लातूरमध्ये शिक्षणसंस्थाचालकाचा मृत्यू; कुटुंब विदेशात, एकटेपणा, आजारपण की घातपात? चिठ्ठीने वाढवले गूढ

शैक्षणिक क्षेत्रातल्या 'लातूर पॅटर्न'साठी ओळखल्या जाणाऱ्या लातूर शहरातून एक धक्कादायक बातमी समोर आली आहे. विविध शिक्षण संस्था आणि शैक्षणिक उपक्रमांमुळे लातूर शहराची राज्यभरात स्वतंत्र अशी ओळख निर्माण झालेली आहे. मात्र शहरातील पद्मानगर भागात राहणाऱ्या संजीव चंद्रभानू सोनवणे (वय ६२) या शिक्षणसंस्थाचालकाचा त्यांच्या राहत्या घरी मृत्यू झाला आहे. गेल्या काही दिवसांपासून पेपरफुटीच्या प्रकरणांमुळे आधीच चर्चेत असलेल्या लातूरमध्ये या घटनेमुळे परिसरात आणखी खळबळ उडाली आहे.

संजीव सोनवणे हे लातूरच्या शिक्षण क्षेत्राशी जोडलेले होते आणि पद्मानगर भागातील त्यांच्या राहत्या घरी ते एकटेच राहत होते, अशी प्राथमिक माहिती पुढे आली आहे. त्यांचे कुटुंबीय सध्या विदेशात राहतात, असं सांगितलं जातंय. त्यामुळे सोनवणे यांचा नेमका मृत्यू नेमक्या कोणत्या परिस्थितीत झाला, याचा तपास पोलिसांनी हाती घेतला आहे.

या प्रकरणातील महत्त्वाचा दुवा म्हणजे सोनवणे यांनी मृत्यूपूर्वी लिहिलेली एक चिठ्ठी पोलिसांच्या हाती लागली आहे. या चिठ्ठीत त्यांनी आपल्या मृत्यूसाठी कोणालाही जबाबदार धरू नये, असं नमूद केल्याचं समजतं. शिवाय आपल्या मृत्यूची चौकशी करू नये, असं आवाहनही त्यांनी चिठ्ठीत केल्याची प्राथमिक माहिती आहे. मात्र अशी चिठ्ठी सापडली म्हणून पोलीस तपास थांबवत नाहीत, कारण एखाद्या चिठ्ठीत अशी नोंद असली तरी त्यामुळे प्रकरणाचा तपास थांबवता येत नाही. मृत्यूमागची नेमकी कारणं आणि परिस्थिती स्पष्ट करण्यासाठी पोलिसांकडून वेगवेगळ्या शक्यता पडताळल्या जात आहेत.

सोनवणे एकटे राहत होते आणि त्यांना विविध आजार असल्याची माहितीही पोलिसांना मिळाली आहे. कुटुंबीय विदेशात असल्याने आलेल्या एकटेपणातून त्यांनी टोकाचं पाऊल उचललं असावं, असा प्राथमिक अंदाज पोलिसांकडून व्यक्त केला जातोय. मात्र हा केवळ प्राथमिक अंदाज असून, मृत्यूमागे आणखी काही कारण आहे का, यावरही पोलीस लक्ष ठेवून आहेत. या प्रकरणात घातपाताची शक्यता आहे का, मृत्यूपूर्वी नेमक्या कोणत्या घडामोडी घडल्या, तसंच चिठ्ठीतल्या मजकुरामागे नेमकी काय पार्श्वभूमी आहे, हे शोधणं तपासाच्या दृष्टीने कळीचं ठरणार आहे.

घटनेची माहिती मिळताच पोलिसांनी घटनास्थळी धाव घेऊन पाहणी केली. मृतदेहाची वैद्यकीय तपासणी आणि आवश्यक कायदेशीर प्रक्रिया पूर्ण करण्यात आली आहे. घटनास्थळावरची परिस्थिती, तिथे मिळालेली कागदपत्रं आणि इतर बाबींची पडताळणी पोलिसांकडून केली जात आहे. शिक्षणसंस्थाचालक संजीव सोनवणे यांच्या निधनामुळे लातूरच्या शैक्षणिक वर्तुळात हळहळ व्यक्त होत आहे. या मृत्यूचं नेमकं कारण पोलिसांच्या तपासातून पुढे येणार आहे.