चंद्रपुरात 'भाऊंची दहीहंडी'; दीड लाखांचे बक्षीस, रस्सीखेच व वेशभूषा स्पर्धांचा थरार

चंद्रपूर शहरात १२ सप्टेंबर रोजी भव्य सांस्कृतिक व क्रीडा महोत्सव होणार आहे. 'द मराठा चॅरिटेबल ट्रस्ट' आणि 'बाळूभाऊ मित्र परिवार' यांच्या संयुक्त विद्यमाने हा कार्यक्रम पार पडेल. वरोरा नाका चौकातील न्यू इंग्लिश शाळेच्या मैदानावर हे आयोजन असून, खासदार प्रतिभा धानोरकर यांची या कार्यक्रमाला खास उपस्थिती असणार आहे. 'वेध मराठी मनाचा, उत्सव चंद्रपूरकरांचा' अशी या महोत्सवाची संकल्पना आहे. या संकल्पनेखाली शहरातील नागरिकांसाठी एकाच ठिकाणी विविध प्रकारच्या स्पर्धा आणि करमणुकीचे आयोजन करण्यात आले आहे.

या महोत्सवात तीन प्रमुख स्पर्धा रंगणार आहेत. भाऊंची दहीहंडी, महिलांसाठी रस्सीखेच आणि ५ ते १० वर्षे वयोगटातील मुलामुलींसाठी वेशभूषा स्पर्धा असे या स्पर्धांचे स्वरूप आहे. या तिन्ही स्पर्धांमधील विजेत्यांना लाखो रुपयांची रोख बक्षिसे दिली जाणार आहेत, त्यामुळे शहरातील नागरिकांमध्ये या महोत्सवाबद्दल उत्सुकता आहे.

कार्यक्रमाची सुरुवात दुपारी ३ वाजता महिलांच्या रस्सीखेच स्पर्धेने होईल. यात १८ वर्षांवरील महिलांना सहभागी होता येईल. या स्पर्धेतील पहिल्या, दुसऱ्या आणि तिसऱ्या क्रमांकाच्या विजेत्यांना अनुक्रमे ११ हजार, ७ हजार आणि ५ हजार रुपये रोख बक्षीस तसेच चषक दिला जाणार आहे.

त्यानंतर सायंकाळी ५ वाजता ५ ते १० वर्षे वयोगटातील मुलामुलींसाठी वेशभूषा स्पर्धा होणार आहे. 'भारतातील थोर महापुरुष' हा या स्पर्धेचा विषय असून, लहान मुलामुलींना या विषयावर आधारित वेशभूषा करून सहभागी व्हावे लागणार आहे. या स्पर्धेतील विजेत्यांना अनुक्रमे ५ हजार, ३ हजार आणि २ हजार रुपये रोख बक्षीस व चषक देऊन गौरवण्यात येईल.

या महोत्सवाचे मुख्य आकर्षण असलेली भाऊंची दहीहंडी स्पर्धा सायंकाळी ७ वाजता सुरू होईल. ही स्पर्धा सर्वांसाठी खुली असून, विजेत्या गोविंदा पथकाला १ लाख ५१ हजार रुपये रोख आणि चषक देऊन सन्मानित केले जाणार आहे.

या स्पर्धांसाठी आयोजकांनी काही अटी व नियम ठेवले आहेत. वेशभूषा स्पर्धेसाठी उद्या सायंकाळी ६ वाजेपर्यंत नोंदणी करणे बंधनकारक आहे, तर रस्सीखेच स्पर्धेसाठी आधार कार्डसह नोंदणी करावी लागणार आहे. आयोजकांनी सर्व नियमांचे पालन करूनच स्पर्धेत सहभागी होण्याचे आवाहन केले आहे.

चंद्रपूर शहर व परिसरातील नागरिकांनी, गोविंदा पथकांनी, महिलांनी आणि लहान मुलांनी मोठ्या संख्येने उपस्थित राहून कार्यक्रमाची शोभा वाढवावी, असे आवाहन 'द मराठा चॅरिटेबल ट्रस्ट' व 'बाळूभाऊ मित्र परिवार' यांच्या वतीने करण्यात आले आहे.