नागपूरच्या बॅरल कॅफेत आग, वादातून शेफनेच पेटवली, दोघांना अटक

नागपुरातल्या तरुणाईमध्ये लोकप्रिय असलेल्या अंबाझरीच्या गोकुळपेठ रोडवरच्या बॅरल कॅफे पबमध्ये मध्यरात्रीनंतर लागलेल्या आगीने अख्ख्या शहराला हादरवून सोडलं. रोज रात्री म्युझिक, दोस्त आणि पार्टीच्या गडबडीने गजबजलेली ही जागा पहाटे साधारण चार वाजता अचानक आगीच्या लोळांनी वेढली गेली. पण पोलिसांच्या तपासात एक वेगळंच चित्र समोर आलं आहे. या आगीमागे कुठलं मोठं कट-कारस्थान नव्हतं, तर पबमध्ये झालेल्या एका छोट्याशा वादातून निर्माण झालेला राग हे या घटनेमागचं खरं कारण होतं.

अंबाझरी पोलीस स्टेशनच्या हद्दीत येणाऱ्या गोकुळपेठ रोडवरील याच बॅरल कॅफे पबमधल्या या प्रकरणाचा छडा लावत पोलिसांनी दोन आरोपींना अटक केली आहे. पबमध्ये गुटखा घेऊन जाण्यास मज्जाव केल्यावरून आणि सर्व्हिसवरून झालेल्या वादानंतर आरोपींनी ही घटना घडवून आणल्याचं तपासात उघड झालं. सीसीटीव्ही फुटेज आणि गाडीच्या नंबरच्या आधारे पोलिसांनी मुख्य आरोपी मनमोहन उर्फ निखिल बुधसागर तिवारी (वय ३१, राहणार खामला) आणि त्याचा साथीदार शुभम श्रीकृष्णा विश्वकर्मा (वय २६, राहणार शास्त्रीनगर) यांना ताब्यात घेतलं.

तपासात एक धक्कादायक बाब पुढे आली, ती म्हणजे मुख्य आरोपी मनमोहन हा पेशाने एक चांगला शेफ असून त्याने आधी परदेशातल्या मोठमोठ्या हॉटेलांमध्ये काम केलं आहे. सध्या तो खामला भागात स्वतःचं रेस्टॉरंट चालवतो. दुसरा आरोपी शुभम हादेखील शहरातल्याच एका हॉटेलमध्ये शेफ म्हणून काम करतो. ५ सप्टेंबरच्या रात्री मनमोहन बॅरल कॅफे पबमध्ये गेला होता. पबच्या गेटवर चेकिंग करताना तिथल्या कर्मचाऱ्यांनी त्याच्याकडचा रजनीगंधा गुटखा आत नेण्यास अडवलं. यावरून एंट्री फीस, निकृष्ट सर्व्हिस आणि दारूच्या दर्जावरून मनमोहनची पबच्या स्टाफशी जोरदार बाचाबाची झाली.

या अपमानाने संतापलेला मनमोहन पबमधून बाहेर पडला आणि थेट शास्त्रीनगरला जाऊन आपला दोस्त शुभमला घेऊन आला. दोघांनी मिळून पबला धडा शिकवण्याचा बेत आखला. पहाटे साधारण चार वाजता ते बाइकवरून बॅरल कॅफेच्या बाहेर पोहोचले. आरोपींनी आपल्याच बाइकमधून पेट्रोल काढून पबच्या आत टाकलं, आग लावली आणि तिथून पळ काढला. आग इतक्या वेगाने पसरली की पबमधली एसी, महागडा सोफा आणि इतर फर्निचर पूर्णपणे जळून राख झालं. फायर ब्रिगेडने घटनास्थळी पोहोचून आगीवर नियंत्रण मिळवलं.

अंबाझरी पोलिसांनी घटनास्थळाच्या आजूबाजूला लावलेल्या सीसीटीव्ही कॅमेऱ्यांची तपासणी केली, ज्यात दोन्ही आरोपी आग लावल्यानंतर बाइकवरून पळून जाताना स्पष्ट दिसले. गाडीच्या नंबरच्या आधारे पोलिसांनी आरोपींची ओळख पटवून त्यांना अटक केली. या घटनेमुळे पब आणि रेस्टॉरंट परिसरातल्या सुरक्षा व्यवस्थेवर आणि छोट्याशा वादातून वाढत चाललेल्या हिंसक प्रवृत्तीवर गंभीर प्रश्न उपस्थित झाले आहेत.