पाकिस्तानात १० वीच्या परीक्षेत शीख तरुण चमकला, भारताच्या SGPC कडून ५१ हजारांचे बक्षीस
पाकिस्तानच्या पंजाब प्रांतात राहणाऱ्या ओंकार सिंह या शीख विद्यार्थ्याने मॅट्रिक म्हणजेच इयत्ता १० वीच्या परीक्षेत उत्तम कामगिरी करून आपल्या समुदायाचे नाव उंचावले आहे. लाहोर बोर्ड ऑफ इंटरमीडिएट अँड सेकंडरी एज्युकेशनच्या वार्षिक मॅट्रिक परीक्षेत ओंकारने दुसरा क्रमांक मिळवला. त्याच्या या कामगिरीची दखल भारतातील शिरोमणी गुरुद्वारा प्रबंधक समितीने (SGPC) घेतली असून त्याला ५१,००० रुपयांचे रोख बक्षीस देऊन सन्मानित करण्याचा निर्णय समितीने घेतला आहे.
ओंकार सिंहची अभ्यासातील ही कामगिरी काही आताची नाही. याआधी इयत्ता ९ वीच्या परीक्षेतही त्याने बोर्डात दुसरा क्रमांक मिळवला होता. त्या परीक्षेत त्याला सर्व विषयांत A+ ग्रेड मिळाला होता. इस्लामियात विषयात त्याला १०० पैकी ९८ गुण मिळाले, कुरआन भाषांतर विषयात ५० पैकी ४९ गुण मिळाले, इंग्रजीत ७५ पैकी पूर्ण ७५ गुण मिळाले, उर्दूत ७५ पैकी ७४ गुण मिळाले, फिजिक्स आणि केमिस्ट्रीत ६० पैकी पूर्ण ६० गुण मिळाले तर बायोलॉजीत ६० पैकी ५९ गुण मिळाले होते. याच सातत्याच्या जोरावर त्याने यंदाच्या १० वीच्या म्हणजेच मॅट्रिकच्या परीक्षेतही लाहोर बोर्डात दुसरा क्रमांक कायम राखला.
SGPC चे मुख्य सचिव कुलवंत सिंह मन्नन यांनी दिलेल्या माहितीनुसार, SGPC चे अध्यक्ष एडव्होकेट हरजिंदर सिंह धामी यांच्या सूचनेवरून ओंकार सिंहला ५१,००० रुपयांचे रोख बक्षीस देण्याचा निर्णय कार्यकारी समितीच्या बैठकीत घेण्यात आला. पाकिस्तानातील अल्पसंख्याक शीख समुदायातून येणाऱ्या ओंकारचे हे यश खूप मोलाचे असल्याचे मन्नन यांनी नमूद केले.
ओंकार सिंहचे वडील डॉ. मिमपाल सिंह हे पाकिस्तान शीख गुरुद्वारा प्रबंधक समितीचे (PSGPC) सदस्य असून ते वैद्यकीय आणि शैक्षणिक क्षेत्रात काम करतात. SGPC ने दिलेल्या माहितीनुसार, डॉ. मिमपाल सिंह हे पाकिस्तानचे पहिले शीख डॉक्टर म्हणून ओळखले जातात. वैद्यकीय आणि शैक्षणिक क्षेत्रातील त्यांच्या या उल्लेखनीय सेवेची दखल घेत पाकिस्तान सरकारने त्यांना तमगा-ए-इम्तियाज या नागरी पुरस्काराने सन्मानित केले आहे.
पाकिस्तानात अल्पसंख्याक समुदायातून येऊनही ओंकारने स्वतःच्या गुणवत्तेच्या जोरावर मिळवलेले हे यश संपूर्ण शीख समुदायासाठी अभिमानाची गोष्ट असल्याचे SGPC ने म्हटले आहे. वडिलांचा वैद्यकीय आणि शैक्षणिक क्षेत्रातील वारसा आणि मुलाची अभ्यासातील सातत्यपूर्ण कामगिरी अशा दोन्ही बाजूंनी हे कुटुंब पाकिस्तानातील शीख समुदायासाठी प्रेरणादायी ठरले आहे.
