लंडनमध्ये एकनाथ शिंदेंचं इंग्रजीतून अर्धा तास भाषण, स्टेट्समनशिप पुरस्काराने गौरव
ब्रिटिश संसदेच्या हाऊस ऑफ कॉमन्स आणि हाऊस ऑफ लॉर्ड्समध्ये झालेल्या आंतरराष्ट्रीय परिषदेत उपमुख्यमंत्री एकनाथ शिंदे यांनी इंग्रजीत भाषण करत लाडकी बहीण योजना आणि राज्यातील पायाभूत सुविधांची माहिती दिली.
राज्याचे उपमुख्यमंत्री एकनाथ शिंदे यांच्या लंडन दौऱ्याची सध्या जगभर चर्चा सुरू आहे. ब्रिटिश संसदेच्या ऐतिहासिक हाऊस ऑफ कॉमन्स आणि हाऊस ऑफ लॉर्ड्समध्ये झालेल्या इंटरनॅशनल कॉन्क्लेव्ह २०२६ या विशेष परिषदेत त्यांनी केलेलं भाषण सोशल मीडियावर खूप गाजतंय. एरवी मराठी आणि हिंदीतून बोलणारे शिंदे यांनी या आंतरराष्ट्रीय व्यासपीठावर तब्बल अर्धा तास अस्खलित इंग्रजीत भाषण केलं. त्यांच्या या भाषणाने आणि सादरीकरणाने तिथे उपस्थित असलेले ब्रिटिश खासदार, उद्योजक आणि परदेशी राजनैतिक अधिकारी अक्षरशः भारावून गेले.
भाषणाची सुरुवात शिंदे यांनी 'जय हिंद, जय महाराष्ट्र' आणि छत्रपती शिवाजी महाराजांचा जयघोष करत केली. त्यानंतर ज्येष्ठ कवी सुरेश भट यांच्या 'लाभले आम्हास भाग्य बोलतो मराठी' या ओळींचा उल्लेख करत त्यांनी आपल्या मातृभाषेचा अभिमान आंतरराष्ट्रीय स्तरावर व्यक्त केला.
भाषणात शिंदे यांनी महाराष्ट्रातील महिला सक्षमीकरणाच्या मुद्द्यावर खास भर दिला. ते म्हणाले, "मला स्वतःला एक सख्खी बहीण आहे, पण मुख्यमंत्री माझी लाडकी बहीण योजनेमुळे आज महाराष्ट्रातील अडीच कोटी बहिणींचे आशीर्वाद माझ्या पाठीशी आहेत." ही योजना म्हणजे केवळ आर्थिक मदत नसून महिलांच्या स्वाभिमानाची आणि आर्थिक स्वातंत्र्याची पायाभरणी आहे, असं त्यांनी सांगितलं. घरातली महिला आर्थिकदृष्ट्या सक्षम झाली की संपूर्ण कुटुंब प्रगतीच्या दिशेने वाटचाल करतं, असंही त्यांनी नमूद केलं.
आईचा सन्मान वाढवण्यासाठी वडिलांच्या नावासोबत आईचं नाव लावणं बंधनकारक करणारं महाराष्ट्र हे भारतातलं पहिलं राज्य ठरल्याचं शिंदे यांनी अभिमानाने सांगितलं. तसंच सामान्य नागरिकांना सरकारी कार्यालयांचे हेलपाटे मारावे लागू नयेत यासाठी सुरू करण्यात आलेल्या 'शासन आपल्या दारी' या उपक्रमाचंही ब्रिटनच्या संसदेत भरभरून कौतुक झालं.
महाराष्ट्राची आर्थिक ताकद उद्योजकांसमोर मांडताना शिंदे यांनी 'डिझाइन इन लंडन, मॅन्युफॅक्चर इन महाराष्ट्र' ही नवी संकल्पना मांडली. मुंबई आणि लंडन ही दोन्ही जागतिक आर्थिक केंद्रं असल्याने दोन्ही ठिकाणी सहकार्याच्या मोठ्या संधी असल्याचं त्यांनी सांगितलं. ब्रिटनने आपलं ग्रीन कॅपिटल आणि प्रगत तंत्रज्ञान घेऊन महाराष्ट्रात यावं आणि फिनटेक, ग्रीन हायड्रोजन, डीप-टेक तसेच कौशल्य विकास या क्षेत्रांत गुंतवणूक करावी, असं आवाहन त्यांनी ब्रिटिश उद्योजकांना केलं.
राज्यातील पायाभूत सुविधांबद्दल बोलताना त्यांनी हिंदूहृदयसम्राट बाळासाहेब ठाकरे समृद्धी महामार्ग, मुंबई कोस्टल रोड, अटल सेतू आणि वाढवण बंदराचा उल्लेख केला. या मोठ्या प्रकल्पांमुळे महाराष्ट्र भविष्यात जागतिक व्यापाराचं मुख्य प्रवेशद्वार बनेल आणि राज्याला १ ट्रिलियन डॉलरची अर्थव्यवस्था बनवण्याचं स्वप्न नक्की पूर्ण होईल, असा विश्वास त्यांनी व्यक्त केला.
ब्रिटिश संसदेतील 'महाराष्ट्र, भारत, यूके संवाद' आणि या आंतरराष्ट्रीय परिषदेदरम्यान शिंदे यांना त्यांच्या नेतृत्वासाठी आणि सार्वजनिक सेवेतील योगदानासाठी 'स्टेट्समनशिप अवॉर्ड फॉर ट्रान्सफॉर्मेटिव्ह लीडरशिप' तसेच 'कॉमनवेल्थ पब्लिक लीडरशिप रिकग्निशन' या पुरस्कारांनी सन्मानित करण्यात आलं.
पुरस्कार स्वीकारल्यानंतर शिंदे म्हणाले, "हा सन्मान माझा वैयक्तिक नसून महाराष्ट्रातील १२ कोटी जनतेचा, शेतकरी, कष्टकरी आणि माझ्या लाडक्या बहिणींचा सन्मान आहे." शिंदे यांच्या या लंडन दौऱ्यामुळे भारत आणि ब्रिटनमधील संबंध अधिक दृढ होण्यास मदत होणार असून महाराष्ट्रातील गुंतवणुकीला नवी गती मिळेल, असं मत राजकीय विश्लेषकांकडून व्यक्त केलं जात आहे.
