मिथुन चक्रवर्तींचं मढ आयलंडवरचं फार्महाऊस, २२ कुत्रे अन् कुटुंबासाठी वेगळी कॉटेज

बॉलिवूडचे ज्येष्ठ अभिनेते मिथुन चक्रवर्ती त्यांच्या अभिनयाइतकेच त्यांच्या राहणीमानामुळेही नेहमी चर्चेत असतात. पण एक काळ असाही होता जेव्हा त्यांना प्रचंड संघर्ष करावा लागला होता. फुटपाथवर झोपण्यापासून ते बॉलिवूडमधल्या स्टारडमपर्यंतचा त्यांचा प्रवास थक्क करणारा आहे. आज मिथुन चक्रवर्ती त्यांच्या पिढीतल्या लोकप्रिय कलाकारांमध्ये गणले जातात आणि देशभरात त्यांच्या अनेक मालमत्ता आहेत, त्यापैकी एक म्हणजे मुंबईतल्या मढ आयलंड भागातलं त्यांचं आलिशान फार्महाऊस.

मिथुन चक्रवर्तींचा मुलगा नमाशी चक्रवर्तीने 'पिंकविला'ला दिलेल्या मुलाखतीत या फार्महाऊसबद्दल अनेक खास गोष्टी सांगितल्या. नमाशीच्या सांगण्यानुसार, मिथुन चक्रवर्ती आणि त्यांची पत्नी योगिता बाली यांनी १९८५ साली, मोठा मुलगा मिमोह चक्रवर्तीच्या जन्मानंतर काही महिन्यांनी हा बंगला विकत घेतला होता. मुलाच्याच नावावरून त्यांनी या घराचं नाव 'मिमोह' ठेवलं. काही काळ हे कुटुंब ऊटीमध्ये राहत होतं. मुंबईत परत आल्यानंतर त्यांनी मढ आयलंडच्या या बंगल्यात कायमचं राहायला सुरुवात केली. त्याआधी या प्रॉपर्टीचा वापर मुख्यत्वे सुट्टीच्या घरासारखाच केला जात असे.

मिथुन चक्रवर्तींचं हे फार्महाऊस तब्बल दीड एकर जागेत पसरलेलं आहे. हिरवळीने वेढलेल्या या प्रॉपर्टीत कुटुंबातल्या प्रत्येक सदस्यासाठी स्वतंत्र कॉटेज असल्याचं नमाशीने सांगितलं. इतकंच नाही, तर कुटुंबातल्या तब्बल २२ पाळीव कुत्र्यांसाठीही या फार्महाऊसमध्ये खास जागा राखून ठेवली आहे. मिथुन चक्रवर्तींना बागकामाची प्रचंड आवड असल्याचंही नमाशीने सांगितलं. वडील जेव्हा या फार्महाऊसला भेट द्यायचे, तेव्हा बराच वेळ बागकामात घालवत असत, त्यामुळेच या प्रॉपर्टीत हिरवाईला विशेष महत्त्व दिलं गेलं आहे.

या मुलाखतीत नमाशीने मिथुन चक्रवर्तींच्या संघर्षाच्या दिवसांशी निगडित काही आठवणीही सांगितल्या. मुंबईत आल्यावर सुरुवातीच्या काळात त्यांच्याकडे राहायला घरच नव्हतं. त्या काळात त्यांनी तब्बल १५ दिवस पिवळ्या रंगाच्या फोक्सवॅगन बीटल गाडीत काढल्याचं नमाशीने सांगितलं. ही गाडी आता चालवण्याच्या अवस्थेत नसली, तरी मिथुन चक्रवर्तींच्या आयुष्यात तिला खास स्थान आहे. या गाडीशी जोडलेल्या अनेक आठवणींमुळे आजही तिची निगा राखली जाते.

या फार्महाऊसमध्ये मिथुन चक्रवर्तींच्या प्रदीर्घ कारकिर्दीची झलकही पाहायला मिळते. घरातल्या एका भिंतीवर त्यांना मिळालेले सन्मान, पुरस्कार आणि चाहत्यांनी काढलेली त्यांची चित्रं लावलेली आहेत. दुसऱ्या एका भिंतीवर अनेक प्रसिद्ध व्यक्तींसोबतचे मिथुन चक्रवर्तींचे फोटो दिसतात, ज्यात पंतप्रधान नरेंद्र मोदी आणि बाळासाहेब ठाकरे यांच्यासोबतच्या फोटोंचाही समावेश आहे. तसंच मिथुन चक्रवर्तींना दादासाहेब फाळके पुरस्कार मिळाला त्या खास क्षणाचा फोटोही याच भिंतीवर आहे.

संघर्षाच्या दिवसांपासून सुरू झालेला मिथुन चक्रवर्तींचा हा प्रवास आज या आलिशान फार्महाऊसपर्यंत पोहोचला आहे. कुटुंबासाठी स्वतंत्र कॉटेज, २२ पाळीव कुत्रे, हिरवीगार बाग आणि त्यांच्या कारकिर्दीच्या आठवणी जपणाऱ्या अनेक खास गोष्टी या प्रॉपर्टीत पाहायला मिळतात. मिथुन चक्रवर्ती यांनी १९७०च्या दशकात आपल्या अभिनय कारकिर्दीला सुरुवात केली आणि त्यानंतर हिंदी चित्रपटसृष्टीत स्वतःची वेगळी ओळख निर्माण केली. अनेक दशकं ते प्रेक्षकांचं मनोरंजन करत आले आहेत.