गणेशोत्सव २०२६ : देशभरातील पाच प्रसिद्ध गणपती पंडाल, एकदा भेट द्यायलाच हवी

गणेशोत्सव आता अगदी उंबरठ्यावर येऊन ठेपला आहे आणि बाप्पाच्या आगमनाची सगळ्यांना ओढ लागलीये. या दिवसांत श्रद्धा आणि उत्साह दोन्ही शिगेला पोहोचलेले असतात. देशभरातल्या वेगवेगळ्या शहरांत मोठमोठे पंडाल उभे राहतात आणि तिथे बाप्पाच्या दर्शनासाठी भाविकांची तुफान गर्दी होते. यंदा गणेशोत्सव १४ सप्टेंबरपासून सुरू होणार आहे. त्या निमित्तानं देशातल्या अशाच काही खास आणि भव्य गणपती पंडालांची ही ओळख.

सगळ्यात आधी नाव येतं ते मुंबईच्या लालबागच्या राजाचं. गणेशोत्सव आणि लालबागचा राजा यांचं नातं जरा वेगळंच आहे. देशभरातल्या पंडालांमध्ये लालबागच्या राजाचं नाव नेहमी सगळ्यात आधी घेतलं जातं. दरवर्षी लाखो भाविक इथे बाप्पाच्या दर्शनासाठी गर्दी करतात. १९३४ साली लालबागचा राजा गणेशोत्सव मंडळानं याची सुरुवात केली होती. हा गणपती "नवसाला पावणारा गणपती" म्हणून जगभर ओळखला जातो. भव्य सजावट, जुनी परंपरा आणि भक्तांची अतूट श्रद्धा यामुळे हे ठिकाण खूप लोकप्रिय आहे.

पुण्यात गेल्यावर श्रीमंत दगडूशेठ हलवाई गणपतीचं दर्शन घेतलं नाही, तर तुमची पुण्याची ट्रीप अपुरीच राहते. दरवर्षी गणेशोत्सवात इथेही भक्तांची प्रचंड गर्दी बघायला मिळते. महाराष्ट्रातल्या सगळ्यात प्रसिद्ध आणि श्रीमंत मंदिरांपैकी हे एक मंदिर मानलं जातं. इथे भक्ती, संस्कृती आणि सुरेख सजावट या तिन्हींचा अनुभव एकत्र घेता येतो.

दिल्लीतही गणेशोत्सवाचा उत्साह काही कमी नाही. या काळात दिल्लीही भक्तीच्या रंगात न्हाऊन निघते. इथल्या लक्ष्मी नगर भागातला महाराजा गणेश पंडाल खूप प्रसिद्ध आहे. अनेक वर्षांपासून इथे गणपतीच्या दर्शनासाठी भाविकांची मोठी गर्दी जमते.

चेन्नईत इंदु मुनानी का गणेश चतुर्थी पंडाल आयोजित केला जातो. पर्यावरणपूरक आणि वेगळ्या धाटणीच्या थीमसाठी हा पंडाल ओळखला जातो. मागच्या वर्षी इथे तब्बल ५ हजार पुस्तकांपासून गणेशाची मूर्ती साकारण्यात आली होती. सण संपल्यावर ती पुस्तकं स्थानिक आणि गरजू लोकांना वाटून एक चांगला सामाजिक संदेशही देण्यात आला.

हैदराबादमध्ये स्वातंत्र्यसैनिक एस. शंकरय्या यांनी १९५४ साली खैरताबाद इथं श्री गणेश उत्सव समितीची स्थापना केली होती. सुरुवातीला फक्त एक फूट उंचीच्या मूर्तीपासून याची सुरुवात झाली होती. आज मात्र इथे गणपतीची अत्यंत उंच आणि भव्य मूर्ती पाहायला मिळते. दरवर्षी हजारो भाविक ही उंच मूर्ती बघण्यासाठी इथे गर्दी करतात. विशेष म्हणजे ही मूर्ती पर्यावरणपूरक साहित्यापासूनच बनवली जाते.