महिंद्राची नवी कॉम्पॅक्ट SUV Vision S, 10 लाखांच्या आत किंमत, ADAS आणि सनरूफसह येणार
महिंद्रा अँड महिंद्राची येणारी कॉम्पॅक्ट एसयूव्ही Vision S टेस्टिंगदरम्यान पुन्हा एकदा कॅमेऱ्यात कैद झाली असून, तिचे डिझाईन, इंजिन ऑप्शन आणि अपेक्षित किंमतीबाबत नवी माहिती समोर आली आहे.
छायाचित्रे सत्यापित केलेली नाहीत
भारतातल्या एसयूव्ही मार्केटमध्ये स्पर्धा दिवसेंदिवस वाढतच चालली आहे आणि याच स्पर्धेत महिंद्रा अँड महिंद्रा कंपनी आपली नवी कॉम्पॅक्ट एसयूव्ही Mahindra Vision S घेऊन पुन्हा एकदा चर्चेत आली आहे. या गाडीची एक टेस्ट युनिट नुकतीच हेवी कॅमोफ्लॉजमध्ये रस्त्यावर धावताना दिसली, आणि यातून मिळालेल्या स्पाय शॉट्समुळे तिच्या प्रॉडक्शन-रेडी लूकची बरीच माहिती आता बाहेर आली आहे. कंपनीच्या लाइनअपमध्ये ही गाडी XUV 3XO आणि स्कॉर्पियो या दोन मॉडेल्सच्या मधल्या जागेत बसवली जाण्याची शक्यता आहे.
ही एसयूव्ही महिंद्राच्या 'फ्रीडम-एनयू' या मॉड्युलर प्लॅटफॉर्मवर उभी असणार असून, यात पेट्रोल, डीझेल, हायब्रिड आणि इलेक्ट्रिक अशा चारही पॉवरट्रेन पर्यायांना जागा दिली जाणार आहे. टेस्टिंगच्या वेळी गाडीवर AdBlue फिलर कॅप स्पष्ट दिसून आली, त्यामुळे डीझेल इंजिन असणार हे जवळपास निश्चित झाले आहे.
लूकच्या बाबतीत बोलायचे झाले, तर बॉक्सी शेप, ताठ उभा बॉनेट आणि चौकोनी एलईडी हेडलॅम्प्समुळे या गाडीला एखाद्या 'मिनी डिफेंडर' किंवा 'बेबी स्कॉर्पियो'सारखा रगेड लुक मिळतो आहे. कॉन्सेप्ट स्टेजला दिलेल्या माहितीनुसार गाडीला 277 मिमी इतकं ग्राउंड क्लियरेंस आणि 2665 मिमी व्हीलबेस मिळण्याची शक्यता आहे. मागच्या दरवाजावर बसवलेलं फुल-साईझ स्पेअर व्हील तिच्या ऑफ-रोड इमेजला अजून बळकटी देतं.
इंजिनच्या बाबतीत बघायचं झालं, तर 1.2 लिटरचं टर्बो पेट्रोल इंजिन दिलं जाणार असून त्याचं मायलेज साधारण 16 ते 18 किमी प्रती लिटर इतकं अपेक्षित आहे. दुसरीकडे 1.5 लिटरचं डीझेल इंजिन मॅन्युअल आणि ऑटोमॅटिक अशा दोन्ही पर्यायांमध्ये उपलब्ध असणार आहे, आणि याचं मायलेज साधारण 20 ते 22 किमी प्रती लिटरपर्यंत जाण्याची शक्यता आहे. पुढं जाऊन कंपनी यात हायब्रिड आणि पूर्णपणे इलेक्ट्रिक व्हर्जनही जोडणार आहे.
केबिनच्या आत ड्युअल डिजिटल स्क्रीन, बाहेर आलेले एसी व्हेंट्स, पॅनोरमिक सनरूफ, थ्री-स्पोक स्टीयरिंग व्हील आणि फ्लॅट फ्लोरसह 60:40 प्रमाणात स्प्लिट होणाऱ्या रियर सीट्स दिल्या जाण्याची शक्यता आहे. सेफ्टीसाठी लेव्हल 2 ADAS सिस्टीम, अनेक एअरबॅग्ज, 360 डिग्री कॅमेरा आणि मजबूत बॉडी स्ट्रक्चर देण्यात येणार आहे.
ही सीरिज महिंद्रा 2027 मध्ये बाजारात आणण्याची शक्यता आहे. या एसयूव्हीच्या बेस व्हेरिएंटची सुरुवातीची किंमत 10 लाख रुपयांच्या आत राहील असा अंदाज आहे, तर टॉप-स्पेक व्हेरिएंटची किंमत 17 ते 22 लाख रुपये (एक्स-शोरूम) पर्यंत जाऊ शकते.
