एचडीएफसी बँकेच्या एक्झिक्युटिव्ह डायरेक्टरपदी जिमी टाटा; आरबीआयची मंजुरी, ओळख करून घ्या

एचडीएफसी बँकेने नुकतीच एक्झिक्युटिव्ह डायरेक्टर पदावर नवी नियुक्ती जाहीर केली आहे. जिमी टाटा यांची तीन वर्षांच्या कालावधीसाठी पूर्णवेळ संचालक म्हणून निवड करण्यात आली असून, भारतीय रिझर्व्ह बँकेची मंजुरी मिळाल्यानंतर ही नियुक्ती प्रभावी होणार आहे. बँकिंग क्षेत्रात या निर्णयाची सध्या जोरदार चर्चा सुरू आहे.

जिमी टाटा सध्या बँकेचे मुख्य क्रेडिट अधिकारी म्हणून काम पाहत आहेत. त्यांनी जमनालाल बजाज इन्स्टिट्यूट ऑफ मॅनेजमेंटमधून मास्टर ऑफ फायनान्शियल मॅनेजमेंटची पदवी घेतली आहे. शिवाय ते इन्स्टिट्यूट ऑफ चार्टर्ड फायनान्शियल अॅनालिस्ट्स ऑफ इंडियाचे चार्टर्ड फायनान्शियल अॅनालिस्ट देखील आहेत. बँकिंग आणि वित्तीय सेवा क्षेत्रातला त्यांचा अनुभव ३५ वर्षांहून जास्त आहे.

टाटा यांनी करिअरची सुरुवात १९८७ साली स्ट्रॅटेजिक कन्सल्टंट्स प्रायव्हेट लिमिटेडमध्ये सल्लागार म्हणून केली होती. दोन वर्षांनी ते एप्पल इंडस्ट्रीज लिमिटेडमध्ये रुजू झाले, तिथे पुढे त्यांनी होलसेल लीजिंग आणि हायर पर्चेस विभागाचे प्रमुखपद सांभाळले. १९९४ मध्ये ते एचडीएफसी बँकेच्या कॉर्पोरेट बँकिंग विभागात रिलेशनशिप मॅनेजर म्हणून दाखल झाले आणि पुढे या विभागाचे प्रमुख बनले. जून २०१३ मध्ये त्यांनी बँकेच्या चीफ रिस्क ऑफिसर पदाची जबाबदारी स्वीकारली होती.

एचडीएफसी बँकेतील जबाबदारीशिवाय जिमी टाटा हे इंटरनॅशनल असेट रिकन्स्ट्रक्शन कंपनी प्रायव्हेट लिमिटेड (IARC) आणि एचडीबी फायनान्शियल सर्विसेस लिमिटेड यांच्या संचालक मंडळावरही कार्यरत आहेत. याशिवाय ते एचडीबी एम्प्लॉइज वेलफेयर ट्रस्टचे विश्वस्तही आहेत.

दुसरीकडे, बँकेच्या संचालक मंडळाने व्ही. श्रीनिवास रंगन यांच्या कार्यकारी संचालक या पदासह पूर्णवेळ संचालक म्हणून पुनर्नियुक्तीलाही मंजुरी दिली आहे. ही नियुक्ती २३ नोव्हेंबर २०२६ ते २२ नोव्हेंबर २०२७ अशा एक वर्षाच्या कालावधीसाठी असेल आणि त्यासाठी आवश्यक मंजुऱ्या अजून बाकी आहेत.

बँकेने आणखी एक पूर्णवेळ संचालक पद तयार करण्यालाही मंजुरी दिली आहे. यामुळे व्यवस्थापकीय संचालक आणि मुख्य कार्यकारी अधिकारी सोडून बँकेच्या संचालक मंडळावरील पूर्णवेळ संचालकांची संख्या चार होणार आहे. उपकंपन्यांमध्ये चांगला समन्वय आणि देखरेख ठेवण्यासाठी तसेच उत्तराधिकार नियोजन आराखडा मजबूत करण्यासाठी हे नवे पद तयार करण्यात आल्याचं बँकेने म्हटलं आहे. नवे एमडी आणि सीईओ पदभार स्वीकारल्यानंतर त्यांच्याशी चर्चा करून या पदावर नियुक्ती केली जाणार असून, त्यानंतर आवश्यक भागधारकांची मंजुरीही घेतली जाईल, असं बँकेने स्पष्ट केलं आहे.

एचडीएफसी बँकेने व्यवस्थापकीय संचालक आणि मुख्य कार्यकारी अधिकारी पदांसाठी दोन उमेदवारांची नावे आरबीआयकडे पाठवली आहेत. या नावांची प्राधान्यक्रमानुसार यादी करण्यात आली असून, आरबीआयच्या मंजुरीच्या अधीन राहून तीन वर्षांच्या कार्यकाळासाठीच्या प्रस्तावित पगाराचा तपशीलही सादर करण्यात आला आहे. मात्र या उमेदवारांची ओळख बँकेने अद्याप जाहीर केलेली नाही.