बंगालमध्ये तृणमूलमध्ये फूट, पोटनिवडणुकीत काँग्रेस-डावी आघाडी वेगळी लढणार

पश्चिम बंगालमध्ये होणाऱ्या पोटनिवडणुकीत काँग्रेस आणि तृणमूल काँग्रेस हे दोन पक्ष एकमेकांविरोधात उभे राहणार आहेत. विशेष म्हणजे राष्ट्रीय पातळीवर हे दोन्ही पक्ष इंडिया आघाडीचा भाग असून एकत्र आहेत. मात्र मागील सार्वत्रिक विधानसभा निवडणुकीतही या दोन्ही पक्षांनी स्वतंत्रपणे निवडणूक लढवली होती. त्यावेळी काँग्रेसने डाव्या पक्षांशी आघाडी केली होती, तर तृणमूलने स्वबळावर मैदानात उतरून निवडणूक लढवली होती.

या पोटनिवडणुकीबाबत तृणमूलने अजून आपली भूमिका जाहीर केलेली नाही. पक्षाने अद्याप उमेदवारांची नावेही स्पष्ट केलेली नाहीत. तरीही राजकीय वर्तुळात असं मानलं जातंय की तृणमूल दोन्ही जागांवर आपले उमेदवार नक्की उभे करणार. दुसरीकडे काँग्रेसने मात्र आधीच दोन जागांसाठी आपले उमेदवार जाहीर करून टाकले आहेत. यावरून एक गोष्ट स्पष्ट होते, ती म्हणजे सार्वत्रिक निवडणुकीत जसं घडलं तसंच यावेळीही काँग्रेस आणि तृणमूल स्वतंत्रपणे रिंगणात उतरणार आहेत. आपली संघटना मजबूत करण्याच्या मुद्द्यावर काँग्रेस कोणतीही तडजोड करायला तयार नाही, असं दिसतंय.

बंगालमध्ये तृणमूल काही काळापासून काँग्रेसच्या जवळ जाण्याचा सतत प्रयत्न करत आहे. काँग्रेस नेते राहुल गांधी अनेकदा तृणमूलसोबत उभे राहिलेले दिसले आहेत. संसदेपासून रस्त्यांवरच्या आंदोलनांपर्यंत दोन्ही पक्षांमधली जवळीक वाढलेली दिसते. पण प्रत्यक्ष निवडणुकीच्या मैदानात मात्र दोघांचे रस्ते वेगळे राहतात, हे या पोटनिवडणुकीतूनही पुन्हा एकदा समोर आलं आहे.

ही पोटनिवडणूक अशा वेळी होते आहे जेव्हा तृणमूल पक्षातच दोन गटांमध्ये फूट पडल्याचं चित्र आहे. पक्षाचं नाव आणि 'घास-फूल' या निवडणूक चिन्हावरील दाव्यासंदर्भात निवडणूक आयोगासमोर सुनावणी सुरू आहे. या अंतर्गत फुटीचा फायदा काँग्रेस-डावी आघाडी उठवू पाहत आहे, अशी चर्चा राजकीय वर्तुळात रंगते आहे. नंदीग्राम हा मतदारसंघ २०२१ पासून भाजपचा बालेकिल्ला राहिला असल्याने तिथे भाजपची पकड मजबूत आहे. मात्र रेजीनगरमधली लढत काँग्रेस-डावी आघाडी, भाजप आणि तृणमूल अशी तिरंगी आणि अधिक चुरशीची होण्याची शक्यता आहे.

या दोन्ही जागा रिकाम्या होण्यामागे दोन वेगवेगळे राजीनामे कारणीभूत आहेत. भाजप नेते सुवेंदू अधिकारी यांच्या राजीनाम्यामुळे नंदीग्रामची जागा रिक्त झाली. विधानसभा निवडणुकीत अधिकारी यांनी नंदीग्राम आणि भवानीपूर या दोन्ही जागांवरून निवडणूक लढवली होती आणि दोन्हीकडे विजय मिळवला होता. भवानीपूरमध्ये त्यांनी तृणमूलच्या सर्वेसर्वा ममता बॅनर्जी यांचा १५,००० हून अधिक मतांनी पराभव केला होता. त्यामुळे त्यांनी भवानीपूरची जागा स्वतःकडे ठेवली आणि नंदीग्रामच्या जागेचा राजीनामा दिला.

दुसरीकडे रेजीनगरची जागा आम जनता उन्नयन पक्षाचे संस्थापक हुमायून कबीर यांच्या राजीनाम्यामुळे रिक्त झाली आहे. कबीर यांनी रेजीनगर आणि नवदा या दोन्ही जागा जिंकल्या होत्या, आणि नंतर त्यांनी नवदाची जागा कायम ठेवत रेजीनगरच्या जागेचा राजीनामा दिला.