इंस्टा रील्स व्हायरल करण्याचे आमिष दाखवून बलात्कार, महिलेच्या तक्रारीवरून अटक

नागपुरात इन्स्टाग्रामवर रील्स व्हायरल करण्याच्या नादात एका विवाहितेला बलात्काराला सामोरे जावे लागल्याची घटना समोर आली आहे. खासगी कंपनीत काम करणाऱ्या पीडित महिलेला इन्स्टाग्रामवर रील्स बनवण्याची आवड होती. याच आवडीतून, याच माध्यमातून तिची ओळख अकोल्यातील गजानन नगर येथे राहणाऱ्या अमीर अख्तर हुसैन याच्याशी झाली आणि दोघांमध्ये मैत्री झाली.

आरोपी अमीरने तिचे व्हिडिओ एडिट करून ते अधिक आकर्षक बनवण्याचे आणि इन्स्टाग्रामवर व्हायरल करून देण्याचे आमिष महिलेला दाखवले. या आश्वासनाच्या बहाण्याने तो हळूहळू महिलेच्या अधिकाधिक जवळ जाऊ लागला. काही काळानंतर महिलेला त्याच्याबाबत संशय आला आणि तिने आरोपीशी बोलणे बंद केले, त्याच्याशी असलेला संपर्क तोडून टाकला.

यानंतर अमीर महिलेला धमक्या देऊ लागल्याचा आरोप आहे. तो तिच्या घरी येऊ लागला आणि तिच्या पतीला सर्व काही सांगून देण्याची तसेच तिच्या मुलांना मारण्याची धमकी देत असे, असे पोलिसांचे म्हणणे आहे. या धमक्यांच्या दबावाखाली आरोपीने महिलेला नंदनवन येथील एका हॉटेलमध्ये नेऊन तिच्यावर जबरदस्तीने बलात्कार केल्याचा आरोप आहे. या घटनेनंतरही तो हे कृत्य पुन्हा पुन्हा करण्यासाठी महिलेवर सतत दबाव टाकत होता, असा आरोप आहे.

अखेर या सगळ्या त्रासाला कंटाळून पीडित महिलेने वाठोडा पोलीस स्टेशनमध्ये याबाबत तक्रार दाखल केली. पीएसआय पूजा शेळके यांनी या प्रकरणाची चौकशी केली. चौकशीअंती गुन्हा दाखल करून पोलिसांनी आरोपी अमीरला अटक केली आहे.