महिला आशिया कप: भारताचा श्रीलंकेवर विजय, नक्वींकडून ट्रॉफी घेण्यास हरमनप्रीतचा नकार
दुबईत झालेल्या महिला आशिया कप २०२६ च्या फायनलमध्ये भारताने श्रीलंकेला ७२ धावांनी हरवत आठव्यांदा जेतेपद पटकावले. पण सामन्यानंतर कर्णधार हरमनप्रीत कौरने आशियाई क्रिकेट परिषदेचे अध्यक्ष मोहसिन नक्वी यांच्याकडून ट्रॉफी स्वीकारण्यास नकार दिला आणि नो हँडशेक वाद पुन्हा चर्चेत आला.
दुबई इंटरनॅशनल स्टेडियमवर १३ सप्टेंबरला महिला आशिया कप २०२६ चा अंतिम सामना भारत आणि श्रीलंका यांच्यात झाला. या सामन्यात भारतीय संघाने बाजी मारली आणि आशिया कप ट्रॉफीवर आठव्यांदा आपले नाव कोरले. संपूर्ण स्पर्धेत भारताने एकही सामना न गमावता विजयी वाटचाल कायम ठेवली होती. फायनलमध्येही शफाली वर्मा आणि स्मृती मंधाना या दोघींनी फलंदाजीत जबरदस्त खेळी करत अर्धशतके झळकावली. पण सामना संपल्यानंतर पाकिस्तानसोबतच्या नो हँडशेक पॉलिसीचा वाद पुन्हा एकदा समोर आला, कारण भारताची कर्णधार हरमनप्रीत कौरने मोहसिन नक्वींकडून ट्रॉफी स्वीकारण्यास स्पष्ट नकार दिला.
आशिया कप जिंकल्यानंतर भारतीय संघाने हा मोठा निर्णय घेत पाकिस्तान क्रिकेट बोर्ड आणि आशियाई क्रिकेट परिषदेचे अध्यक्ष मोहसिन नक्वी यांच्या हस्ते ट्रॉफी घेण्यासच नकार दिला. याआधी २०२५ च्या पुरुषांच्या आशिया चषक स्पर्धेतही भारतीय कर्णधार सूर्यकुमार यादवने नक्वींकडून चषक घेतला नव्हता. आता महिला संघानेही त्याच मार्गाने जात हीच भूमिका कायम ठेवली आहे. पहलगाम इथल्या दहशतवादी हल्ल्यानंतर भारतीय क्रिकेट संघाने पाकिस्तान संघाशी हस्तांदोलन न करण्याचा निर्णय घेतलेला आहे, आणि तोच पवित्रा या फायनलनंतरही कायम राहिला.
सामन्याबद्दल बोलायचं झालं तर, नाणेफेक जिंकून भारताने आधी फलंदाजी करण्याचा निर्णय घेतला. २० षटकांत ५ विकेट गमावत भारताने १८३ धावा उभारल्या. सलामीला आलेल्या स्मृती मंधाना आणि शफाली वर्मा यांनी पहिल्या विकेटसाठी १२९ धावांची भागीदारी रचली. मंधानाने ३९ चेंडूंत ५९ धावा केल्या, तर शफालीने ३९ चेंडूंत ६८ धावांची खेळी केली. कर्णधार हरमनप्रीत कौरने १४ चेंडूंत १४ धावा तर रिचा घोषने १३ चेंडूंत १७ धावा जोडल्या.
प्रत्युत्तरात श्रीलंकेची सुरुवात मंद झाली. चमारी अथापथ्थूने ३२ चेंडूंत ३६, इमेशा दुलानीने ४ चेंडूंत ४, विष्मी गुणरत्नेने २२ चेंडूंत २० आणि नीलाक्षिका सिल्वाने १६ चेंडूंत २२ धावा केल्या. पण श्रीलंकेचा संपूर्ण संघ २० षटकांत १११ धावांवर गारद झाला आणि भारताने हा सामना ७२ धावांनी खिशात टाकला. गोलंदाजीत श्री चरणीने चार षटकांत अवघ्या २० धावा देत चार बळी घेतले, तर दीप्ती शर्माने चार षटकांत १९ धावांत तीन विकेट काढल्या. प्रेमा रावत आणि क्रांती गौड यांनाही प्रत्येकी एक विकेट मिळाली. अशा प्रकारे भारतीय महिला संघाने आठव्यांदा आशिया कप जिंकत नवा इतिहास रचला.
