Ganeshotsav 2026: नैवेद्यासाठी सोपा पदार्थ, १० मिनिटांत बनवा रबडीसारखी घट्टसर शाही साबुदाणा खीर

सण-वारांच्या दिवसांत घरोघरी वेगवेगळे गोडाचे पदार्थ बनवले जातात. शेवयांची खीर, गुलाबजाम, बासुंदी, रव्याची खीर हे पदार्थ नेहमीच केले जातात. पण दर वेळी तेच ठराविक पदार्थ बनवण्याऐवजी यंदा वाटीभर साबुदाण्याचा वापर करून घट्टसर शाही साबुदाणा खीर बनवून बघता येईल. ही खीर चवीला चांगली तर आहेच, शिवाय शरीरासाठीही चांगली मानली जाते.

उपवासाच्या दिवशी नेहमी तिखट किंवा तेलकट पदार्थ खाण्याऐवजी साबुदाण्यापासून बनवलेली ही खीर खाल्ल्यास तब्येतीलाही बरे राहते. बरेचदा खीर बनवताना दूध फाटते किंवा खीर कढईला चिकटते, अशी तक्रार असते. मात्र योग्य पद्धतीने बनवल्यास पदार्थाची चव अजिबात बिघडत नाही आणि खीर चांगली लागते.

गणपती बाप्पाच्या नैवेद्यासाठी घरोघरी वेगवेगळे पदार्थ बनवले जातात, त्यातच साबुदाण्याची ही चविष्ट खीर देखील बनवता येऊ शकते. रबडीसारखी घट्टसर शाही साबुदाणा खीर बनवण्याची रेसिपी पुढीलप्रमाणे.

ही खीर बनवण्यासाठी साहित्य म्हणून साबुदाणे, साखर, काजू, बदाम, वेलची पावडर, अंजीर, चारोळी, केशर, मीठ आणि तूप एवढे जिन्नस लागतात. हे सगळे जिन्नस घरात सहज उपलब्ध असतात, त्यामुळे ही खीर बनवणे फारसे कठीण नाही.

खीर बनवण्यासाठी सर्वात आधी कढईत दूध गरम करण्यासाठी ठेवावे. दुधाला एक उकळी आल्यावर गॅस बारीक करून दूध उकळत ठेवावे. त्यानंतर गरम दुधात केशराच्या काड्या घालून व्यवस्थित मिक्स कराव्यात. त्यात आधी भिजवलेले साबुदाणे घालून ते चांगले शिजवून घ्यावेत.

साबुदाणे शिजल्यानंतर त्यांचा रंग पूर्णपणे बदलतो. साबुदाणे शिजत असताना चमच्याने सतत मिक्स करत राहावे, जेणेकरून ते कढईला चिकटणार नाहीत. दूध फाटण्याची किंवा साबुदाणे कढईला चिकटण्याची जी अनेकांना तक्रार असते, ती या पद्धतीने टाळता येते. साबुदाणे व्यवस्थित शिजल्यावर त्यात तुपावर भाजलेले काजू, बदाम, सुके खजूर, अंजीर आणि चारोळी घालून नीट मिक्स करून एक उकळी काढून घ्यावी.

सगळ्यात शेवटी सर्व साहित्य व्यवस्थित मिक्स झाल्यानंतर त्यात साखर आणि चिमूटभर मीठ घालून पुन्हा मिक्स करावे. अशा प्रकारे सोप्या पद्धतीने रबडीसारखी घट्टसर शाही साबुदाणा खीर तयार होते. गणपती बाप्पाच्या नैवेद्यासाठी हा पदार्थ खास बनवता येतो आणि हा पदार्थ घरातील सगळ्यांना नक्कीच आवडेल.