होर्मुझच्या सामुद्रधुनीत 10 जहाजांवर हल्ला; इराणकडून प्रत्युत्तरात मोठे हल्ले

अमेरिका आणि इराण यांच्यातील तणाव पुन्हा एकदा टोकाला गेला आहे. मंगळवारी अमेरिकेच्या लष्कराने इराणच्या ५ तेलवाहू जहाजांवर हल्ला केला. या हल्ल्यानंतर काही तासांतच इराणने जशास तसे उत्तर देत जॉर्डनमधील अमेरिकेच्या लष्करी तळाच्या दिशेने २० बॅलिस्टिक क्षेपणास्त्रे डागली. जॉर्डनच्या लष्कराने सांगितले की, त्यांच्या हवाई संरक्षण यंत्रणेने यापैकी १८ क्षेपणास्त्रे हवेतच पाडली, तर उरलेली २ क्षेपणास्त्रे लोकवस्तीपासून लांब असलेल्या भागात जाऊन पडली. त्यामुळे या हल्ल्यात कोणतीही मोठी जीवितहानी झाली नसल्याचे जॉर्डनच्या लष्कराने स्पष्ट केले आहे.

अमेरिकेच्या सेंट्रल कमांडने असा दावा केला आहे की, गेल्या दोन दिवसांत इराणने बॅलिस्टिक क्षेपणास्त्रांच्या मदतीने अमेरिकेच्या नौदलाच्या युद्धनौकेला दोनदा लक्ष्य करण्याचा प्रयत्न केला होता. म्हणजेच एकाच युद्धनौकेवर दोन वेळा हल्ला करण्याचा प्रयत्न झाला, असे अमेरिकेचे म्हणणे आहे. याला उत्तर म्हणून अमेरिकेच्या लष्कराने इराणच्या रिव्होल्यूशनरी गार्ड कॉर्प्सच्या (आयआरजीसी) तेलवाहू जहाजांवर हल्ला चढवला. अमेरिकेच्या या कारवाईनंतर इराणने होर्मुझच्या सामुद्रधुनीत तब्बल १० जहाजांवर हल्ला केल्याचा दावा केला. यात अमेरिकेची २ जहाजे आणि ८ तेलवाहू जहाजांचा समावेश असल्याचे इराणने सांगितले. ही जहाजे प्रतिबंधित क्षेत्रातून प्रवास करत असल्याचे कारण इराणने दिले आहे. याशिवाय अमेरिकेचा एक पाणबुडी ड्रोन ताब्यात घेतल्याचाही दावा इराणने केला आहे.

सेंटकॉमच्या माहितीनुसार, इराणने बॅलिस्टिक क्षेपणास्त्रांनी अमेरिकेच्या नौदलाच्या युद्धनौकेला लक्ष्य करण्याचा प्रयत्न केला होता, मात्र अमेरिकेच्या युद्धनौकेने हा हल्ला यशस्वीपणे परतवून लावला. म्हणजेच इराणकडून डागण्यात आलेले क्षेपणास्त्र युद्धनौकेपर्यंत पोहोचण्यापूर्वीच निष्प्रभ करण्यात आले. या घटनेत अमेरिकेचा एकही जवान जखमी झाला नसून अमेरिकेच्या युद्धनौका सध्या त्या भागात गस्त घालत आहेत, असे सेंटकॉमने सांगितले.

सेंटकॉमने दिलेल्या माहितीनुसार, अमेरिकेने ओमानच्या आखातातील चार तेलवाहू जहाजे आणि खारग बेटाजवळील एका जहाजाला लक्ष्य केले. म्हणजे एकूण पाच जहाजांवर अमेरिकेने हल्ला केला. अमेरिकेच्या दाव्यानुसार, हल्ला झालेली ही पाचही तेलवाहू जहाजे अब्जावधी डॉलर्सच्या एका गुप्त नेटवर्कचा भाग होती, जे इराणच्या रिव्होल्यूशनरी गार्ड आणि त्यांच्या मित्र राष्ट्रांसाठी निधी उभा करत असल्याचे सांगण्यात आले. हल्ला करण्यापूर्वी संबंधित जहाजांवरील कर्मचाऱ्यांना जहाजे रिकामी करण्याच्या सूचना देण्यात आल्या होत्या, असे अमेरिकेच्या लष्कराने स्पष्ट केले आहे. त्यामुळे या हल्ल्यांमध्ये जहाजांवरील कर्मचाऱ्यांना कोणतीही इजा झाली नाही, असेही अमेरिकेच्या लष्कराने नमूद केले आहे.