जावा 42 चे नवे ऑल स्टार्स व्हर्जन लाँच, किंमत सुरु 1,79,942 रुपयांपासून

सणासुदीच्या तोंडावर बाईक प्रेमींसाठी एक मोठी बातमी समोर आली आहे. जावा येझदी मोटारसायकल्स या कंपनीने नवी जावा 42 सादर केली आहे. या लाँचसोबतच कंपनीने आपला जावा ऑल स्टार्स हा अध्याय पूर्ण केला असून, भारतात मॉडर्न क्लासिक श्रेणीची सुरुवात करणाऱ्या या मोटारसायकलचे आतापर्यंतचे सर्वात मोठे अपडेट आणले आहे.

नव्या ऑल स्टार्स जावा 42 मध्ये आता नवा रुबाब आणि प्रमाणशीर बांधा दिला गेला आहे. मागचा भाग आकर्षक बनवण्यात आला असून, अलॉय व्हील्स, साईड पॅनेल आणि वरच्या बाजूला झुकलेल्या एक्झॉस्टमुळे गाडी अधिक ठळक, स्पोर्टी आणि बळकट दिसते. बसण्याची रचना इतकी आरामदायी ठेवली आहे की शहरात आणि हायवेवर गाडी चालवणे सोपे जाईल. शक्तिशाली जे-पँथर इंजिनवर बेतलेल्या या गाडीत जावाची मूळ ओळख असणारे डिझाइन कायम ठेवले आहे.

ऑल स्टार्सची ही कल्पना मुळात जावा रायडरपासून सुरू झाली, असे कंपनीचे म्हणणे आहे. जावा रायडर हा आत्मविश्वासाने आणि स्वतःच्या मर्जीने जगणारा असतो, पण त्याचवेळी त्याला संरक्षण क्षेत्रापासून खेळांपर्यंत विविध क्षेत्रांतील माणसांसोबत एक नाते जाणवते, जिथे अनुशासन, विश्वास, बंधुभाव आणि माणसाबद्दलचा आदर एका मोठ्या उद्देशाशी जोडलेला असतो. जावा ऑल स्टार्स रेंज या समान संहितेला आपल्या खास चिन्हाच्या माध्यमातून एकत्र आणते. ऑल स्टार्स कुटुंबातील प्रत्येक मोटारसायकल जावाची ओळख वेगळ्या पद्धतीने मांडते, तरी त्या सगळ्या एकाच ऑल स्टार्स संहितेने बांधलेल्या आहेत. यातील पहिली गाडी म्हणजे जावा 42 एफजे, जिने ब्रँडच्या मॉडर्न क्लासिक ओळखीला आधुनिक आणि स्पोर्टी रूप दिले. दुसऱ्या टप्प्यात आनंद महिंद्रा यांनी ग्लोबल चेस लीगमध्ये ऑल स्टार्स 42 बॉबर या गाडीचे अनावरण केले होते, जिने जावाच्या वेगळ्या मोटारसायकल प्रकारातून स्वतःची ओळख साजरी केली. आणि आता तिसऱ्या टप्प्यात कंपनीची फ्लॅगशिप गाडी आली आहे - 60 हून अधिक सुधारणा करून तयार केलेली ही नवी जावा 42.

2018 साली जावा 42 ने भारतातील पहिली मॉडर्न क्लासिक रेंज सादर करत, वेगळे ऑफ-सेंटर इन्स्ट्रुमेंट पॅनेल आणि नवनवीन रंगांच्या पर्यायांसह कंपनीच्या आधुनिक प्रवासाला सुरुवात केली होती. आता ऑल स्टार्स 42 या नावाने आलेली ही फ्लॅगशिप जावा भारतातील नव्या पिढीच्या रायडर्ससाठी मोठ्या प्रमाणात विकसित करण्यात आली आहे.

