भव्य उद्घाटन सोहळ्याने आशियाई स्पर्धा 2026 च्या महाकुंभाला सुरुवात, मनु-पवनने क्रीडानगरीत दिमाखात फडकवला

जपानमधील नागोया शहरात असलेल्या मिजुहो पार्क अॅथलेटिक स्टेडियमवर शनिवारी 20व्या आशियाई स्पर्धेचा उद्घाटन सोहळा मोठ्या थाटामाटात पार पडला. आशिया खंडातील खेळाच्या या मोठ्या उत्सवाची सुरुवात करण्यासाठी संपूर्ण आशियातील खेळाडू एका छताखाली जमले होते. या ऐतिहासिक क्षणाचे सगळ्यांनी साक्षीदार होत आनंद साजरा केला. आशिया खंडातील सर्वात मोठ्या क्रीडा स्पर्धेला अशाप्रकारे नागोया शहरातून सुरुवात झाली.

उद्घाटन सोहळ्यात स्टेडियमवर रंगीबेरंगी रोषणाई करण्यात आली होती, तसेच शानदार सांस्कृतिक कार्यक्रमांचेही आयोजन केले गेले होते. संगीत आणि उत्साहाच्या या वातावरणात पदकतालिका आणि पुढच्या सामन्यांची चर्चा काहीशी मागे पडली होती. उपस्थित खेळाडू आणि क्रीडाप्रेमींनी मात्र या क्षणाचा मनसोक्त आनंद लुटला. जपानचे सम्राट नारुहितो यांनी आयची-नागोयात आशियाई स्पर्धेच्या 20व्या पर्वाच्या सुरुवातीची अधिकृत घोषणा केली. या घोषणेसोबतच स्पर्धेला औपचारिकरित्या सुरुवात झाली असून, पुढच्या दोन आठवड्यांमध्ये इथे हजारो अॅथलेटिक्स सहभागी होणार आहेत.

स्टेडियमवर भारतीय पथकाचे नेतृत्व दोन वेगवेगळ्या खेळांतील खेळाडूंनी केले. ऑलिम्पिक पदक विजेती मनु भाकर आणि कबड्डीपटू पवन सेहरावत यांना भारताचा ध्वज फडकावण्याचा मान देण्यात आला होता. या दोघांनी संपूर्ण स्टेडियममध्ये हातात तिरंगा घेऊन तो दिमाखात फडकावला. यावेळी उपस्थित भारतीय क्रीडाप्रेमींनी टाळ्यांच्या गजरात या जोडीचे स्वागत केले. मनु भाकर ही ऑलिम्पिकमध्ये पदक जिंकलेली नेमबाज असून पवन सेहरावत हा कबड्डीतील स्टार खेळाडू आहे, त्यामुळे या दोघांच्या हाती ध्वज सोपवणे हे भारतीय पथकासाठी विशेष क्षण ठरले.

भारतीय पथक नागोयाला पोहोचले असले, तरी हांगझोऊमधील त्यांच्या कामगिरीच्या आठवणी अजूनही ताज्या आहेत. 2023 सालच्या आशियाई स्पर्धेत भारताने ऐतिहासिक कामगिरी करत तब्बल 107 पदके जिंकली होती, त्यामध्ये 28 सुवर्णपदकांचा समावेश होता. आतापर्यंतची ही भारताची सर्वोत्तम कामगिरी मानली जाते. या कामगिरीमुळे यंदाही भारतीय पथकाकडून चांगल्या कामगिरीच्या अपेक्षा वाढल्या आहेत, आणि नागोयातील या स्पर्धेत भारतीय खेळाडू पुन्हा एकदा तशीच छाप सोडतील अशी आशा क्रीडाप्रेमींना आहे.

प्रत्येक आशियाई स्पर्धेची स्वतःची अशी एक वेगळी गोष्ट असते. कधी परिचित विजेतेच पुन्हा बाजी मारतात, तर कधी एखादा नवखा खेळाडू उंच झेप घेत आपल्या देशाचे नाव उज्ज्वल करण्याचा प्रयत्न करतो. आता या महाकुंभाचा आनंद पुढच्या दोन आठवड्यांमध्ये संपूर्ण आशिया खंडातील क्रीडाप्रेमींना घेता येणार आहे. नागोया शहरातील स्टेडियम्स आणि क्रीडांगणांवर पुढील काळात अनेक खेळाडूंची कामगिरी पाहायला मिळणार आहे.