गुलजारांच्या शब्दांना अमित त्रिवेदींचे संगीत, बी प्राकच्या आवाजातलं 'सच का दायरा' रिलीज

बॉलिवूडमधल्या सगळ्यात चर्चेत असलेल्या आणि प्रेक्षक ज्याची आतुरतेने वाट बघत होते, त्या 'दायरा' सिनेमाची उत्सुकता आता शिगेला पोहोचलीय. करीना कपूर खान आणि पृथ्वीराज सुकुमारन या सिनेमात पहिल्यांदाच एकत्र स्क्रीनवर दिसणार आहेत, आणि हीच गोष्ट प्रेक्षकांची उत्सुकता आणखी वाढवतेय. हे लक्षात घेऊनच निर्मात्यांनी सिनेमातलं 'सच का दायरा' हे भावनिक आणि परिणामकारक गाणं आता रिलीज केलंय. गाणं आल्याआल्या प्रेक्षकांनी त्याला भरभरून प्रतिसाद द्यायला सुरुवात केलीय.

हे गाणं म्हणजे केवळ एक गाणं नाही, तर सिनेमाच्या कथेतला एक महत्त्वाचा धागा आहे. या गाण्याचे भावूक शब्द राष्ट्रीय पुरस्कार विजेते ज्येष्ठ गीतकार गुलजार यांनी लिहिलेत, तर संगीतकार अमित त्रिवेदी यांनी त्याला चाल दिलीय. गायक बी प्राक यांनी आपल्या खास आवाजात हे गाणं गायलंय. सत्य, वेगवेगळे दृष्टिकोन आणि बदलत्या परिस्थितीनुसार बदलणारी विचारसरणी, या सगळ्याचं सुंदर चित्रण या गाण्यात दिसतं, आणि त्यामुळेच सिनेमाचा भावनिक भाग अधिक ठळक होतो.

करीना कपूर खानने या गाण्याला सिनेमाचा 'भावनिक गाभा' म्हणून संबोधलंय. गुलजार यांचे शब्द, अमित त्रिवेदींचं संगीत आणि बी प्राकचा आवाज हे तिन्ही एकत्र येऊन गाण्याला एक वेगळी उंची देतात, असं तिने सांगितलंय. पृथ्वीराज सुकुमारनच्या मते हे गाणं प्रेक्षकांना विचार करायला भाग पाडतं. गाण्याचे बोल आणि संगीत मिळून ते सिनेमाच्या आतल्या आवाजासारखं समोर येतं, असं त्याने नमूद केलंय.

गायक बी प्राक याने सांगितलं की, या गाण्यात भावनांची ताकद आणि एक प्रकारची गूढ शांतता, या दोन्हीचा समतोल साधणं हे रेकॉर्डिंगदरम्यान सर्वात मोठं आव्हान होतं. अमित त्रिवेदींच्या मते या गाण्यासाठी अशाच आवाजाची गरज होती जो कथेची गंभीरता नीट समजून घेईल. गुलजार यांच्या खोल शब्दांना बी प्राकच्या आवाजाने अधिक ताकद मिळालीय.

सिनेमाच्या दिग्दर्शिका मेघना गुलजार यांनी सांगितलं की, 'सच का दायरा' या गाण्यात अस्वस्थता, हतबलता आणि न्यायाची आशा या भावनांचं मिश्रण आहे. गाण्याची संकल्पना मांडताना गुलजार म्हणाले, "सत्य हे कधीच एकांगी किंवा एका रेषेपुरतं मर्यादित नसतं. वेळ, परिस्थिती आणि दृष्टिकोनानुसार सत्याचं रूप बदलत जातं, आणि हेच या गाण्यातून मांडलेलं आहे."

मेघना गुलजार यांच्या दिग्दर्शनाखाली आणि 'जंगली पिक्चर्स'च्या निर्मितीत बनलेल्या या सिनेमाकडून प्रेक्षकांच्या अपेक्षा खूप वाढल्यात. हे गाणं सध्या सगळ्या प्रमुख ऑडिओ प्लॅटफॉर्मवर ऐकायला उपलब्ध आहे, तर त्याचा पूर्ण व्हिडिओ 'टाइम्स म्युझिक'च्या युट्यूब चॅनेलवर बघता येतो. 'दायरा' हा सिनेमा येत्या 18 सप्टेंबरला सिनेमागृहात प्रदर्शित होणार आहे.