मसूद अझरच्या अटकेसाठी पाकिस्तानचे ७० लाखांचे बक्षीस, एफएटीएफ बैठकीआधीच नाटक?

फायनान्शिअल ॲक्शन टास्क फोर्स म्हणजेच एफएटीएफची पुढची बैठक ऑक्टोबरमध्ये होणार आहे आणि त्याआधीच पाकिस्तान सरकारने जुनी खेळी पुन्हा एकदा खेळली आहे. जैश-ए-मोहम्मद या दहशतवादी संघटनेचा प्रमुख मसूद अझरला फेडरल इन्व्हेस्टिगेशन एजन्सी म्हणजे एफआयएच्या मोस्ट वॉन्टेड दहशतवाद्यांच्या रेड बुकमध्ये टाकण्यात आले असून त्याच्या अटकेसाठी ७० लाख रुपयांचे बक्षीस जाहीर करण्यात आले आहे.

ऑक्टोबरमधल्या एफएटीएफच्या बैठकीत ब्लॅक किंवा ग्रे लिस्टमध्ये जाणे टाळण्यासाठीच पाकिस्तानने ही घाईघाईने पावले उचलल्याचे स्पष्ट दिसतेय. आंतरराष्ट्रीय दबाव आला की असे नाटक करायची पाकिस्तानची जुनी सवय आहे. काही महिन्यांपूर्वी भारतीय लष्कराने ऑपरेशन सिंदूर राबवत पाकिस्तान आणि पाकव्याप्त काश्मीरमधल्या ९ दहशतवादी तळांवर यशस्वी हल्ला केला होता. त्यानंतर मसूद अझरने स्वतः निवृत्त होऊन कुटुंबातल्या ९ जणांची हत्या झाल्याची जाहीर कबुली दिली होती. आता मात्र पाकिस्तान सरकार तो देशातच नाही असा कांगावा करतंय.

याआधी पाकिस्तानने मसूद अझर अफगाणिस्तानात लपून बसल्याचा दावा केला होता. २०२१ साली एफआयएने त्याला पकडून देणाऱ्याला ५० लाख रुपयांचे बक्षीस जाहीर केले होते. पाच वर्षांनी आता हे बक्षीस २० लाखांनी वाढवून ७० लाख रुपये करण्यात आले आहे. पण भारतीय गुप्तचर यंत्रणांच्या तांत्रिक तपासात आणि गेल्या सहा महिन्यांतल्या माहितीत वेगळेच सत्य समोर आले आहे. मसूद अझर अफगाणिस्तानात नसून पाकिस्तानच्याच सिंध प्रांतातील नवाबशाह शहरात सुरक्षितपणे लपून बसलाय.

एफआयएने जाहीर केलेल्या नव्या रेड बुकमध्ये २६/११ च्या मुंबई हल्ल्यातल्या गुन्हेगारांना थेट किंवा अप्रत्यक्ष मदत करणाऱ्या १९ दहशतवाद्यांची नावे आहेत. यात हल्लेखोरांना पैसा पुरवणारे आणि त्यांना समुद्रमार्गे मुंबईत आणण्यासाठी बोटी चालवायला मदत करणारे सगळे आले. या यादीतल्या १७ जणांचे फोटो आणि हल्ल्यातील त्यांची नेमकी भूमिका दिलेली आहे. पण दोन प्रमुख व्यक्तींचे फोटो, लश्कर-ए-तोयबाशी असलेले त्यांचे संबंध आणि त्यांची भूमिका मात्र यादीतून हुशारीने गाळण्यात आलीय. तुरबतचा मोहम्मद खान, ज्याने हल्लेखोरांना मुंबईकडे नेणारी अल-हुसैनी बोट पुरवली होती, त्याचे नाव यादीत असले तरी फोटो आणि लश्कर-ए-तोयबाशी संबंध काढून टाकण्यात आलेत. बहावलनगरच्या अब्दुल रहमानचा फोटो आणि माहिती २०२१ च्या यादीत होती, पण यंदाच्या यादीतून ती गायब आहे. अल-हुसैनी आणि अल-फौज या बोटींनी १० दहशतवाद्यांना मुंबईत उतरवणाऱ्या लश्कर-ए-तोयबाच्या ११ प्रमुख दहशतवाद्यांची नावे मात्र अजून यादीत कायम आहेत.

एकीकडे पाकिस्तान सरकार मसूद अझरवर ७० लाखांचे बक्षीस लावून जागतिक समुदायाची दिशाभूल करतंय, तर दुसरीकडे जैश-ए-मोहम्मदच्या एका दहशतवाद्याचा व्हिडिओ समोर आलाय, ज्यात त्याने संघटनेने गेल्या वर्षभरात दहशतवादी कारवायांसाठी १.५ अब्ज पाकिस्तानी रुपये म्हणजे तब्बल १५० कोटी रुपये जमा केल्याची उघड कबुली दिलीय. यावरून हे स्पष्ट होतंय की ७० लाखांचे बक्षीस हा फक्त एफएटीएफच्या बैठकीत कारवाई दाखवण्यासाठी केलेला देखावा आहे. प्रत्यक्षात पाकिस्तानच्या जमिनीवर दहशतवादी संघटना कोट्यवधी रुपयांचा निधी सहज गोळा करत आहेत.