अल्पवयीन मुलीच्या विनयभंगप्रकरणी मोठी अपडेट; आरोपीला न्यायालयाने सुनावली मोठी शिक्षा
गंगाखेड येथे बिस्कीट पुडा आणायला गेलेल्या अल्पवयीन मुलीला बळजबरीने पकडून विनयभंग केल्याप्रकरणी न्यायालयाने आरोपीला ३ वर्ष सश्रम कारावास व १० हजार रुपये दंडाची शिक्षा सुनावली आहे.
गंगाखेड येथील एका अल्पवयीन मुलीचा विनयभंग केल्याप्रकरणी आरोपीला न्यायालयाने ३ वर्ष सश्रम कारावास आणि १० हजार रुपये दंडाची शिक्षा सुनावली आहे. गंगाखेडचे अतिरिक्त जिल्हा व सत्र न्यायाधीश २ व्ही.एम. सुंदाळे यांच्या न्यायालयात हे प्रकरण चालले. बाल लैंगिक अत्याचार कायद्याअंतर्गत ११ सप्टेंबर रोजी ही शिक्षा सुनावण्यात आली.
मिळालेल्या माहितीनुसार, गंगाखेड पोलीस स्टेशन हद्दीत ही घटना घडली. दुकानातून बिस्कीट पुडा घेऊन घरी येत असलेल्या अल्पवयीन मुलीला आरोपीने रस्त्यातच बळजबरीने पकडले आणि तिला आपल्या घरात नेले. घरात नेऊन आरोपीने त्या मुलीचा विनयभंग केला. घरी परतल्यावर मुलीने घडलेला सगळा प्रकार आपल्या आईला सांगितला. मुलीच्या आईने ही बाब समजल्यानंतर लगेचच पोलिसांकडे धाव घेतली आणि ११ ऑगस्ट २०२५ रोजी तक्रार दिली. या तक्रारीवरून ओंकार उर्फ दाद्या गोपाळराव सकट या आरोपीविरुद्ध गंगाखेड पोलीस स्टेशनमध्ये बाल लैंगिक अत्याचार कायद्याअंतर्गत विनयभंगाचा गुन्हा दाखल करण्यात आला.
तक्रार दाखल झाल्यानंतर गंगाखेड पोलिसांनी या प्रकरणाचा तपास अतिशय वेगाने केला. तक्रार दाखल झाल्यापासून अवघ्या १५ दिवसांत तपास पूर्ण करून न्यायालयात दोषारोपपत्र दाखल करण्यात आले. सहाय्यक पोलीस निरीक्षक एस.के. इंगळे यांनी या प्रकरणाचा तपास केला आणि गंगाखेडच्या अतिरिक्त जिल्हा व सत्र न्यायालयात हे प्रकरण चालवले.
न्यायालयात सरकारी पक्षातर्फे एकूण ६ साक्षीदार तपासण्यात आले. यामध्ये पीडित मुलीची आई, तिच्या जन्म नोंदणीचा पुरावा आणि तपास अधिकारी यांच्या साक्षींचा समावेश होता. या सगळ्या पुराव्यांच्या आधारे बाल लैंगिक अत्याचार कायद्याअंतर्गत विनयभंगाचा गुन्हा सिद्ध झाला. गुन्हा सिद्ध झाल्यानंतर न्यायालयाने आरोपीला ३ वर्ष सश्रम कारावास व १० हजार रुपये दंडाची शिक्षा सुनावली.
या प्रकरणात जिल्हा सरकारी अभियोक्ता डी.यू. दराडे यांच्या मार्गदर्शनाखाली जिल्हा सहाय्यक सरकारी अभियोक्ता एस.बी. पौळ यांनी न्यायालयात बाजू मांडली, ज्यामुळे पीडितेला जलदगतीने न्याय मिळाला. या प्रकरणात सहाय्यक सरकारी अभियोक्ता एस.डी. वाकोडकर, तसेच गंगाखेड पोलीस स्टेशनचे कोर्ट पैरविकार महिला पोलीस शिपाई एस.एस. जिंकलवाड, जे.एच. पठाण, कोर्ट पैरवीकार एम.डी. कुंडगीर आणि महिला पोलीस हवालदार एल.व्हि. मुंडे यांनीही या प्रकरणात काम पाहिले.
