अॅस्टन मार्टिनची पहिली रस्त्यावर धावणारी बाईक; 130 bhp इंजिन, फक्त 300 युनिट्स

लक्झरी कारसाठी जगभर प्रसिद्ध असलेल्या अॅस्टन मार्टिनने आता मोटरसायकल विश्वातही मोठं पाऊल टाकलंय. कंपनीने बी्रॉघ सुपीरियरसोबत हातमिळवणी करून एएमबी 002 रोडस्टर ही बाईक बाजारात आणलीय. खास गोष्ट म्हणजे अॅस्टन मार्टिनच्या सहकार्याने तयार झालेली ही पहिलीच रोड-लीगल म्हणजे रस्त्यावर चालवता येणारी मोटरसायकल आहे. याआधी कंपनीने बनवलेल्या एएमबी 001 आणि एएमबी 001 प्रो या फक्त ट्रॅकवर चालवण्यासाठीच होत्या, रस्त्यावर नाही.

या बाईकच्या डिझाइनमध्ये अॅस्टन मार्टिनच्या कारमधली झलक स्पष्ट दिसते. बॉडीवर्कसाठी मोठ्या प्रमाणात कार्बन फायबरचा वापर करण्यात आलाय. सोबतच एकाच मेटल ब्लॉकमधून मशीन करून बनवलेलं टायटॅनियम चेसिस दिलंय, ज्याचं वजन जेमतेम 5 किलो आहे. या हलक्या बांधणीमुळे संपूर्ण बाईकचं वजन 190 किलोवर आलंय आणि 50:50 असं वजन वितरण साधलं गेलंय.

इंजिनबद्दल बोलायचं झालं तर या बाईकला नवीन 1,083cc लिक्विड-कूल्ड V-Twin इंजिन बसवलंय. हे इंजिन 130 bhp पॉवर आणि 110 Nm टॉर्क देतं. विशेष म्हणजे हे इंजिन खास कमी आणि मध्यम RPM वर जास्त टॉर्क मिळावा यासाठी ट्यून केलंय. त्यामुळे ही बाईक फक्त वेगासाठी नाही, तर रस्त्यावर सहज आणि नियंत्रणात चालवता यावी यासाठीही तयार करण्यात आलीय.

सस्पेंशनच्या बाबतीतही या बाईकमध्ये बी्रॉघ सुपीरियरचं डबल-विशबोन Fior फ्रंट सस्पेंशन देण्यात आलंय. ब्रेक दाबल्यावर पुढचा भाग जास्त खाली दबू नये आणि वळणावर बाईक स्थिर राहावी हा यामागचा मुख्य उद्देश आहे. डिझाइनमध्ये अॅस्टन मार्टिनच्या साइड-स्ट्रेक आणि हायपरकार्सपासून प्रेरणा घेतलेल्या टेल-लाइटचाही वापर करण्यात आलाय.

ही बाईक मात्र मोठ्या प्रमाणावर तयार होणार नाही. एएमबी 002 रोडस्टरच्या फक्त 300 युनिट्सच बनवल्या जाणार असून प्रत्येक बाईक हाताने तयार केली जाईल. पहिल्या ग्राहकांना डिलिव्हरी 2027 च्या तिसऱ्या तिमाहीपासून सुरू होणार आहे. त्यामुळे ही मोटरसायकल सामान्य प्रीमियम बाईकपेक्षा वेगळी आणि खास वस्तू ठरणार आहे.