कारगिलमधील पहिली महिला लष्करी अधिकारी: स्टँझिन त्सांगयांग यांची झांस्कर ते पासिंग आऊट परेड गोष्ट

लडाखसारख्या बर्फाळ आणि दुर्गम भागात राहणं हे इतर कुठल्याही ठिकाणी राहण्यापेक्षा खूप वेगळं आणि आव्हानात्मक असतं. अशाच खडतर भागातून आलेल्या २४ वर्षांच्या एका तरुणीने आता एक वेगळा इतिहास घडवला आहे. लडाख केंद्रशासित प्रदेशातील कारगिल जिल्ह्यातून भारतीय लष्करात पहिली महिला अधिकारी बनण्याचा मान स्टँझिन त्सांगयांग हिने मिळवला आहे.

भारतीय लष्कराच्या आर्मी ट्रेनिंग कमांडने स्टँझिन हिच्या या प्रवासाची कहाणी एक्सवर (पूर्वीचे ट्विटर) शेअर केली. लष्कराने या प्रवासाला "पर्वतांपासून ऑलिव्ह ग्रीन्सपर्यंत: ऑफिसर कॅडेट (महिला) स्टँझिन त्सांगयांग यांची कहाणी" असं नाव दिलं आहे.

लष्कराने दिलेल्या माहितीनुसार, स्टँझिनचा जन्म लडाखच्या झांस्कर खोऱ्यात झाला. उंच पर्वत आणि कडाक्याच्या थंडीत लहानाची मोठी झालेल्या स्टँझिनला लहानपणापासूनच सहनशीलता आणि चिकाटी शिकावी लागली. कुटुंबातील सर्वात लहान अपत्य असल्यामुळे ती सगळ्यांची लाडकी होती आणि तिला कुटुंबाचं प्रेम तसंच मातृभूमीच्या खंबीरपणाचा मोठा आधार मिळाला.

चांगलं शिक्षण आणि उज्ज्वल भविष्यासाठी स्टँझिनने अगदी लहान वयातच घर आणि गाव सोडलं. तिने लेह इथल्या लॅमडॉन मॉडेल स्कूलमधून शालेय शिक्षण पूर्ण केलं. शिक्षणासाठी ती जवळपास १४ वर्षं कुटुंबापासून दूर हॉस्टेलमध्ये राहिली. अभ्यासातल्या चांगल्या कामगिरीमुळे तिला शिष्यवृत्ती मिळाली, आणि त्याच्या जोरावर तिने आसाममधल्या तेजपूर विद्यापीठातून मेकॅनिकल इंजिनिअरिंगचं शिक्षण पूर्ण केलं.

भारतीय लष्करात जाण्याचा तिचा प्रवास कॉलेजमध्ये असताना NCC मध्ये प्रवेश घेतल्यानंतर सुरू झाला. तिथेच तिला पहिल्यांदा आर्मी ऑफिसर बनण्याचे वेगवेगळे मार्ग कळले. पूर्णपणे सर्वसामान्य कुटुंबातून आलेल्या आणि घरात किंवा भागात लष्करी सेवेची कोणतीही पार्श्वभूमी नसताना ऑलिव्ह ग्रीन वर्दी घालण्याचं स्वप्न बघणं ही तिच्यासाठी वेगळीच गोष्ट होती. तरीही देशसेवा करण्याची आणि आपल्या कुटुंबातील तसंच भागातील पहिली लष्करी अधिकारी होऊन वर्दी घालण्याची तीव्र इच्छा तिच्या मनात निर्माण झाली.

हा प्रवास सोपा नव्हता. अडचणी, आव्हानं, त्याग आणि स्वतःवरच्या शंकेचे क्षण या सगळ्यातून तिला जावं लागलं. मात्र आई-वडिलांचा भक्कम पाठिंबा आणि हिमालयाच्या पर्वतांनी दिलेलं धैर्य यामुळे तिला सतत पुढे जाण्याची ताकद मिळाली.

काही दिवसांपूर्वी ऑफिसर कॅडेट स्टँझिन त्सांगयांग हिने कारगिल जिल्ह्यातील पहिली महिला अधिकारी म्हणून पासिंग आऊट परेड ग्राउंडवर पाऊल ठेवलं. देशाच्या अत्यंत दुर्गम आणि टोकाच्या भागातून पाहिलेली स्वप्नंसुद्धा सर्वोच्च शिखरांपर्यंत पोहोचू शकतात, याचं जिवंत उदाहरण म्हणजे स्टँझिनचा हा प्रवास आहे.