DRDO च्या CASDIC मध्ये इंजिनिअरिंग विद्यार्थ्यांसाठी पगारी इंटर्नशिप, ११ ऑक्टोबरपर्यंत अर्जाची मुदत
बंगळुरूच्या DRDO CASDIC केंद्रात ३० जागांसाठी सहा महिन्यांची पेड इंटर्नशिप, इंजिनिअरिंग आणि सायन्सच्या विद्यार्थ्यांना संधी.
कॉलेजचं शिक्षण संपायच्या आधीच एखाद्या मोठ्या सरकारी संशोधन संस्थेत काम करायला मिळालं, तर करिअरसाठी ती खूप मोठी संधी असते. अशीच एक संधी आता संरक्षण संशोधन आणि विकास संस्थेने म्हणजेच DRDO ने कॉलेजच्या विद्यार्थ्यांसाठी उपलब्ध करून दिली आहे. बंगळुरूमधल्या DRDO च्या 'कॉम्बॅट एअरक्राफ्ट सिस्टम डेव्हलपमेंट अँड इंटिग्रेशन सेंटर' म्हणजेच CASDIC या केंद्रात ही पेड इंटर्नशिप होणार आहे. यासाठी एकूण ३० विद्यार्थ्यांची निवड केली जाणार असून इंटर्नशिपचा कालावधी सहा महिन्यांचा असेल.
ही इंटर्नशिप मुख्यत्वे इंजिनिअरिंग आणि सायन्सच्या विद्यार्थ्यांसाठी आहे. यात इलेक्ट्रिकल आणि इलेक्ट्रॉनिक्स अँड कम्युनिकेशन शाखेसाठी १२ जागा, कॉम्प्युटर सायन्स आणि इन्फॉर्मेशन टेक्नॉलॉजी शाखेसाठी १३ जागा, तर मेकॅनिकल इंजिनिअरिंग शाखेसाठी ५ जागा ठेवण्यात आल्या आहेत. CASDIC हे बंगळुरूमधलं DRDO चं एक महत्त्वाचं केंद्र आहे, जिथे विद्यार्थ्यांना संबंधित तांत्रिक क्षेत्रातल्या प्रोजेक्ट्स आणि संशोधनाशी निगडित काम शिकायला मिळेल.
पात्रतेबद्दल बोलायचं झालं तर, बीई किंवा बीटेकच्या अंतिम वर्षात शिकणाऱ्या विद्यार्थ्यांच्या मागच्या सेमिस्टरमध्ये किमान 7.5 सीजीपीए असणं गरजेचं आहे. एमएससी करणाऱ्या विद्यार्थ्यांना पहिल्या वर्षात किमान 70% गुण असावे लागतील. उमेदवार AICTE किंवा UGC मान्यताप्राप्त संस्थेतून फुल-टाईम कोर्स करणारा असावा आणि त्याचं कमाल वय २५ वर्षांपेक्षा जास्त नसावं.
ही इंटर्नशिप पूर्णपणे पेड आहे. निवड झालेल्या विद्यार्थ्यांना दरमहा ५,००० रुपये स्टायपेंड मिळेल, म्हणजे सहा महिन्यांच्या संपूर्ण कालावधीत एकूण ३०,००० रुपये स्टायपेंड मिळणार आहे. मात्र बंगळुरूमधली राहायची सोय आणि इतर खर्च विद्यार्थ्यांना स्वतःच करावा लागणार आहे, त्यामुळे अर्ज करण्याआधी हे नियोजन करून ठेवणं गरजेचं आहे.
या इंटर्नशिपसाठी कुठलीही लेखी परीक्षा घेतली जाणार नाही. उमेदवारांची निवड त्यांच्या आधीच्या शैक्षणिक गुणवत्तेवरून आणि ऑनलाईन मुलाखतीतून केली जाईल. निवड झालेल्या उमेदवारांना त्यांच्या ई-मेल आयडीवर कळवलं जाईल. अर्ज करण्याची शेवटची तारीख ११ ऑक्टोबर २०२६ आहे आणि इंटर्नशिप १ डिसेंबर २०२६ पासून सुरू होणार आहे. उमेदवारांनी अर्ज आणि आवश्यक 'Reference/Request Letter' नियमांनुसार hrd.casdic@gov.in या ई-मेल आयडीवर पाठवायचा आहे.
सहा महिन्यांची इंटर्नशिप यशस्वीपणे पूर्ण करणाऱ्या विद्यार्थ्यांना प्रमाणपत्र दिलं जाईल, त्यासाठी दिलेला प्रोजेक्ट आणि रिपोर्ट पूर्ण करावा लागेल. कोणी मध्येच इंटर्नशिप सोडली, तर त्याला प्रमाणपत्र किंवा उरलेला स्टायपेंड मिळणार नाही. सूचनेत स्पष्ट केल्याप्रमाणे, ही इंटर्नशिप पूर्ण केली म्हणजे थेट नोकरी मिळेलच असं नाही, CASDIC किंवा DRDO कुठल्याही प्रकारच्या रोजगारासाठी बांधील नसणार आहे. त्यामुळे याकडे फक्त प्रात्यक्षिक अनुभव आणि तांत्रिक ज्ञान मिळवण्याची संधी म्हणून बघायला हवं.
जाहिरात क्रमांक CASDIC/HRG/PDINTERN/2026/01 असा असून एकूण जागा ३० आहेत, कालावधी सहा महिन्यांचा आहे आणि स्थान CASDIC, बंगळुरू - ५६००९३ असं आहे. अर्ज करण्याआधी इच्छुक विद्यार्थ्यांनी DRDO आणि CASDIC च्या अधिकृत सूचनेतल्या सगळ्या अटी-शर्तींची एकदा खात्री करून घ्यावी.
