पळसदरी-खोपोली मार्गावर दोन महिने रात्रीचा ब्लॉक, गुरुवार ते शनिवार लोकल सेवा बंद

रेल्वे रुळांवरील स्लॅबचे नूतनीकरण आणि इतर तांत्रिक कामे मार्गी लावण्यासाठी मध्य रेल्वे प्रशासनाने पळसदरी ते खोपोली या पट्ट्यात मोठा निर्णय घेतला आहे. या मार्गावर पुढील दोन महिन्यांसाठी विशेष ट्रॅफिक आणि पॉवर ब्लॉक घेतला जाणार असून, त्यामुळे रात्रीच्या आणि पहाटेच्या वेळी प्रवास करणाऱ्या लोकल प्रवाशांना काही काळ अडचणींना सामोरे जावे लागू शकते.

मिळालेल्या माहितीनुसार, हा विशेष ब्लॉक 18 सप्टेंबरपासून सुरू होऊन पुढचे दोन महिने चालणार आहे. दर आठवड्यात गुरुवार, शुक्रवार आणि शनिवार या तीन दिवशी मध्यरात्रीनंतर पहाटे 1.30 ते 4.30 या तीन तासांच्या कालावधीत हा ब्लॉक घेतला जाईल. या वेळेत पळसदरी आणि खोपोलीदरम्यानची सर्व लोकल सेवा पूर्णपणे बंद राहणार आहे. मध्य रेल्वेने याबाबत माहिती देताना सांगितले की, TSR म्हणजेच ट्रॅक रिन्यूअलच्या कामासाठी 18/19 सप्टेंबर 2026 (शुक्रवार/शनिवार) रात्रीपासून सुरू होणाऱ्या कालावधीत दर आठवड्याला गुरुवारी, शुक्रवारी आणि शनिवारी पहाटे 1.30 ते 4.30 वाजेपर्यंत हा विशेष ट्रॅफिक व पॉवर ब्लॉक घेतला जाणार आहे.

या ब्लॉकचा थेट परिणाम कर्जत आणि खोपोलीदरम्यान धावणाऱ्या उपनगरीय लोकल सेवेवर होणार असून, अनेक फेऱ्या पूर्णपणे किंवा अंशतः रद्द करण्यात आल्या आहेत. खोपोलीहून मध्यरात्री 12.30 वाजता सुटणारी खोपोली-कर्जत लोकल पूर्णपणे रद्द करण्यात आली आहे. तर छत्रपती शिवाजी महाराज टर्मिनसवरून (CSMT) रात्री 11.18 वाजता सुटणारी सीएसएमटी-खोपोली लोकल आता फक्त कर्जत स्थानकापर्यंतच धावेल; कर्जत ते खोपोलीदरम्यान ही सेवा उपलब्ध नसेल.

ब्लॉक सुरू होण्यापूर्वीची शेवटची लोकल कोणती, हे जाणून घेणेही प्रवाशांसाठी महत्त्वाचे आहे. खोपोलीच्या दिशेने जाणारी शेवटची लोकल छत्रपती शिवाजी महाराज टर्मिनसवरून रात्री 10.57 वाजता सुटेल. तर कर्जतच्या दिशेने जाणारी शेवटची लोकल खोपोलीहून रात्री 11.20 वाजता सुटून कर्जतकडे रवाना होईल.

ब्लॉक संपल्यानंतर सेवा पुन्हा कधी सुरू होईल, याचेही वेळापत्रक जाहीर करण्यात आले आहे. ब्लॉक संपल्यावर कर्जतहून पहाटे 5.43 वाजता पहिली लोकल खोपोलीकडे रवाना होईल. तर खोपोलीहून सुटणारी पहिली लोकल पहाटे 4.50 वाजता छत्रपती शिवाजी महाराज टर्मिनसच्या दिशेने निघेल.

पुढील दोन महिने दर गुरुवार, शुक्रवार आणि शनिवारी मध्यरात्री पळसदरी-खोपोली मार्गावर प्रवास करणाऱ्या चाकरमान्यांनी आणि नागरिकांनी आपले वेळापत्रक रेल्वेच्या या नव्या बदलांनुसार आखावे, जेणेकरून ऐनवेळी होणारी गैरसोय टाळता येईल, असे आवाहन करण्यात आले आहे.