महिला आशिया कप फायनल: भारत-श्रीलंका भिडणार, श्रीलंकेने पाकिस्तानला हरवत गाठली अंतिम फेरी

महिला आशिया कप २०२६ स्पर्धेतला दुसरा सेमीफायनल दुबई इंटरनॅशनल स्टेडियमवर पार पडला, ज्यात श्रीलंकेने पाकिस्तानला ४ विकेटने धूळ चारली. या विजयामुळे श्रीलंकेने फायनलमध्ये आपली जागा पक्की केली. भारताने आधीच बांगलादेशला हरवून फायनल गाठली होती, त्यामुळे आता विजेतेपदासाठी भारत आणि श्रीलंका हे दोन संघ आमनेसामने येणार आहेत. हा फायनल सामना १३ सप्टेंबरला दुबई इंटरनॅशनल स्टेडियमवरच खेळवला जाणार आहे.

सेमीफायनलमध्ये नाणेफेक हरल्यानंतर पाकिस्तानने आधी बॅटिंग करत २० षटकांत ५ विकेट गमावून १३० धावा केल्या. सुरुवात मात्र फारशी चांगली झाली नव्हती, कारण १७ व्या षटकापर्यंत टीमने ५ विकेट गमावून फक्त ९६ धावाच केल्या होत्या. यानंतर कॅप्टन फातिमा सनाने जबरदस्त फटकेबाजी करत ३६ चेंडूंत ४ चौकार आणि २ षटकारांसह ४७ धावांची खेळी उभारली. तिला टुबा हसनने चांगली साथ दिली, जी १२ धावांवर नाबाद राहिली. या दोघींनी सहाव्या विकेटसाठी शेवटच्या २४ चेंडूंत ३८ धावांची पार्टनरशिप करत टीमला सन्मानजनक स्कोअरपर्यंत नेलं. श्रीलंकेकडून कॅप्टन चमारी अथापट्टूने २ विकेट घेतल्या.

१३१ धावांचं टार्गेट चेस करायला उतरलेल्या श्रीलंकेची सुरुवात मात्र निराशाजनक झाली. दुसऱ्याच षटकात फातिमा सनाने सलग दोन चेंडूंवर कॅप्टन चमारी अटापट्टू आणि संजना कविंदी यांना बाद करत मोठा धक्का दिला. सहाव्या षटकापर्यंत श्रीलंकेचे ४ फलंदाज अवघ्या ३३ धावांत बाद झाले होते. पण यानंतर हर्षिता समरविक्रमा आणि कविशा दिलहरी यांनी डाव सावरला. हर्षिताने ३६ तर कविशाने ३३ धावा करत पाचव्या विकेटसाठी ६७ धावांची महत्त्वाची पार्टनरशिप केली, ज्यामुळे श्रीलंकेचा विजय जवळपास पक्का झाला होता. फातिमा सनाने या दोघींना बाद करत स्कोअर ६ बाद १०९ पर्यंत आणला, पण तोपर्यंत सामना पाकिस्तानच्या हातातून निसटला होता. नीलाक्षी सिल्वा १० चेंडूंत १८ धावांवर नाबाद राहिली. फातिमा सनाने पाकिस्तानकडून सर्वाधिक विकेट घेतल्या.

भारत आणि श्रीलंका यांच्यातला फायनल सामना दुबई इंटरनॅशनल क्रिकेट स्टेडियमवरच होणार आहे, कारण महिला आशिया कपचे सगळे सामने याच मैदानावर खेळवले गेले आहेत. १३ सप्टेंबरला भारतीय वेळेनुसार रात्री ८ वाजता सामना सुरू होईल, आणि त्याआधी अर्धा तास टॉस होईल. भारतात हा सामना सोनी स्पोर्ट्स नेटवर्कवर लाईव्ह दाखवला जाणार आहे, तसंच सोनी लिव्ह अॅप आणि वेबसाइटवरही लाईव्ह स्ट्रीमिंग उपलब्ध असेल.

टी-२० इंटरनॅशनलमध्ये श्रीलंकेविरुद्ध भारताचा रेकॉर्ड चांगला आहे. दोन्ही टीमनी आतापर्यंत ३१ सामने खेळले असून त्यापैकी भारताने २५ सामने जिंकले आहेत, तर ५ सामन्यांत भारताला पराभव पत्करावा लागला आहे. एक सामना रद्द झाला होता. त्यामुळे फायनलमध्येही भारताचं पारडं जड मानलं जातंय. महिला टी-२० आशिया कपमध्ये आतापर्यंत दोन्ही टीममध्ये ५ सामने झाले असून त्यातले ४ भारताने जिंकले आहेत, तर १ सामना श्रीलंकेने जिंकला आहे. मात्र २०२४ च्या आशिया कप फायनलमध्ये श्रीलंकेनेच भारताला हरवलं होतं, हे विसरून चालणार नाही.