कंपनी पगारातून पीएफ कापते, पण खात्यात जमा होत नाहीये? घाबरू नका, अशी लगेच तपासा स्टेटस
दर महिन्याला पगारातून पीएफचे पैसे कापले जातात, पण ती रक्कम खरंच खात्यात जमा होते का हे बघण्यासाठी पासबुक कसं तपासायचं याची सोपी माहिती.
दर महिन्याला पगार जमा होताना सॅलरी स्लिपमध्ये पीएफचे पैसे कापल्याचं स्पष्ट दिसतं. किती रक्कम पगारातून कापली आणि ती पीएफ खात्यात जमा झाली, याची नोंदही त्या स्लिपमध्ये असते. पण प्रत्यक्षात ही कापलेली रक्कम खरोखर पीएफ खात्यात जमा होते का, हा प्रश्न अनेकांना पडतो आणि याचं नक्की उत्तर बहुतेकांना माहीत नसतं.
बहुतेक जण नियमितपणे आपलं पीएफ पासबुक तपासतच नाहीत. पगारातून कापलेली रक्कम दर महिन्याला आपोआप पीएफ खात्यात जमा होते, असं गृहीत धरलं जातं. पण नेहमीच असं घडत नाही. त्यामुळे पुढे काही अडचण येऊ नये यासाठी पीएफ पासबुक वेळोवेळी तपासणं गरजेचं आहे. घरबसल्या आरामात हे पासबुक कसं तपासायचं याची माहिती इथे दिली आहे.
पासबुक तपासताना काही गोष्टींकडे लक्ष द्यायला हवं. प्रत्येक महिन्याची नोंद खात्यात होते आहे की नाही, हे आधी बघा. उदाहरणार्थ सप्टेंबर महिन्यात पासबुक तपासत असाल, तर आधीच्या म्हणजे ऑगस्ट महिन्याची पीएफ शिल्लक नोंदवली गेली आहे का ते तपासा. फक्त स्वतःचा वाटा नाही, तर कंपनीचा वाटा आणि पेन्शन फंडाची शिल्लक रक्कमही तपासून घेणं गरजेचं आहे.
पीएफ पासबुक तपासण्यासाठी तीन सोपे मार्ग आहेत. पहिला मार्ग म्हणजे EPFO च्या अधिकृत पोर्टलवर जाऊन UAN आणि पासवर्ड वापरून लॉग इन करायचं आणि आपला member ID निवडून पासबुक बघायचं. दुसरा मार्ग म्हणजे Passbook Lite हे फीचर, यात जमा रक्कम, काढलेली रक्कम आणि शिल्लक याची सविस्तर नोंद बघता येते. तिसरा मार्ग म्हणजे UMANG ॲप, हे फोनवर डाउनलोड करून पासबुक आणि शिल्लक रक्कम पटकन तपासता येते. ज्यांनी अनेकदा नोकरी बदलली आहे, त्यांचे एकाच UAN खाली वेगवेगळे सदस्य आयडी तयार झालेले असतात. त्यामुळे ज्या कंपनीची माहिती बघायची आहे, त्या कंपनीचा आयडी निवडावा लागतो.
पीएफ जमा झाला नसल्याचं लक्षात आलं, तर आधी सॅलरी स्लिप तपासावी आणि प्रक्रियेसाठी काही दिवस थांबावं. तरीही नोंद दिसत नसेल, तर लगेच कंपनीच्या एचआर विभागाशी संपर्क साधून तक्रार करावी, म्हणजे वेळेत ही समस्या सुटू शकते.
