नोकरी करायची तर 'या' कंपन्यांमध्येच! आशियातील बेस्ट वर्कप्लेस १०० कंपन्यांत भारतीय ब्रँड्सचे नाव

जगभरात लहान-मोठ्या असंख्य कंपन्या काम करत असतात, पण त्यातली कोणती कंपनी कर्मचाऱ्यांसाठी खरोखर उत्तम आहे, हे ठरवणं सोपं नसतं. यासाठीच 'ग्रेट प्लेस टू वर्क' या संस्थेने आशिया आणि मध्य पूर्वेतील कामाच्या ठिकाणांचा एक मोठा अभ्यास केला. या अभ्यासात तब्बल ८९ लाख कर्मचाऱ्यांच्या अनुभवांचा विचार करण्यात आला. इतक्या मोठ्या संख्येने कर्मचाऱ्यांची मतं जमा करून ही यादी तयार करण्यात आल्यामुळे तिला विशेष महत्त्व आलं आहे.

पाहणीत कर्मचाऱ्यांना त्यांच्या कंपनीवरील विश्वास, नेतृत्व, कामाचं वातावरण, नव्या कल्पनांना दिलं जाणारं प्रोत्साहन, कंपनीची मूल्यं आणि एकूणच अनुभव याबद्दल विचारणा करण्यात आली. म्हणजेच कर्मचारी रोज ज्या गोष्टींचा अनुभव घेतात, त्या सगळ्याच बाबींचा या पाहणीत समावेश करण्यात आला. या सगळ्या निकषांवर आधारित जगातल्या सर्वोत्तम १०० कंपन्यांची यादी तयार करण्यात आली.

या यादीत कंपनी किती मोठी आहे किंवा तिचा महसूल किती आहे, हे बघितलं गेलं नाही. त्याऐवजी कर्मचाऱ्यांना प्रत्यक्षात काय अनुभव आला, याला महत्त्व देण्यात आलं. थोडक्यात, कंपनीचा आकार किंवा आर्थिक ताकद यापेक्षा तिथे काम करणाऱ्या माणसांना कसं वाटतं, हाच निकष यादीसाठी वापरण्यात आला. मोठ्या कंपन्यांच्या श्रेणीत टॉप १० मध्ये हिल्टन, मॅरियट इंटरनॅशनल, सिस्को, अॅबव्ही, डीएचएल, इंटरकॉन्टिनेंटल हॉटेल्स ग्रुप, मायक्रो टेक्नॉलॉजीज, टीपी, अॅक्सेन्चर आणि कॅपेला या कंपन्यांचा समावेश आहे.

या संपूर्ण क्रमवारीत भारताची कामगिरी लक्षणीय राहिली आहे. मोठ्या कंपन्यांच्या टॉप १०० यादीत भारताच्या तब्बल ३४ कंपन्या आहेत. यात फ्लिपकार्ट ग्रुप, इन्फोसिस, एचडीएफसी लाईफ इन्शुरन्स, एयू स्मॉल फायनान्स बँक, रिलायन्स रिटेल, बजाज फायनान्स, मॅक्स हेल्थकेअर, एवायई फायनान्स, उज्जीवन स्मॉल फायनान्स बँक, झेनसार टेक्नॉलॉजीज, एक्सपेरियन, एडलवाईस लाईफ आणि एचपी इंक अशा कंपन्यांचा समावेश आहे.

मोठ्या कंपन्यांशिवाय लहान आणि मध्यम आकाराच्या कंपन्यांच्या यादीतही सहा भारतीय कंपन्यांनी स्थान मिळवलं आहे. यामध्ये एनआयए इन्स्टिट्यूशन्स, वाहदम इंडिया, शॅले हॉटेल्स, सर्व्हेंटिका रिन्यूएबल इंडिया, किम्बल आणि एलएमएस या कंपन्यांचा समावेश आहे. म्हणजेच मोठ्या कंपन्यांसोबतच लहान आकाराच्या भारतीय कंपन्यांनीही या आंतरराष्ट्रीय यादीत आपलं स्थान निर्माण केलं आहे.

या यादीत आलेल्या कंपन्यांमधील जवळपास ९३ टक्के कर्मचाऱ्यांनी आपली कंपनी काम करण्यासाठी उत्तम जागा असल्याचं सांगितलं. या कंपन्यांचा सरासरी विश्वास निर्देशांक गुण ९१ टक्के इतका होता. सुरक्षित कार्यालयीन वातावरण, नव्या कर्मचाऱ्यांचं स्वागत करणं आणि सगळ्यांना समान वागणूक देणं, या मुद्द्यांवर कर्मचाऱ्यांनी विशेष सकारात्मक मत नोंदवलं. या सर्व मुद्द्यांवर किमान ९५ टक्के कर्मचाऱ्यांनी सकारात्मक प्रतिसाद दिला, यावरून या कंपन्यांमधील कामाचं वातावरण किती चांगलं आहे, हे स्पष्ट होतं.