जरांगेंचा वापर संपला, सरकार त्यांना संपवू पाहतेय; राऊतांचा गंभीर आरोप

मनोज जरांगे पाटील यांच्या तब्येतीचा मुद्दा घेऊन शिवसेना उद्धव बाळासाहेब ठाकरे पक्षाचे खासदार संजय राऊत यांनी नागपुरात राज्य सरकारवर जोरदार निशाणा साधला. जरांगे यांचा आता सरकारला काही उपयोग उरलेला नाही, उलट त्यांचा संघर्ष सरकारच्या गळ्याला फास बसल्यासारखा झाला असून सरकारला त्यांना संपवायचे आहे, असा गंभीर आरोप राऊत यांनी केला.

जरांगे यांची तब्येत चिंताजनक असल्याचे सांगत, सरकारच्या प्रमुखांनी त्यांच्याशी लगेच बोलणी करावी अशी मागणी राऊत यांनी केली. मराठा असो वा ओबीसी आरक्षणाचा प्रश्न असो, मुख्यमंत्री देवेंद्र फडणवीस यांनी सर्वपक्षीय बैठक बोलावून यावर तोडगा काढावा, असेही ते म्हणाले.

शिवसेनेच्या धनुष्यबाण या चिन्हावरही राऊत यांनी आक्रमक भूमिका मांडली. हे चिन्ह मूळचे बाळासाहेब ठाकरे यांच्या शिवसेनेचे असून कारस्थान रचून निवडणूक आयोगाच्या मार्फत ते चोरण्यात आले, असा आरोप त्यांनी केला. या सगळ्यामागे केंद्रीय गृहमंत्री अमित शहा असल्याचा दावाही त्यांनी केला. चोरीच्या केसमध्ये पोलीस मुद्देमाल जप्त करतात, त्यामुळे धनुष्यबाण चोरांच्या हातातच राहू देऊ नये, असे राऊत म्हणाले. शिंदे गटाचे वकील नुसता वेळकाढूपणा करत असल्याचा आरोप करत, या प्रकरणाची रोज सुनावणी घेऊन लवकर निकाल द्यावा अशी मागणी त्यांनी केली.

मुस्लिम महिलांना गरब्यात सहभागी होऊ द्यावे या अमृता फडणवीस यांच्या भूमिकेचे राऊत यांनी स्वागत केले. पण त्याचबरोबर मुख्यमंत्री देवेंद्र फडणवीस आणि त्यांच्या मंत्रिमंडळातील कथित नवहिंदुत्ववादी नेत्यांचेही समुपदेशन करावे, असा टोला त्यांनी लगावला. भारताच्या स्वातंत्र्यलढ्यात आणि संयुक्त महाराष्ट्राच्या चळवळीत मुस्लिम समाजाचे मोठे योगदान होते हे सांगत, नवरात्रातला दांडिया हा लोकसहभागाचा उत्सव आहे असे राऊत म्हणाले.

विधानसभा अध्यक्ष राहुल नार्वेकर यांनी पक्षांतरबंदी कायद्यावर केलेल्या वक्तव्यावरही राऊत यांनी टीका केली. नार्वेकरांची भाषा या कायद्याचा अपमान करणारी आहे, असे ते म्हणाले.

राष्ट्रवादी काँग्रेसच्या एकत्रीकरणाबद्दल बोलताना रोहित पवार बरोबर बोलत असल्याचे राऊत यांनी सांगितले. अजित पवार यांच्या नेतृत्वाखालील राष्ट्रवादी काँग्रेस भाजपसोबत असून, भाजपसोबत जाण्याचा निर्णय अजित पवार यांनी मजबुरीतूनच घेतला, असा दावा त्यांनी केला. राष्ट्रवादी काँग्रेस हा शरद पवार यांचाच पक्ष असून शरद पवार कधीच भाजपसोबत जाणार नाहीत, असा विश्वासही राऊत यांनी व्यक्त केला.

राज्य अल्पसंख्याक आयोगाचे अध्यक्ष प्यारे खान यांनी मुंबई बॉम्बस्फोट प्रकरणातील आरोपी अबू सालेमची कारागृहात भेट घेतल्याच्या मुद्द्यावरूनही राऊत यांनी सरकारला घेरले. प्यारे खान यांची नियुक्ती याच सरकारने केली असल्याने मुख्यमंत्री देवेंद्र फडणवीस आणि त्यांच्या सहकाऱ्यांनी यावर स्पष्टीकरण द्यावे, अशी मागणी त्यांनी केली.

उपमुख्यमंत्री एकनाथ शिंदे यांना मिळणाऱ्या एका पुरस्कारावरही राऊत यांनी उपरोधिक टीका केली. भवानी तलवार घेऊन लंडनला या, असे आव्हान देत त्यांनी या मुद्द्यावरून सरकारवर निशाणा साधला.

कर्नाटकातील काँग्रेस मंत्र्यांवर झालेल्या ईडीच्या कारवाईवर बोलताना राऊत यांनी महाराष्ट्रातील कथित घोटाळ्यांचा विषय काढला. महाराष्ट्रात आणि राम मंदिर ट्रस्टमध्ये घोटाळे झाले तेव्हा ईडी कुठे होती, असा सवाल त्यांनी केला.