Boeing 737 : हवेत थरार! इराणमध्ये बोईंग विमान प्रचंड हादरले, केबिनमध्ये किंकाळ्या आणि आक्रोश; VIDEO VIRAL

इराणमध्ये एक प्रवासी विमान हवेत असताना मोठा अपघात होता होता टळला. ईशान्य इराणमधील मशहद शहरातून केरमानशाहकडे जाण्यासाठी सेपहरान एअरलाइन्सचे बोईंग ७३७ विमान निघाले होते. उड्डाण घेतल्यानंतर काही मिनिटांतच विमानाच्या एका चाकाचे टायर निखळले. या तांत्रिक बिघाडामुळे विमानाचे इंजिन निकामी झाले आणि संपूर्ण विमान हवेत जोरात हादरू लागले.

या अचानक आलेल्या जोरदार कंपनांमुळे केबिनच्या आतल्या भागाची बरीच मोडतोड झाली. डोक्यावरचे सामान ठेवायचे कप्पे आपोआप उघडले गेले आणि त्यातलं वजनदार सामान, बॅगा थेट खाली बसलेल्या प्रवाशांच्या अंगावर आणि कॉरिडॉरमध्ये कोसळू लागल्या. वरून पडणाऱ्या सामानामुळे काही प्रवाशांना किरकोळ दुखापती झाल्याचं समोर आलं आहे. डोक्यावरचे कप्पे अचानक उघडणं आणि सामान अंगावर पडणं, यामुळे विमानातलं वातावरण एका क्षणात पूर्णपणे बदलून गेलं. या भीतिदायक क्षणी प्रवाशांना जणू मृत्यू समोर दिसत होता.

या घटनेचा व्हिडिओ सोशल मीडियावर सध्या तुफान व्हायरल होतोय. व्हिडिओमध्ये विमानातले प्रवासी अत्यंत घाबरलेले दिसतात, काहीजण देवाचा धावा करताना तर काहीजण भीतीने किंचाळताना दिसतात. विमान इतक्या वेगाने हादरत होतं की प्रवाशांचा स्वतःवरचा ताबा सुटला होता. विमानातल्या कर्मचाऱ्यांनी परिस्थिती सांभाळण्याचा प्रयत्न केला, पण हवेत आलेल्या या जबरदस्त धक्क्यामुळे सगळेच घाबरून गेले होते. प्रवाशांच्या या भीतीदायक अनुभवाचे क्षण व्हिडिओत स्पष्टपणे टिपले गेले आहेत, आणि तेच व्हिडिओ आता नेटकऱ्यांमध्ये मोठ्या प्रमाणात शेअर होत आहेत.

चाकाचं टायर फुटलंय आणि इंजिनमध्ये बिघाड झालाय हे लक्षात येताच वैमानिकाने लगेच मशहद विमानतळावरच्या हवाई वाहतूक नियंत्रण कक्षाशी (ATC) संपर्क साधला. प्रवाशांना तांत्रिक बिघाडाची कल्पना देण्यात आली आणि वैमानिकाने उड्डाण पुढे न नेता ताबडतोब मशहद विमानतळावर परत जाण्याचा निर्णय घेतला. परिस्थिती किती गंभीर आहे, हे लक्षात घेऊन वैमानिकाने कोणताही धोका न पत्करता विमान परत नेण्याचा हा निर्णय घेतला.

वैमानिकाच्या प्रसंगावधानामुळे आणि कौशल्यामुळे बोईंग ७३७ विमान मशहद विमानतळावर सुखरूप उतरवण्यात यश आलं. विमानतळावर आधीच रुग्णवाहिका आणि आपत्कालीन यंत्रणा तयार ठेवण्यात आली होती. प्राथमिक माहितीनुसार या घटनेत कुणाचाही जीव गेला नाही, सगळे प्रवासी आणि विमान कर्मचारी सुरक्षित आहेत. मात्र सामान अंगावर पडल्यामुळे आणि घाबरल्यामुळे काही प्रवाशांना वैद्यकीय मदत द्यावी लागली.

नागरी उड्डाण प्राधिकरणाच्या अधिकाऱ्यांनी अजून या घटनेच्या नेमक्या कारणाबाबत अधिकृत माहिती दिलेली नाही. चाकाचं टायर निखळल्यामुळे इंजिन बंद पडलं की इंजिनच्या बिघाडामुळे टायरवर जास्त ताण आला, याचा शोध घेण्यासाठी तज्ज्ञांचं पथक विमानाची बारकाईने पाहणी करतंय. विशेष म्हणजे मशहद विमानतळावरून उड्डाण करणाऱ्या सेपहरान एअरलाइन्सच्या विमानाबाबत गेल्या काही दिवसांतली ही दुसरी आपत्कालीन घटना असल्याने हवाई सुरक्षेचा प्रश्न गंभीर बनला आहे.