आर्थरायटिसवर मात करत कोल्हापूरची माधुरी हत्तीण वर्षभरानंतर मायभूमीत परतणार

कोल्हापूरच्या नंदानी मठातली माधुरी ही हत्तीण आता पुन्हा आपल्या मायभूमीत येणार आहे. जामनगरमधल्या वांतारा या वन्यजीव पुनर्वसन आणि संवर्धन केंद्रात तिच्यावर गेलं वर्षभराहून जास्त काळ उपचार आणि पुनर्वसन सुरू होतं. आता तिची तब्येत इतकी सुधारली आहे की ती परतीच्या प्रवासासाठी तयार झाली आहे.

वांतारामध्ये आणलं तेव्हा माधुरीची अवस्था खूपच गंभीर होती. तिला वाढलेला आर्थरायटिस, पायांची जुनी दुखणी आणि चालण्याफिरण्यात मोठ्या अडचणी होत्या. अनेक वर्षं तिची हालचाल मर्यादित राहिली आणि ती सतत कठीण काँक्रीटच्या जमिनीवर उभी राहिल्यामुळे ही परिस्थिती ओढवली होती. त्यात भर म्हणजे तिला दीर्घकाळ साखळदंडाने बांधून ठेवलं जायचं, त्यामुळे तिची नैसर्गिक हालचालच बंद झाली आणि सांधे आणखी आखडत गेले. एवढी तब्येत बिघडलेली असतानाही तिला सण-उत्सव आणि मिरवणुकांमध्ये वापरलं जायचं. दोरखंडांनी बांधून तिला तापलेल्या डांबरी रस्त्यांवरून लांबवर चालायला भाग पाडलं जायचं.

वांताराच्या केंद्रात अनंत अंबानी यांच्या मार्गदर्शनाखाली माधुरीला वेगवेगळ्या क्षेत्रातल्या तज्ज्ञांच्या टीमने उपचार दिले. तिचं शरीरस्वास्थ्य, चालण्याफिरण्याची क्षमता आणि मानसिक स्वास्थ्य पुन्हा पूर्वपदावर आणणं हाच या उपचारांचा मुख्य उद्देश होता.

गेल्या वर्षभरात पशुवैद्य, काळजी घेणारे कर्मचारी, पोषणतज्ज्ञ आणि वर्तणूक तज्ज्ञ अशा वेगवेगळ्या तज्ज्ञांच्या टीमने माधुरीसाठी एक सघन पुनर्वसन कार्यक्रम राबवला. यामध्ये हायड्रोथेरपी, लेझर थेरपी, खास पोषण आहार, पायांची विशेष निगा आणि सतत देखरेख अशा गोष्टींचा समावेश होता. तिची हालचाल सुधारावी, जुनी दुखणी कमी व्हावीत आणि एकूण तब्येत सुधारावी यावर या उपचारांचा भर होता.

शारीरिक उपचारांबरोबरच माधुरीच्या मानसिक पुनर्वसनावरही तितकाच भर दिला गेला. वांताराच्या सुरक्षित आणि मोकळ्या वातावरणात तिला इतर हत्तींसोबत राहायला आणि त्यांच्याशी नातं जुळवायला संधी मिळाली. अनेक वर्षं बंदिस्त आणि मर्यादित आयुष्य जगल्यानंतर या सोबतीमुळे तिच्यात पुन्हा एकदा सुरक्षिततेची आणि स्थिरतेची भावना निर्माण झाली.

माधुरी परतण्याआधी सर्वोच्च न्यायालयाने नेमलेल्या हाय पॉवर्ड कमिटीने (HPC) तिच्या सुधारलेल्या तब्येतीची पाहणी केली. त्यानंतरच गुजरातमधून महाराष्ट्रात तिला हलवण्यासाठी लागणाऱ्या मंजुऱ्या आणि ट्रान्झिट परमिट देण्यात आलं.

माधुरीचा प्रवास वांतारामधून खास तयार केलेल्या हत्ती ॲम्ब्युलन्समधून सुरू होणार आहे. संपूर्ण प्रवासात तिला त्रास होऊ नये, ती सुरक्षित राहावी आणि तिच्यावर सतत वैद्यकीय देखरेख राहावी यासाठी वांताराची पशुवैद्यकीय आणि काळजी घेणारी टीम तिच्यासोबत असणार आहे.

माधुरीचं हे परतणं म्हणजे केवळ वर्षभर चाललेल्या उपचार आणि पुनर्वसनाचा शेवट नाही, तर वांताराने दिलेलं वचन पूर्ण केल्याचंही प्रतीक आहे. माधुरीच्या कल्याणासाठी दिलेलं आपलं वचन पाळत अनंत अंबानी यांनी तिला वांतारामध्ये पूर्ण उपचार आणि पुनर्वसन मिळेल याची खबरदारी घेतली. तिच्या तब्येतीचं आणि सुधारणेचं बारकाईने मूल्यांकन केल्यावर आता माधुरीला परतण्यासाठी वैद्यकीयदृष्ट्या सक्षम घोषित करण्यात आलं आहे आणि ती कोल्हापूरला परतायला सज्ज झाली आहे.