1 रुपयात 24 दिवसांची व्हॅलिडिटी; अनलिमिटेड कॉलिंग अन् रोज 1GB डेटा, बीएसएनएलच्या ऑफरने उडवली झोप

रिचार्ज प्लॅन्स दिवसेंदिवस महाग होत चालले आहेत आणि ड्युअल सिम वापरणाऱ्यांसाठी तर हा खर्च आणखी जास्त जाणवतो. अशातच सरकारी टेलिकॉम कंपनी बीएसएनएलने ग्राहकांना दिलासा देणारी ऑफर पुढे नेली आहे. फक्त 1 रुपयात तब्बल 24 दिवसांसाठी सिम ॲक्टिव्ह ठेवता येईल, अशी ही ऑफर आहे.

बीएसएनएलने आपल्या Freedom 2.0 या ऑफरची अंतिम मुदत वाढवली आहे. या ऑफरमधून कंपनी ग्राहकांना अवघ्या 1 रुपयात कंपनीचे 4G नेटवर्क वापरून बघण्याची संधी देत आहे. या प्लॅनमध्ये अनलिमिटेड कॉलिंग, डेटा आणि एसएमएस अशा तिन्ही सुविधा एकत्र मिळतात. एरवी वेगवेगळ्या प्लॅनसाठी वेगळे पैसे मोजावे लागतात, पण या एका प्लॅनमध्ये या तिन्ही सुविधा एकत्रितपणे मिळत असल्यामुळे ग्राहकांसाठी ही ऑफर फायदेशीर ठरत आहे.

या 1 रुपयाच्या प्लॅनसोबत बीएसएनएल मोफत सिमदेखील देत आहे. आपले ग्राहक वाढवण्यासाठी कंपनीने ही रणनीती आखली आहे. मात्र ही ऑफर फक्त नवीन ग्राहकांसाठीच आहे, आधीपासून बीएसएनएल वापरणाऱ्या ग्राहकांना याचा फायदा घेता येणार नाही. देशातील सर्वात स्वस्त रिचार्ज म्हणूनही या प्लॅनकडे बघितलं जात आहे.

किंमत फक्त 1 रुपया असली तरी व्हॅलिडिटीबाबत कंपनीने कोणतीही तडजोड केलेली नाही. हा प्लॅन पूर्ण 24 दिवसांच्या व्हॅलिडिटीसह येतो आणि सध्या इतर कोणतीही टेलिकॉम कंपनी अशी ऑफर देत नाही. त्यामुळे इतक्या कमी किमतीत इतकी जास्त व्हॅलिडिटी मिळणं हे या ऑफरचं सर्वात मोठं वैशिष्ट्य मानलं जात आहे.

या प्लॅनमध्ये ग्राहकांना सर्व नेटवर्कवर अनलिमिटेड कॉल्स करता येतील. त्याशिवाय दररोज 100 एसएमएसची सुविधाही मिळेल, म्हणजे संपूर्ण 24 दिवसांच्या व्हॅलिडिटीत एकूण 2400 एसएमएस मिळतील. यामुळे रोजच्या कॉलिंग आणि मेसेजिंगच्या खर्चाची चिंता ग्राहकांना करावी लागणार नाही.

डेटाबाबत बोलायचं झालं तर बीएसएनएल या प्लॅनमध्ये ग्राहकांना दररोज 1GB हाय-स्पीड 4G डेटा देत आहे. म्हणजेच 1 रुपयातच युजर्सना कंपनीच्या 4G स्पीडची चाचणी घेता येईल आणि त्यावरून बीएसएनएलसोबत राहायचं की दुसऱ्या कंपनीकडे जायचं, हे ठरवता येईल. संपूर्ण व्हॅलिडिटी कालावधीत ग्राहकांना एकूण 24GB डेटा मिळणार आहे. त्यामुळे रोजचं इंटरनेट वापरणाऱ्या ग्राहकांसाठीही हा प्लॅन उपयुक्त ठरू शकतो.

कंपनीने आपल्या सोशल मीडिया प्लॅटफॉर्म X वर सांगितलं आहे की, ही ऑफर 12 ऑक्टोबर 2026 पर्यंत सुरू राहणार आहे. इच्छुक ग्राहकांना जवळच्या बीएसएनएल कार्यालयातून, बीएसएनएलच्या वेबसाइटवरून तसंच बीएसएनएल सेल्फ केअर ॲपवरून या प्लॅनची माहिती मिळू शकते. याशिवाय ग्राहक 1800-180-1503 या क्रमांकावरही संपर्क साधू शकतात, असं कंपनीने स्पष्ट केलं आहे. त्यामुळे ज्यांना नवीन सिम घ्यायचं आहे, त्यांच्यासाठी ही मुदत लक्षात ठेवणं महत्त्वाचं आहे.