इंजिनिअरिंग प्रवेश: चौथ्या फेरीअखेर राज्यात 1.52 लाख विद्यार्थ्यांना जागा, कॉम्प्युटरला सर्वात जास्त मागणी
राज्य सामाईक प्रवेश परीक्षा कक्षाच्या चार फेऱ्यांनंतर इंजिनिअरिंगच्या 2 लाख 3 हजार 293 जागांपैकी 1 लाख 52 हजार 452 जागा भरल्या. पुणे जिल्हा आणि सावित्रीबाई फुले पुणे विद्यापीठ यात आघाडीवर आहे.
राज्यातल्या इंजिनिअरिंग अॅडमिशनच्या यंदाच्या प्रवेश प्रक्रियेतल्या चार फेऱ्या आता पूर्ण झाल्या आहेत. महाराष्ट्र राज्य सामाईक प्रवेश परीक्षा कक्षाकडून शैक्षणिक वर्ष 2026-27 साठी ही प्रक्रिया राबवली गेली. या चार फेऱ्यांमध्ये इंजिनिअरिंगच्या एकूण 2 लाख 3 हजार 293 जागांपैकी 1 लाख 52 हजार 452 म्हणजे तब्बल 74.99 टक्के विद्यार्थ्यांना प्रवेश मिळाला आहे.
यंदा प्रवेशासाठीची ऑनलाईन नोंदणी 2 जुलैपासून सुरू झाली होती आणि 19 जुलैला ती बंद झाली. या काळात राज्यभरातून 2 लाख 45 हजार 646 विद्यार्थ्यांनी नोंदणी केली होती. राज्यातल्या 380 इंजिनिअरिंग कॉलेजांमध्ये एकूण 111 कोर्सेस उपलब्ध असून, मॅनेजमेंट कोट्यासकट जागांची संख्या 2 लाख 18 हजार 976 इतकी आहे. यातल्या प्रवेश प्रक्रियेसाठी खुल्या असलेल्या 2 लाख 3 हजार 293 जागांपैकी चौथ्या फेरीअखेर 1 लाख 52 हजार 452 विद्यार्थ्यांनी राज्यातल्या 17 विद्यापीठांतर्गत येणाऱ्या 380 कॉलेजांमध्ये आणि 111 वेगवेगळ्या शाखांमध्ये प्रवेश निश्चित केला.
आता कॅप फेऱ्यानंतर संस्थात्मक फेरी आणि मॅनेजमेंट फेरीचे प्रवेश सुरू असून हे प्रवेश 14 सप्टेंबरपर्यंत चालणार आहेत. कॅपमधून शिल्लक राहिलेल्या 50 हजार 841 जागा संस्थात्मक फेरीसाठी उपलब्ध आहेत, तर मॅनेजमेंट कोट्यात 15 हजार 683 जागा रिकाम्या आहेत.
शाखानिहाय बघितलं तर यंदाही कॉम्प्युटर इंजिनिअरिंगला विद्यार्थ्यांची सर्वात जास्त पसंती मिळाली आहे. या शाखेत 23 हजार 230 विद्यार्थ्यांनी प्रवेश घेतला. त्यापाठोपाठ मेकॅनिकल इंजिनिअरिंगमध्ये 16 हजार 918, इलेक्ट्रॉनिक्स अँड टेलिकम्युनिकेशन इंजिनिअरिंगमध्ये 15 हजार 971, कॉम्प्युटर सायन्स अँड इंजिनिअरिंगमध्ये 15 हजार 787, इन्फॉर्मेशन टेक्नॉलॉजीमध्ये 12 हजार 494, सिव्हिल इंजिनिअरिंगमध्ये 12 हजार 95 आणि इलेक्ट्रिकल इंजिनिअरिंगमध्ये 10 हजार 192 विद्यार्थ्यांनी प्रवेश घेतला. याशिवाय आर्टिफिशियल इंटेलिजन्स अँड डाटा सायन्समध्ये 8 हजार 816, कॉम्प्युटर सायन्स अँड इंजिनिअरिंग (आर्टिफिशियल इंटेलिजन्स अँड मशीन लर्निंग) मध्ये 5 हजार 480 आणि आर्टिफिशियल इंटेलिजन्स अँड मशीन लर्निंगमध्ये 3 हजार 936 विद्यार्थ्यांनी प्रवेश घेतल्याची नोंद आहे.
विद्यापीठनिहाय आकडेवारी बघितली तर सीईटी कक्ष राज्यातल्या 17 सार्वजनिक विद्यापीठांतर्गत असलेल्या इंजिनिअरिंग कॉलेजांमधले प्रवेश करते. यात पुण्याच्या सावित्रीबाई फुले पुणे विद्यापीठांतर्गत असणाऱ्या कॉलेजांमध्ये सर्वात जास्त 53 हजार 973 विद्यार्थ्यांनी प्रवेश घेतला. त्यानंतर लोणेरेच्या डॉ. बाबासाहेब आंबेडकर तंत्रज्ञान विद्यापीठांतर्गत 30 हजार 909, मुंबई विद्यापीठांतर्गत 25 हजार 358, नागपूरच्या राष्ट्रसंत तुकडोजी महाराज नागपूर विद्यापीठांतर्गत 14 हजार 24 आणि कोल्हापूरच्या शिवाजी विद्यापीठांतर्गत 8 हजार 416 विद्यार्थ्यांनी प्रवेश घेतला.
जिल्हानिहाय आकडेवारीतही पुणे जिल्हा पहिल्या क्रमांकावर आहे. पुणे जिल्ह्यातल्या इंजिनिअरिंग कॉलेजांमध्ये 41 हजार 122 विद्यार्थ्यांनी प्रवेश घेतला. त्यापाठोपाठ नागपूर जिल्ह्यात 15 हजार 487, नाशिक जिल्ह्यात 10 हजार 570, कोल्हापूर जिल्ह्यात 9 हजार 669 आणि मुंबई उपनगर जिल्ह्यात 9 हजार 12 विद्यार्थ्यांनी प्रवेश निश्चित केला.
