Next-Gen Hyundai Creta चा लूक आला समोर! स्पाय शॉट्समधून दिसले नवीन डिझाइन
दक्षिण स्पेनमध्ये सुरू असलेल्या रोड टेस्टिंगदरम्यान नव्या क्रेटाचे स्पाय शॉट्स समोर आले असून यातून गाडीचा बाह्य आकार, फीचर्स आणि पॉवरट्रेनबद्दल संकेत मिळाले आहेत.
भारतीय ऑटोमोबाईल मार्केटमध्ये सतत आघाडीवर असलेल्या Hyundai Creta च्या पुढच्या जनरेशनची वाट पाहणाऱ्यांसाठी एक महत्त्वाची अपडेट आली आहे. दक्षिण स्पेनमधल्या कडक उन्हाळ्यात या SUV चे रोड टेस्टिंग सुरू असताना पुन्हा एकदा नवे स्पाय शॉट्स कॅमेऱ्यात कैद झाले आहेत. या टेस्टिंगच्या वेळी गाडीच्या मागे टोइंग डायनो लावलेला दिसला. टोइंग डायनो हे असं उपकरण असतं जे गाडीच्या मागे जोडून तिच्यावर सतत भार टाकला जातो. यावरून कंपनी गाडीची टोइंग क्षमता आणि सतत लोड असताना ती कशी परफॉर्म करते, याची कसून तपासणी करत असल्याचं समजतंय.
याआधीच्या टेस्टिंगमध्ये गाडीवर बॉक्सी कॅमुफ्लाज लावून संपूर्ण डिझाइन झाकलेलं होतं, म्हणजे गाडीचा नेमका आकार कोणालाही समजू नये यासाठी जाडजूड कव्हर वापरलं जात होतं. पण आता समोर आलेल्या फोटोंमध्ये ते जड कव्हर काढून फक्त पातळ कॅमुफ्लाज रॅप ठेवलेला दिसतो, त्यामुळे गाडीचा बाह्य आकार बऱ्याच अंशी स्पष्ट झाला आहे. ही नवी SUV ह्युंडाईच्या 'Art of Steel' या लेटेस्ट डिझाइन भाषेवर तयार केली जात आहे, ज्यात शार्प आणि अँगुलर लाईन्स प्रामुख्याने दिसतील. गाडीचा फ्रंट सरळ आणि बॉक्सी सिल्हूटचा असून त्यात H-आकाराचे टॉप-माउंटेड LED DRLs, LED प्रोजेक्टर हेडलॅम्प्स, नवी ग्रिल आणि स्लॅटेड एलिमेंट्ससह मेन बंपर दिला जाण्याची शक्यता आहे.
साईड प्रोफाइलमध्ये स्लोपिंग रूफलाईन, फ्लश डोअर हँडल्स, गोलाकार व्हील आर्च आणि स्पोर्टी ड्युअल-टोन मशीन अलॉय व्हील्स नजरेत भरतात. मागच्या बाजूला रूफ-माउंटेड स्पॉयलर, रेक्ड विंडशील्ड, फ्लॅट बूट लिड, मोठा बंपर आणि H-स्टाईलचे टेल लॅम्प्स मिळण्याची अपेक्षा आहे.
तंत्रज्ञानाच्या बाबतीतही नव्या Creta मध्ये मोठे बदल अपेक्षित आहेत. ही गाडी सॉफ्टवेअर डिफाईंड व्हेईकलमध्ये रूपांतरित केली जाणार आहे, म्हणजे गाडीच्या सॉफ्टवेअरवर आधारित अनेक कामं आता एका सिस्टीमद्वारे नियंत्रित होतील. यामुळे ओव्हर-द-एअर अपडेट्सद्वारे म्हणजे इंटरनेटच्या माध्यमातून वेळोवेळी नवीन फीचर्स आणि सुधारणा गाडीत जोडता येतील, गाडी सर्व्हिस सेंटरमध्ये न नेताच. यासोबतच Pleos Connect सिस्टीम मिळण्याची शक्यता आहे, ज्यामुळे सेंट्रल स्क्रीनवरूनच इन्फोटेनमेंट आणि इन्स्ट्रुमेंट क्लस्टरचे अनेक फंक्शन्स एकत्रितपणे ऑपरेट करता येतील.
पॉवरट्रेनबद्दल बोलायचं झालं तर नव्या Creta मध्ये स्ट्रॉन्ग हायब्रिड सिस्टीम दिली जाण्याची शक्यता आहे. जागतिक पातळीवर यात 1.6-लिटर नॅचरली एस्पिरेटेड GDI पेट्रोल इंजिन हायब्रिड सिस्टीमसह आधीच सादर करण्यात आलेलं आहे. मात्र भारतात ही SUV 1.5-लिटर नॅचरली एस्पिरेटेड पेट्रोल इंजिनवर आधारित स्ट्रॉन्ग हायब्रिड पॉवरट्रेनसह लाँच होऊ शकते, तर सध्याचे इंजिन पर्यायही कायम राहतील. ही बहुप्रतीक्षित कार या वर्षाच्या अखेरीस किंवा 2027 मध्ये लाँच होण्याची शक्यता आहे.
