MG Motors चा मोठा प्लॅन, Cyberster आणि M9 EV ची किंमत कमी, पण बॅटरीसाठी द्यावे लागणार 8 रुपये प्रति किमी

इलेक्ट्रिक कार घेणाऱ्या ग्राहकांसाठी MG Motor ने एक नवीन पर्याय आणलाय. कंपनीच्या MG Select या प्रीमियम रिटेल नेटवर्कमधून Cyberster आणि M9 EV या दोन लग्झरी इलेक्ट्रिक कार्ससाठी Battery-as-a-Service म्हणजेच BaaS ही स्कीम सुरू करण्यात आलीये. या स्कीममध्ये कारची किंमत आणि बॅटरीचा वापर हे दोन्ही वेगवेगळे मोजले जातात, म्हणजे कार खरेदी करताना ग्राहकाला बॅटरीची पूर्ण किंमत एकदम मोजावी लागत नाही.

या स्कीमचं वैशिष्ट्य म्हणजे कारची सुरुवातीची किंमत तुलनेत कमी ठेवली जाते, पण बॅटरीसाठी ग्राहकाला किती किलोमीटर गाडी चालवली त्यानुसार वेगळं शुल्क भरावं लागतं. Cyberster साठी BaaS किंमत 72.49 लाख रुपये आहे, तर M9 EV ची BaaS किंमत 69.99 लाख रुपयांपासून सुरू होते. दोन्ही गाड्यांसाठी बॅटरी रेंटल प्रति किलोमीटर 8 रुपये इतकं आहे. याशिवाय इतर जे काही शुल्क लागू असतील ते वेगळे असू शकतात, त्यामुळे प्रत्यक्ष खर्च ग्राहकाच्या वापरावर अवलंबून राहणार आहे.

Cyberster ही MG ची स्पोर्टी इलेक्ट्रिक रोडस्टर कार आहे. यात 77 kWh ची बॅटरी आणि ड्युअल मोटर सेटअप दिलाय. दोन्ही मोटर्स मिळून 503.02 bhp पॉवर आणि 725 Nm टॉर्क तयार करतात. कंपनीच्या दाव्यानुसार ही कार अवघ्या 3.2 सेकंदांत 0 ते 100 किमी प्रति तास वेग गाठते. रेंजबद्दल बोलायचं झालं तर ही कार एका चार्जमध्ये 580 किमीपर्यंत जाऊ शकते असं सांगितलंय, पण प्रत्यक्षात ड्रायव्हिंगची स्टाइल, ट्रॅफिक आणि रस्त्यांची परिस्थिती यावर ही रेंज कमीजास्त होऊ शकते, त्यामुळे रोजच्या वापरात ग्राहकाला याहून कमी रेंज मिळू शकते.

दुसरीकडे M9 EV ही MG ची प्रीमियम इलेक्ट्रिक MPV आहे. यात 90 kWh ची NMC बॅटरी असून इलेक्ट्रिक मोटर 241.65 bhp पॉवर आणि 350 Nm टॉर्क जनरेट करते. कंपनीच्या माहितीनुसार या गाडीची रेंज 548 किमीपर्यंत आहे. फीचर्सच्या बाबतीत या MPV मध्ये 12.3 इंचाचा टचस्क्रीन, पॅनोरमिक सनरूफ, ऑटोमॅटिक क्लायमेट कंट्रोल आणि 13 स्पीकरची साउंड सिस्टम दिलीये. मागच्या सीटवर बसणाऱ्या प्रवाशांसाठी प्रेसिडेंशियल सीट्समध्ये 16-वे अॅडजस्टमेंट, मसाज मोड आणि हीटिंग-व्हेंटिलेशनसारख्या सुविधाही देण्यात आल्यात, ज्यामुळे ही गाडी लग्झरी MPV सेगमेंटमध्ये उभी राहते.

MG Select च्या माध्यमातून कंपनी हे दोन्ही प्रीमियम EV मॉडेल्स ग्राहकांपर्यंत पोहोचवतेय. BaaS पर्यायामुळे लग्झरी इलेक्ट्रिक कार घेताना सुरुवातीला लागणारा खर्च कमी ठेवण्याची संधी ग्राहकांना मिळणार आहे. कारची किंमत आणि बॅटरीचा खर्च वेगळा ठेवल्यामुळे जे ग्राहक कमी अंतर चालवतात त्यांना याचा जास्त फायदा होऊ शकतो.