क्लासिक लिजेंड्सचे सह-संस्थापक अनुपम थरेजा यांनी सांगितले की, सर्वात मनोरंजक समुदाय हे अशा माणसांमधून तयार होतात जे समोर कुणी नसतानाही स्वतःचे वागणे एका ठराविक पद्धतीने ठेवतात. जावा रायडरबद्दल आम्हाला हेच जाणवले आहे, असे ते म्हणाले. कॅरेक्टर, आचार आणि धैर्याची ही संहिता संरक्षण क्षेत्रापासून खेळांपर्यंत वेगवेगळ्या ठिकाणी दिसते, असेही त्यांनी नमूद केले. रायडर्सच्या गरजांनुसार नवे मॉडेल आणून, वेगळी डिझाइन असलेल्या गाड्या तयार करून आणि रोज या संहितेनुसार जगणाऱ्या लोकांचा सन्मान करून कंपनी हा वारसा पुढे नेत असल्याचे थरेजा यांनी सांगितले. जावा 42 मुळेच भारतात मॉडर्न क्लासिक श्रेणीची सुरुवात झाली होती आणि ऑल स्टार्स 42 हाच विचार पुढे नेत आहे, जुनी ओळख सोडून नाही तर आजच्या रायडरसाठी तिचा अर्थ नव्याने मांडून, असे त्यांनी स्पष्ट केले.

डिझाइनबद्दल बोलायचे झाल्यास, जावा ऑल स्टार्स 42 रस्त्यावर अधिक उठून दिसावी यासाठी तिला रुंद आणि बळकट लूक देण्यात आला आहे. मागचा भाग मोठ्या प्रमाणात बदलण्यात आला असून, रुंद रिअर फेंडर आणि नवा 150/70-17 आकाराचा मागचा टायर देण्यात आला आहे, ज्यामुळे गाडीची पकड आणखी भक्कम झाली आहे. जुन्या जावा 42 ची ओळख असणारी सपाट, बाकासारखी सीटची रचना कायम ठेवत, 790 मिमी उंचीची सीट आता उत्तम कुशनिंगसह नव्या स्वरूपात दिली आहे.

गाडीला नवा आणि आधुनिक अलॉय व्हील डिझाइन मिळाला असून, पाण्यातून सहज जाता यावे यासाठी अधिक कॉम्पॅक्ट अशा वरच्या बाजूला झुकलेल्या एक्झॉस्टचा वापर केला आहे. नवे साईड पॅनेल्स, फूटपेग्स आणि मागचा भाग यामुळे गाडीला मजबूत, स्पोर्टी आणि रुबाबदार लूक मिळाला आहे. या मॉडेलमध्ये 294.72 सीसी क्षमतेचे सिंगल-सिलिंडर, फोर-स्ट्रोक, लिक्विड-कुल्ड डीओएचसी इंजिन देण्यात आले आहे, ज्याला सिक्स-स्पीड कॉन्स्टंट-मेश गिअरबॉक्सची जोड दिली आहे. ब्रेकिंगसाठी ड्युअल-चॅनेल एबीएससह 280 मिमी आकाराचा पुढचा आणि 240 मिमी आकाराचा मागचा डिस्क ब्रेक देण्यात आला आहे.

केवळ दिसण्यातच नाही तर इंजिनिअरिंगच्या पातळीवरही या गाडीत बदल करण्यात आले आहेत. गाडी हाताळायला अजूनही सोपी राहावी, पण त्याचवेळी ती अधिक चपळ आणि नियंत्रणात राहावी यासाठी वजन, फ्रेम, स्विंगआर्मची मजबुती, बसण्याची रचना, हाताळणी आणि आराम या सगळ्या बाबींवर काम करण्यात आले आहे. यातही जावाची मूळ ओळख स्पष्टपणे टिकवून ठेवली गेली आहे. जुन्या जावा लूकची आठवण करून देणारी 13.2 लीटर क्षमतेची खास टँक, गोल हेडलॅम्प आणि वैशिष्ट्यपूर्ण बेंच सीट तशीच पुढे ठेवण्यात आली आहे.

हे संतुलन ऑल स्टार्स तत्त्वज्ञानाचा पाया आहे. यातील 42 बॉबर स्वतःची वेगळी ओळख जपणारा विचार मांडतो, तर 42 एफजे निओ-क्लासिक जावाला अधिक आधुनिक आणि स्पोर्टी रूप देतो. नवी 42 ही फ्लॅगशिप गाडी 42 च्या या विकासप्रवासाला पुढे नेते आणि या तीनही रूपांना ऑल स्टार्सच्या एकाच ओळखीखाली एकत्र आणते. नव्या जावा 42 ची किंमत 1,79,942 रुपयांपासून सुरू होते आणि ती देशभरातील जावा येझदी डीलरशिपवर सहा वेगवेगळ्या आकर्षक रंगांमध्ये उपलब्ध असणार आहे.