आदरणीय पी. डी. पाटील यांनी शेतकऱ्यांच्या जीवनात आर्थिक परिवर्तन घडवले - बाळासाहेब पाटील

मसूर येथे पी. डी. पाटील साहेब सहकारी पाणीपुरवठा संस्थेची वार्षिक सर्वसाधारण सभा मोठ्या उत्साहात पार पडली. या सभेत बोलताना माजी मंत्री बाळासाहेब पाटील यांनी आदरणीय स्व. पी. डी. पाटील यांच्या कामाचा गौरवपूर्ण उल्लेख केला. संस्थेची स्थापना करून पी. डी. पाटील यांनी शेतकऱ्यांच्या आयुष्यात मोठे आर्थिक परिवर्तन घडवून आणले, असे बाळासाहेब पाटील यांनी सांगितले. सभेच्या कार्यक्रम पत्रिकेवर असलेल्या सगळ्या विषयांवर सविस्तर चर्चा झाली आणि खेळीमेळीच्या वातावरणात सर्व विषय उपस्थितांनी सर्वानुमते मंजूर केले.

बाळासाहेब पाटील यांनी आपल्या भाषणात कराड आणि वाखाण शिवाराच्या सर्वांगीण विकासाचा उल्लेख केला. संस्थेच्या कार्यालयीन इमारतीतील हॉलचा वापर सभासद शेतकरी आणि परिसरातील नागरिक आपापल्या धार्मिक, सांस्कृतिक तसेच घरगुती कार्यक्रमांसाठी नियमितपणे करत असल्याचे त्यांनी सांगितले. शासनाच्या विविध आरोग्यविषयक मोफत उपक्रमांसाठीही इमारतीतील हा हॉल संस्थेने विनामूल्य उपलब्ध करून दिला आहे, याकडेही त्यांनी लक्ष वेधले. निवडणूक आयोगाच्या SIR योजनेसह इतर योजनांच्या अंमलबजावणीसाठी शासनाने वेळोवेळी याच इमारतीतील हॉलचा वापर केला असल्याबद्दल त्यांनी समाधान व्यक्त केले. यासोबतच कार्यालयीन इमारतीची देखभाल-दुरुस्ती वेळच्या वेळी करावी, अशी सूचनाही त्यांनी संस्थेच्या पदाधिकाऱ्यांना केली.

कराड नगरपालिकेच्या हद्दवाढीत कराड वाकाण शिवाराचा समावेश झाल्याने संस्थेचे कार्यक्षेत्र कमी होत असल्याचे माजी मंत्री पाटील यांनी या सभेत नमूद केले. यामुळे सभासद शेतकरी आणि संस्थेसमोर उभ्या राहणाऱ्या विविध अडचणी व प्रश्नांवर सर्वांनी एकत्र बसून विचारविनिमय करत मार्ग काढावा, अशी सूचना त्यांनी उपस्थितांना केली. संस्थेचे चेअरमन प्रकाश पाटील यांनी संस्थेच्या वर्षभरातील कामकाजाचा सविस्तर आढावा सभेसमोर मांडला. संस्थेचे सेक्रेटरी रामचंद्र पानवळ यांनी सभेची नोटीस वाचून दाखवली, तर संस्थेचे व्हाईस चेअरमन राजेंद्र माने यांनी उपस्थित सर्वांचे आभार मानले.

या सभेला माजी नगरसेवक बाबासो भोसले, माजी संचालक शिवाजी कदम, बाळासाहेब पाटील (जाधव) उपस्थित होते. तसेच ज्योतिर्लिंग विकास सोसायटीचे मार्गदर्शक अरुण पाटील, चेअरमन जयंत पाटील आणि संचालक, कराड विविध कार्यकारी सोसायटीचे संचालक, संजीवनी नागरी सहकारी पतसंस्था आणि कृष्णाई सहकारी दूध व्यावसायिक संस्थेचे संचालक, विविध संस्थांचे पदाधिकारी, सह्याद्री सहकारी साखर कारखान्याच्या इरिगेशन विभागाचे इंजिनिअर संजय क्षीरसागर, आर. जी. तांबे यांच्यासह संस्थेचे सभासद आणि परिसरातील शेतकरी मोठ्या संख्येने या वार्षिक सर्वसाधारण सभेला उपस्थित होते.