिव्हरी ऑक्टोबर 2026 पासून सुरू होणार आहे. BMW 740 M Sport आणि BMW i7 eDrive 50 xDrive M Sport या दोन्ही मॉडेल्सची एक्स-शोरूम किंमत प्रत्येकी 1.95 कोटी रुपये आहे, तर BMW i7 M70 xDrive ची किंमत 2.65 कोटी रुपये आहे. मात्र येणाऱ्या किंमतवाढीमुळे या मॉडेल्ससोबतच इतर गाड्यांच्याही किमती आणखी वाढू शकतात, त्यामुळे नवी गाडी घ्यायचा विचार करणाऱ्या ग्राहकांना याचा फटका बसू शकतो.