पुण्यात खळबळ! कोथरुडमध्ये महिलेने गळफास घेऊन केली आत्महत्या; धक्कादायक कारण समोर

राज्यासह देशभरात आत्महत्येच्या घटनांमध्ये सातत्याने मोठी वाढ होत असल्याचं चित्र दिसून येतं. रोज वेगवेगळ्या कारणांमुळे अनेकजण असा टोकाचा निर्णय घेत असतात. अशातच आता पुण्याच्या कोथरुड भागातून एक धक्कादायक बातमी समोर आली आहे. पतीच्या विवाहबाह्य संबंधाला कंटाळून एका महिलेने राहत्या घरातच गळफास घेऊन आत्महत्या केली. मोनाली गोविंद पवार असं या महिलेचं नाव असून तिचं वय २५ वर्षं होतं. ती कोथरुडमधील सुतारदरा इथं राहत होती.

ही घटना २२ ऑगस्ट रोजी सकाळी साडेदहाच्या सुमारास सुतारदरा लेन क्रमांक २९ मध्ये घडली. मोनाली आणि गोविंद यांचं लग्न काही महिन्यांपूर्वीच झालं होतं. पण गोविंदचे एका दुसऱ्या महिलेशी संबंध होते, आणि त्यावरुनच या दाम्पत्यात सातत्याने वाद होत असत. या वादातून गोविंद मोनालीला शिवीगाळ करायचा आणि मारहाण करुन तिचा जाच करायचा, असं समोर आलं आहे. लग्नानंतर काही महिन्यांतच हा त्रास सुरु झाला होता, असं या प्रकरणातून पुढे आलं आहे.

या सगळ्या त्रासाला कंटाळून मोनालीने २२ ऑगस्टला राहत्या घरी साडीच्या साहाय्याने गळफास घेतला आणि आत्महत्या केली. घरातल्यांना ही बाब समजताच सगळीकडे एकच खळबळ उडाली. या आत्महत्येला जबाबदार धरत तिच्या पतीविरुद्ध कोथरुड पोलीस स्टेशनमध्ये गुन्हा दाखल करण्यात आला आहे. याप्रकरणाचा तपास सहायक पोलीस निरीक्षक डॉ. अशोक डोंगरे करत आहेत. पोलिसांनी गोविंद पवार याच्याविरोधात पत्नीला आत्महत्येस प्रवृत्त केल्याचा गुन्हा नोंदवला असून पुढील तपास सुरु आहे.

कोथरुडमधील या घटनेनं पुन्हा एकदा घरगुती छळ आणि त्यातून येणाऱ्या मानसिक ताणाचा मुद्दा समोर आला आहे. विवाहबाह्य संबंधांमुळे कुटुंबात निर्माण होणारा वाद, त्यातून होणारी शिवीगाळ आणि मारहाण या सगळ्याचा मानसिक परिणाम पीडित व्यक्तीवर किती खोलवर होऊ शकतो, हे या घटनेतून पुन्हा एकदा अधोरेखित झालं आहे. अशा घटनांमुळे कुटुंबातील नात्यांमध्ये विश्वासाला किती मोठा तडा जातो, याचंही हे प्रकरण उदाहरण ठरलं आहे. पोलिसांनी या प्रकरणाचा तपास हाती घेतला असून पुढील कारवाई सुरु असल्याचं सांगण्यात आलं आहे.