दिशा सालियान प्रकरण: सूरज पंचोलीचे मौन सुटले, आदित्य ठाकरेंचाही उल्लेख करत पोस्टमधून भूमिका मांडली

दिशा सालियान मृत्यू प्रकरणात सीबीआयने एफआयआर दाखल केल्यानंतर या प्रकरणाला पुन्हा एक वेगळं वळण मिळालं आहे. दिशाचे वडील सतीश सालियान यांनी काही व्यक्तींविरोधात गंभीर आरोप करत त्यांच्याकडे कथित पुरावे असल्याचा दावा केला आहे. या प्रकरणात सूरज पंचोली, आदित्य ठाकरे, डीनो मोरिया, सचिन वाझे, परमबीर सिंह आणि रिया चक्रवर्ती यांच्या नावांची चर्चा सुरू आहे. या पार्श्वभूमीवर अभिनेता सूरज पंचोलीने सोशल मीडियावर एक लांबलचक पोस्ट टाकत स्वतःवरील आरोपांबाबत आपली बाजू मांडली आहे.

सूरज पंचोलीने पोस्टमध्ये दिशा सालियानसोबत कोणत्याही प्रकारचा संबंध असल्याचं स्पष्टपणे नाकारलं आहे. माध्यमांतील अनेक रिपोर्ट्स आणि वक्तव्यांमुळे आपलं नाव दिशाच्या मृत्यूशी संबंधित वादात ओढलं जात असल्याचं त्याने नमूद केलं. आपण आयुष्यात दिशा सालियानला कधीच प्रत्यक्ष किंवा अप्रत्यक्षपणे भेटलेलो नाही, त्यामुळे या प्रकरणाशी आपला संबंध जोडणं चुकीचं आणि त्रासदायक असल्याचं सूरजने म्हटलं आहे.

पोस्टमध्ये सूरज पंचोलीने आदित्य ठाकरेंचाही उल्लेख केला. आपण आजपर्यंत आदित्य ठाकरेंनाही कधीच भेटलेलो नाही, असं तो म्हणाला. कोणत्याही पुराव्याशिवाय आपलं नाव अशा वादात ओढलं जाणं अन्यायकारक असल्याचं त्याने सांगितलं आणि नाव जोडण्यापूर्वी संबंधित तथ्यांची पडताळणी करावी, अशी विनंतीही केली.

इतकी वर्षं आपण या प्रकरणावर का बोललो नाही, याचंही स्पष्टीकरण सूरजने दिलं. प्रत्येक बातमी किंवा रिपोर्टवर प्रतिक्रिया द्यायची इच्छा नव्हती, पण एखादी गोष्ट सतत समोर येत राहिली की एका टप्प्यावर व्यक्त होणं गरजेचं ठरतं, असं तो म्हणाला. सीबीआय आणि पोलिसांकडून याआधीच आपली चौकशी झाली असून साधारण चार-पाच वर्षांपूर्वी आपला जबाब नोंदवला गेल्याचं त्याने सांगितलं. भविष्यात कोणत्याही तपास यंत्रणेला पुन्हा चौकशी करायची असल्यास पूर्ण सहकार्य करण्याची तयारी असल्याचंही त्याने स्पष्ट केलं.

आपल्याकडे लपवण्यासारखं काहीही नसल्याचं सूरज पंचोलीने सांगितलं. तपास यंत्रणेला अतिरिक्त माहिती हवी असल्यास चौकशीसाठी उपलब्ध असल्याचंही तो म्हणाला. दिशा सालियानच्या मृत्यूशी संबंधित परिस्थितीची निष्पक्ष आणि सखोल सीबीआय चौकशी व्हावी, याला आपला पाठिंबा असल्याचं त्याने नमूद केलं. सोबतच सोशल मीडिया आणि माध्यमांमध्ये पसरवल्या जाणाऱ्या अपप्रचारावरही त्याने भाष्य केलं. एखादी हेडलाईन म्हणजे पुरावा नाही, टीव्हीवरील चर्चा म्हणजे तथ्य नाही आणि सोशल मीडियावरची प्रत्येक गोष्ट खरी मानू नये, असं तो म्हणाला.

दुसरीकडे, दिशा सालियानचे वडील सतीश सालियान यांचे वकील निलेश ओझा यांनी काही गंभीर आरोप केले आहेत. दिशा यांच्यावर सामूहिक बलात्कार करून त्यांची हत्या करण्यात आली आणि त्यांच्याकडे कथितरित्या काही महत्त्वाचे पुरावे होते, असा वकिलांचा दावा आहे. या आरोपांमध्ये ड्रग्स आणि बाल तस्करीशी संबंधित कथित माहितीचाही उल्लेख करण्यात आला आहे. वकिलांनी दिशा यांच्या मोबाईलबाबतही दावा केला असून ९ ते १७ जून २०२० या काळात दिशाचा फोन काही व्यक्तींच्या ताब्यात होता आणि त्यादरम्यान फोनमधील डेटा तपासण्यात आल्याचा आरोप त्यांनी केला आहे.

या सर्व आरोपांची चौकशी आणि सत्यता तपासणं हे तपास यंत्रणांच्या अखत्यारीतील काम आहे. सूरज पंचोलीने आपल्या पोस्टच्या शेवटी कायद्यावर आणि तपास यंत्रणांवर विश्वास असल्याचं सांगत सत्य अखेर समोर येईल, असा विश्वास व्यक्त केला आहे.