फरार इंडियन मुजाहिदीन दहशतवाद्याच्या मुलीला मुंब्य्रातून एटीएसने ताब्यात घेतले

ठाणे जिल्ह्यातील मुंब्रा भागात महाराष्ट्र दहशतवाद विरोधी पथकाने (एटीएस) मोठी कारवाई करत एका २१ वर्षीय तरुणीला ताब्यात घेतले आहे. ही तरुणी म्हणजे नमिरा तारीक खान, जी फरार असलेल्या इंडियन मुजाहिदीनशी संबंधित दहशतवादी तारीक खान याची मुलगी आहे. या कारवाईनंतर तपास यंत्रणांच्या हालचालींना वेग आला असून नमिराच्या परदेश दौऱ्यांसह बनावट पासपोर्ट प्रकरणाचा तपास सध्या सुरू आहे.

तपास यंत्रणांना संशय आहे की नमिराने खोटी माहिती देऊन पासपोर्ट मिळवला. कुर्ला आणि लखनऊ इथले पत्ते वापरून हा पासपोर्ट काढण्यात आला होता, आणि याच पासपोर्टच्या आधारे तिने दोन वेळा सौदी अरेबियाला प्रवास केल्याचे समोर आले आहे. या दोन्ही दौऱ्यांदरम्यान ती फरार असलेल्या आपल्या वडिलांना भेटली असावी, असा तपास यंत्रणांचा अंदाज आहे. सोबतच ती पाकिस्तानातही गेली होती का, याचीही चौकशी सुरू आहे. तिचे प्रवासाचे कागदपत्र, पासपोर्ट आणि इतर बाबी तपासात घेतल्या जात आहेत.

याचबरोबर तारीक खानची पत्नी आणि नमिराची आई शबनम उर्फ फिर्दोष तारीक खान हिचाही एटीएस शोध घेत आहे. शबनम सध्या फरार असल्याचे सांगितले जाते. तपासात असे समोर आले की नमिरा आणि तिची आई काही दिवस मुंब्रा परिसरातच राहत होत्या. याच माहितीच्या आधारे एटीएसने नमिरावर कारवाई करून तिला ताब्यात घेतले. तारीक खानविरुद्ध सिमी, इंडियन मुजाहिदीन, बनावट नोटा, दहशतवादी कारवाया आणि देशविरोधी कृत्यांसारखे गंभीर गुन्हे दाखल आहेत आणि तो गेल्या अनेक वर्षांपासून पोलिसांना गुंगारा देत फरार आहे.

तारीक खानचे पूर्ण नाव मोहम्मद तारीक अंजुमन हसन असे असून तो मूळचा बिहारचा रहिवासी आहे आणि व्यवसायाने सिव्हिल इंजिनिअर आहे. १९९८ पासून तो प्रतिबंधित संघटना सिमीमध्ये सक्रिय होता, असे तपास यंत्रणांचे म्हणणे आहे. २००३ साली रियाज भटकल आणि इक्बाल भटकल यांच्यासोबत इंडियन मुजाहिदीन या संघटनेच्या स्थापनेतही त्याचा सहभाग होता, आणि तो या संघटनेचा संस्थापक सदस्य व वैचारिक मार्गदर्शक होता, असेही तपासात समोर आले होते. २००७ च्या सुमारास पुण्यातील कोंढवा भागात इंडियन मुजाहिदीनशी संबंधित काही तरुणांना आश्रय आणि मदत दिल्याच्या प्रकरणातही त्याचे नाव आले होते. आता नमिराच्या अटकेनंतर तिच्या परदेश दौऱ्यांचा नेमका हेतू, बनावट पासपोर्टचा वापर आणि फरार वडिलांशी असलेले तिचे संबंध याबाबत एटीएस तपास करत आहे, तसेच तिच्या आईचाही शोध सुरू आहे.

सिमी म्हणजे स्टुडंट्स इस्लामिक मूव्हमेंट ऑफ इंडिया ही संघटना, जिची स्थापना १९७७ साली अलीगडमध्ये झाली होती. सुरुवातीच्या काळात मुस्लिम तरुणांमध्ये धार्मिक आणि सामाजिक जागृती करणे हा या संघटनेचा उद्देश होता. मात्र नंतरच्या काळात या संघटनेवर कट्टरतावादी विचारसरणी आणि दहशतवादी कारवायांशी संबंध असल्याचे गंभीर आरोप झाले, आणि केंद्र सरकारने २००१ मध्ये सिमीवर बंदी घातली. तपास यंत्रणांच्या माहितीनुसार सिमीशी संबंधित काही माजी सदस्य पुढे जाऊन इंडियन मुजाहिदीनशी जोडले गेले, तरी सिमी आणि इंडियन मुजाहिदीन या दोन्ही वेगळ्या संघटना आहेत.