लॉस एंजेलिसमध्ये न्यूज हेलिकॉप्टर कोसळले, वैमानिक-बातमीदारासह तिघांचा मृत्यू

अमेरिकेतील कॅलिफोर्निया राज्यातील लॉस एंजेलिस शहरातून एक धक्कादायक बातमी समोर आली आहे. लॉस एंजेलिसमधील सॅन फर्नांडो व्हॅली भागातील चॅट्सवर्थ परिसरात एका न्यूज चॅनेलचं हेलिकॉप्टर कोसळून मोठा अपघात झाला. या भीषण दुर्घटनेत तीन जणांचा घटनास्थळीच दुर्दैवी मृत्यू झाला, तर आसपासची काही वाहनं आणि इमारतींचंही मोठं नुकसान झालं. अपघातानंतर हेलिकॉप्टरला भीषण आग लागल्यानं परिसरात एकच घबराट पसरली होती.

मिळालेल्या माहितीनुसार, हा अपघात मंगळवारी संध्याकाळी साधारण ७ च्या सुमारास चॅट्सवर्थ भागातील नार्थ मेसन ॲव्हेन्यूच्या ९१०० ब्लॉकजवळ घडला. अपघाताच्या काही वेळ आधीच याच भागात एका भरधाव एसयूव्ही कारनं मेट्रो बसला जोरदार धडक दिली होती. या रस्ते अपघातात २ जण ठार तर ६ जण गंभीर जखमी झाले होते. या रस्ते दुर्घटनेचं आकाशातून थेट वार्तांकन करण्यासाठी एनबीसी४ (NBC4 / NewsChopper 4) या स्थानिक वृत्तवाहिनीचे बातमीदार आणि कॅमेरा टीम हेलिकॉप्टरनं हवेत घिरट्या घालत होती.

वार्तांकन सुरू असतानाच अचानक हेलिकॉप्टरवरच्या वैमानिकाचं नियंत्रण सुटलं आणि हेलिकॉप्टर वेगानं खाली येऊन दोन व्यावसायिक इमारतींच्या मधोमध असलेल्या पार्किंग लॉटवर कोसळलं. जमिनीवर आदळताच तिथं उभ्या असलेल्या दोन मोठ्या शिपिंग कंटेनरवर आणि अनेक गाड्यांवर हेलिकॉप्टर आदळलं. जोरदार धडकेमुळे क्षणार्धात मोठा स्फोट होऊन हेलिकॉप्टरला भीषण आग लागली. आगीच्या तीव्र ज्वाळांमुळे जवळ उभ्या असलेल्या किमान चार कार आणि कंटेनरही पेटून उठले.

घटनास्थळावरून मिळालेल्या माहितीनुसार, अपघाताचा निरोप मिळताच लॉस एंजेलिस फायर डिपार्टमेंटच्या (LAFD) ५० हून जास्त जवानांनी तात्काळ घटनास्थळी धाव घेतली. फायर डिपार्टमेंटनं अथक प्रयत्नांनंतर आगीवर नियंत्रण मिळवलं. फायर डिपार्टमेंटचे कॅप्टन ब्रँडन सिल्व्हरमन यांनी पत्रकारांशी बोलताना सांगितलं की, अपघात इतका भीषण होता की हेलिकॉप्टरचा पार चक्काचूर झाला होता. ढिगाऱ्याखाली शोधमोहीम राबवत असताना तीन मृतदेह बाहेर काढण्यात आले, तर एका जखमी व्यक्तीला गंभीर अवस्थेत जवळच्या हॉस्पिटलमध्ये दाखल करण्यात आलं.

हेलिकॉप्टर कोसळल्यानंतर ते एनबीसी४ (NBC4) या वाहिनीचं न्यूजचॉपर ४ असल्याचं स्पष्ट झालं. थेट प्रक्षेपणादरम्यानच बातमीदार आणि वैमानिकाशी संपर्क तुटल्यामुळे वाहिनीच्या स्टुडिओत चिंतेचं वातावरण निर्माण झालं होतं. वाहिनीच्या ज्येष्ठ अँकर कॉलीन विल्यम्स यांनी थेट प्रसारणादरम्यान भावूक होत या दुर्घटनेला दुजोरा दिला. एनबीसी न्यूजनं दिलेल्या निवेदनात हवाई बातमीदार एलियाना मोरेनो आणि अनुभवी पायलट जॉर्ज मार्किनिव्ह यांच्या मृत्यूची माहिती देत तीव्र शोक व्यक्त केला आहे.

या दुहेरी दुर्घटनेमुळे संपूर्ण लॉस एंजेलिस शहरावर शोककळा पसरली आहे. कॅलिफोर्नियाचे गव्हर्नर गॅव्हिन न्यूजम आणि लॉस एंजेलिसच्या मेयर करेन बास यांनी या घटनेबद्दल तीव्र दुःख व्यक्त करत मृत कर्मचाऱ्यांच्या कुटुंबीयांप्रती संवेदना व्यक्त केल्या आहेत.

हेलिकॉप्टर हवेत असताना अचानक का कोसळलं आणि तांत्रिक बिघाड झाला होता की हवामानातल्या बदलामुळे हा अपघात घडला, याबाबत अद्याप अधिकृत माहिती समोर आलेली नाही. यूएस फेडरल एव्हिएशन ॲडमिनिस्ट्रेशन (FAA) आणि नॅशनल ट्रान्सपोर्टेशन सेफ्टी बोर्ड (NTSB) यांनी या दुर्घटनेची गंभीर दखल घेतली असून, अपघाताच्या सखोल तपासासाठी विशेष पथकं तैनात केली आहेत. लॉस एंजेलिस पोलीस आणि एफएएचे अधिकारी संयुक्तपणे हेलिकॉप्टरचा ब्लॅक बॉक्स आणि ढिगारा तपासून अपघाताचं मूळ कारण शोधण्याचा प्रयत्न करत आहेत. एकाच दिवशी आधी मेट्रो बसचा भीषण अपघात आणि त्यानंतर वार्तांकन करणाऱ्या हेलिकॉप्टरचा झालेला अपघात यामुळे चॅट्सवर्थ भागात अत्यंत भीतीचं आणि दुःखाचं वातावरण आहे.