भारत अ संघ जाहीर: पडिक्कल, गायकवाड कर्णधार; हार्दिक पांड्याचे कमबॅक फिटनेसवर अवलंबून

भारतीय क्रिकेट नियामक मंडळाने (BCCI) ऑस्ट्रेलिया अ संघाविरुद्ध खेळल्या जाणाऱ्या मालिकेसाठी भारत अ संघाची घोषणा केली आहे. या मालिकेत दोन चार दिवसीय सामने आणि तीन एकदिवसीय सामने खेळवले जाणार आहेत. दोन्ही फॉरमॅटसाठी वेगवेगळे कर्णधार नेमण्यात आले असून देवदत्त पडिक्कल चार दिवसीय सामन्यांची तर ऋतुराज गायकवाड एकदिवसीय मालिकेची धुरा सांभाळणार आहे.

चार दिवसीय संघाचे नेतृत्व देवदत्त पडिक्कलकडे देण्यात आले आहे, तर साई सुदर्शन उपकर्णधार असेल. दुखापतीमुळे श्रीलंकेविरुद्धच्या कसोटी मालिकेत खेळू न शकलेला सुदर्शन आता या मालिकेतून पुनरागमन करणार आहे. संघात अमन मोखाडे, आयुष पांडे आणि दुलीप ट्रॉफीमध्ये ईस्ट झोनकडून चमकदार कामगिरी करणारा कुमार कुशाग्र यांनाही स्थान मिळाले आहे. यश राठोड, शम्स मुलानी आणि तनुष कोटियन हे देखील चार दिवसीय संघात आहेत. विकेटकीपिंगची जबाबदारी एन. जगदीसनकडे असेल. वेगवान गोलंदाजी विभागात तुषार देशपांडे, अंशुल कंबोज आणि आयपीएल २०२६ मध्ये आपल्या गोलंदाजीने प्रभाव पाडलेला प्रफुल्ल हिंगे यांचा समावेश आहे.

एकदिवसीय संघाचे कर्णधारपद ऋतुराज गायकवाडकडे असेल, तर देवदत्त पडिक्कल उपकर्णधार म्हणून काम पाहील. हार्दिक पांड्याचाही या संघात समावेश करण्यात आला आहे, मात्र तो फिटनेस चाचणी यशस्वीपणे पार पाडेल तरच मालिकेत खेळू शकेल. साई सुदर्शन आणि प्रियांश आर्य यांनाही एकदिवसीय संघात संधी मिळाली आहे. मधल्या फळीची जबाबदारी रजत पाटीदार, कुमार कुशाग्र आणि नमन धीर यांच्यावर असेल, तर सध्या चांगल्या फॉर्मात असलेल्या प्रभसिमरन सिंगकडूनही चांगल्या कामगिरीची अपेक्षा असेल.

ही मालिका २२ सप्टेंबरपासून सुरू होणार आहे. पहिल्या चार दिवसीय सामन्यानंतर दुसरा बहुदिवसीय सामना २९ सप्टेंबरपासून खेळवला जाईल. यानंतर तीन सामन्यांची एकदिवसीय मालिका होणार आहे, जिचा पहिला सामना ६ ऑक्टोबरला, दुसरा ९ ऑक्टोबरला आणि तिसरा व अंतिम सामना ११ ऑक्टोबरला खेळवला जाईल.

चार दिवसीय सामन्यांसाठीचा भारत अ संघ असा आहे - अमन मोखाडे, आयुष पांडे, देवदत्त पडिक्कल (कर्णधार), साई सुदर्शन (उपकर्णधार), यश राठोड, शेख रशीद, कुमार कुशाग्र (विकेटकीपर), शम्स मुलानी, तनुष कोटियन, तुषार देशपांडे, अंशुल कंबोज, प्रफुल्ल हिंगे, एन. जगदीसन (विकेटकीपर), नचिकेत भुटे, व्ही वैश्य.

एकदिवसीय सामन्यांसाठीचा भारत अ संघ असा आहे - प्रियांश आर्य, साई सुदर्शन, देवदत्त पडिक्कल (उपकर्णधार), ऋतुराज गायकवाड (कर्णधार), रजत पाटीदार, कुमार कुशाग्र (विकेटकीपर), निशांत सिंधू, विपराज निगम, अर्शिन कुलकर्णी, अरशद खान, नमन धीर, हार्दिक पांड्या, प्रभसिमरन सिंग (विकेटकीपर), गुरजापनीत सिंग, यश ठाकूर.