गणेशोत्सवासाठी सोपी रेसिपी: सुकामेवा वापरून बनवा टेस्टी ड्रायफ्रुट्स मोदक

गणेशोत्सव सुरू झाला की घराघरात मोदकांचा घमघमाट सुरू होतो. उकडीचे मोदक आणि तळणीचे मोदक हे नेहमीचेच असले, तरी हल्ली वेगवेगळ्या चवीचे मोदक बनवण्याची पद्धत वाढली आहे. यातलाच एक खास आणि दिसायलाही सुंदर पर्याय म्हणजे ड्रायफ्रुट्स मोदक. काजू, बदाम, पिस्ता, अक्रोड यांसारखा सुकामेवा वापरून हे मोदक अगदी सहज तयार करता येतात.

या मोदकासाठी फार वेळ किंवा मोठी तयारी लागत नाही. सुकामेवा हलकासा भाजून त्याची पूड करायची आणि त्यात खजूर किंवा थोडासा गूळ मिसळला की सारण लगेच तयार होते. त्यामुळे सणासुदीच्या गडबडीत कमी वेळात घरच्या घरी काहीतरी चांगलं बनवायचं असेल तर ही रेसिपी नक्की ट्राय करता येईल. लहानांपासून मोठ्यांपर्यंत सगळ्यांना आवडेल असा हा मोदक बाप्पाच्या नैवेद्यासाठी अगदी परफेक्ट ठरतो.

लागणारं साहित्य

१ कप काजू, १ कप बदाम, १/२ कप पिस्ता, १/२ कप अक्रोड, १ कप बिया काढलेले खजूर, २ चमचे तूप, १/२ चमचा वेलची पूड, २ चमचे खसखस, २ चमचे किसलेले सुके खोबरे आणि सजावटीसाठी थोडे बदाम-पिस्त्याचे काप एवढं साहित्य लागतं.

बनवण्याची पद्धत

सगळ्यात आधी कढई गरम करून त्यात काजू, बदाम, पिस्ता आणि अक्रोड मंद आचेवर हलकेसे भाजून घ्यायचे. सुकामेवा जास्त भाजू नये, नाहीतर चव बिघडते. भाजलेला सुकामेवा थंड झाला की मिक्सरमध्ये भरडसर वाटून घ्यायचा.

त्यानंतर खजूर बारीक चिरून घ्यायचे. खजूर जास्त कडक असेल तर तो थोडा वेळ कोमट पाण्यात भिजवून ठेवायचा आणि नंतर पाणी पूर्णपणे काढून टाकायचे. त्याच कढईत खसखस आणि सुके खोबरे हलकेसे भाजून घ्यायचे आणि त्यात वेलची पूड मिसळायची.

कढईत तूप गरम करून त्यात चिरलेला खजूर टाकायचा आणि मंद आचेवर काही मिनिटं परतत राहायचं. खजूर मऊ झाला की त्यात वाटलेला सुकामेवा, खसखस आणि खोबरे घालायचं. सगळं साहित्य नीट एकजीव करून घ्यायचं. मिश्रण कढईपासून सुटायला लागलं की गॅस बंद करायचा आणि हाताळता येईल इतकं कोमट होऊ द्यायचं.

हाताला थोडं तूप लावून मिश्रणाचा छोटा गोळा घ्यायचा. मोदकाच्या साच्यात भरून घट्ट दाबायचा आणि हलक्या हाताने बाहेर काढायचा. साचा नसेल तर हातानेच मोदकाला आकार देता येतो. तयार झालेल्या मोदकांवर बदाम-पिस्त्याचे काप लावून सजावट करायची. मोदक पूर्ण थंड झाल्यावर डब्यात भरून ठेवायचे आणि बाप्पाला नैवेद्य म्हणून अर्पण करायचे.

मिश्रण जर नीट बांधून येत नसेल, तर त्यात थोडा अधिक खजूर घालता येतो. तसंच सुकामेवा वाटताना अगदी बारीक पूड न करता थोडा भरडसर ठेवला, तर मोदकाला छान पोत आणि चव येते.