नांदेडमध्ये जुन्या गाडीवरून वाद विकोपाला, तरुणावर चाकूहल्ला; आरोपीला २४ तासांत अटक

राज्यभरात गुन्हेगारीच्या घटनांमध्ये सातत्याने वाढ होत असून त्यामुळे सामान्य नागरिकांमध्ये भीतीचं वातावरण तयार होत आहे. याच पार्श्वभूमीवर नांदेड जिल्ह्यातून एक धक्कादायक घटना समोर आली आहे. वजीराबाद मार्केट भागातील नॉव्हेल्टी दुकानासमोर एका २० वर्षांच्या तरुणावर चाकूने जीवघेणा हल्ला करण्यात आला. या हल्ल्यामागचं कारण म्हणजे जुन्या गाडीवरून झालेला वाद. ही घटना १० सप्टेंबर रोजी घडली होती.

हल्ल्यात जखमी झालेल्या तरुणाचं नाव अक्षय लक्ष्मण डुबुकवाड (वय २०) असं आहे. तो नवीन हस्सापूर, भोई गल्ली, वाघी रोड, नांदेड इथला रहिवासी आहे. गंभीर जखमी अवस्थेत त्याला विष्णुपुरी इथल्या शासकीय रुग्णालयात दाखल करण्यात आलं असून सध्या त्याच्यावर उपचार सुरू आहेत.

या प्रकरणी वजीराबाद पोलीस स्टेशनमध्ये गुन्हा रजिस्टर क्रमांक ४६४/२०२६ अंतर्गत भारतीय न्याय संहितेच्या कलम १०९ (१) खाली गुन्हा दाखल करण्यात आला. वजीराबाद गुन्हे शोध पथकाने अतिशय वेगाने तपास करत घटनेच्या अवघ्या २४ तासांत आरोपीला अटक केली. आरोपीचं नाव कार्तिक भगवान भिसे (वय १८) असं असून तो पंचशीलनगर, खडकपुरा, नांदेड इथे राहतो.

आरोपीला अटक झाल्यानंतर न्यायालयासमोर हजर करण्यात आलं, तेव्हा न्यायालयाने त्याला १४ सप्टेंबर २०२६ पर्यंत तीन दिवसांची पोलीस कोठडी सुनावली आहे. या गुन्ह्याचा पुढील तपास सहाय्यक पोलीस निरीक्षक तुरनर हे करत आहेत.

दुसरीकडे, जामखेड तालुक्यातही भरदिवसा एक रक्तरंजित घटना घडली. खर्डा गावाजवळील जातेगाव फाट्यावर शुक्रवारी, ११ सप्टेंबर रोजी सकाळी सव्वानऊच्या सुमारास दूध वाहतूक करणाऱ्या चालकावर कोयत्याने प्राणघातक हल्ला झाला. गंभीर जखमी झालेल्या चालकाला उपचारासाठी नेत असतानाच त्याचा मृत्यू झाला. भरदिवसा झालेल्या या खुनामुळे परिसरात एकच खळबळ उडाली.

मृत व्यक्तीचं नाव तानाजी भास्कर बोराटे (वय ४०) असं असून तो माळेवाडी, तालुका भूम इथला रहिवासी होता. बोराटे हे माळेवाडी इथल्या कैलास धर्मा आल्हाट यांच्या पिकअप गाडीवर (एमएच १२ केपी ५६२६) चालक म्हणून काम करत होते. रोज संकलित दूध घेऊन खर्डा येथे आणण्याचं काम ते करत असत. शुक्रवारीही ते नेहमीप्रमाणे दूध घेऊन आले होते.

काही अनोळखी व्यक्तींनी त्यांना जातेगाव फाट्याजवळ बोलावून घेतल्याची माहिती समोर आली आहे. तिथेच बोराटे आणि संशयितांमध्ये काही कारणावरून वाद झाला. या वादादरम्यान मारहाण होत असताना एका व्यक्तीने बोराटे यांच्या मानेवर कोयत्याने वार केला, त्यामुळे ते रक्ताच्या थारोळ्यात कोसळले. हल्ला केल्यानंतर आरोपी घटनास्थळावरून पसार झाले. घटनेची माहिती मिळताच खर्डा पोलीस स्टेशनचे सहाय्यक पोलीस निरीक्षक उज्ज्वलसिंह राजपूत यांनी तात्काळ पथकं तयार करून आरोपींच्या शोधासाठी रवाना केली.